សាលាដំបូងរាជធានីភ្នំពេញ នឹងធ្វើសេចក្តីសន្និដ្ឋានលើសំណុំរឿងកញ្ញា សេង ធារី និងសកម្មជនគណបក្សប្រឆាំង៤នាក់នៅដើមខែក្រោយនេះ បន្ទាប់ពីតុលាការបានបិទបញ្ចប់ការសួរដេញដោលភាគីពាក់ព័ន្ធនៅថ្ងៃនេះ។
មេធាវីការពារក្តីឱ្យកញ្ញា សេង ធារី គឺលោក ជូង ជូងី បានប្រាប់វីអូឌីថា សវនាការនៅថ្ងៃនេះ មិនបានសួរដេញដោលកញ្ញា សេង ធារី នោះទេ។ ប៉ុន្តែចៅក្រមសាលាដំបូងរាជធានីភ្នំពេញ លោក រស់ ពិសិដ្ឋ បានអនុញ្ញាតឱ្យជនជាប់ចោទទាំង ៥នាក់ ដែលរួមមាន កញ្ញា សេង ធារី អ្នកស្រី យក់ នាង លោក កាក់ កុម្ភារ លោក ហេង ច័ន្ទសុទ្ធី និងលោក ទុំ ប៊ុនថន ធ្វើការកត់សម្គាល់ម្តងម្នាក់ទាក់ទងបទចោទ និងសវនាការនាពេលកន្លងមក។
លោក ជូង ជូងី បន្តថា សម្រាប់កូនក្តីរបស់លោក គឺកញ្ញា សេង ធារី បានកត់សម្គាល់ទាក់ទងនឹងបទចោទប្រកាន់មកលើរូបគាត់ និងការធ្វើមោឃភាពនីតិវិធីដែលកញ្ញាថា កន្លងមកតុលាការបានបំពាននីតិវិធីដោយមិនបានផ្តល់ដំណឹងជាមុន។
លោកថា៖ «ព្រឹកមិញនេះ [ការបើកសវនាការ] ទីមួយ គឺតុលាការប្រកាសសេចក្តីសម្រេចពាក់ព័ន្ធនឹងការសុំនៅក្រៅឃុំ របស់លោកស្រី យក់ នាង គឺតុលាការសម្រេចមិនព្រមដោះលែងទេ បន្តឃុំខ្លួនបន្តទៅទៀត ហើយទីពីរទទួលការសួរដេញដោលទៅលើលោកស្រី យក់ នាង ពាក់ព័ន្ធសកម្មភាពរបស់គាត់កន្លងមក ដើម្បីឆ្លើយតបទៅនឹងការចោទប្រកាន់គាត់ ហើយទីបីទទួលការកត់សម្គាល់ពីជនត្រូវចោទ ជនត្រូវចោទទាំង៥នាក់ហ្នឹង មានការកត់សម្គាល់ពីរឿងរបស់ខ្លួនរៀងៗខ្លួនទន្ទឹមហ្នឹងកញ្ញា សេង ចាន់ធារី អត់មានការសួរដេញដោលអីទេ ដោយសារសវនាការមុនៗសួរដេញដោលគាត់ល្អិតល្អន់អស់ហើយ»។
យ៉ាងណាក្តី មេធាវីការពារក្តីរូបនេះ សង្ឃឹមថា តុលាការនឹងធ្វើសេចក្តីសម្រេចដោយយុត្តិធម៌មកលើកូនក្តីរបស់លោក នៅថ្ងៃទី៣ ខែឧសភា ខាងមុខនេះ។
លោកបន្តថា៖ «ថ្ងៃទី៣ ខែ៥[ឧសភា]នោះ នឹងធ្វើសេចក្តីសន្និដ្ឋានរៀងៗខ្លួន ព្រះរាជអាជ្ញានឹងធ្វើសេចក្តីសន្និដ្ឋានចោទប្រកាន់ ហើយមេធាវីការពារសិទ្ធិនឹងធ្វើសេចក្តីសន្និដ្ឋានការពារកូនក្តីខ្លួន ខ្ញុំនឹងធ្វើសេចក្តីសន្និដ្ឋានការពារក្តីកញ្ញា សេង ចាន់ធារី ប៉ុន្តែប្រហែលជាថ្ងៃទី៣ ខែ៥នោះ មិនទាន់ប្រកាសសាលក្រមឬសម្រេចយ៉ាងណាទេ ប្រហែលជាទៅថ្ងៃក្រោយទៀត ក៏ប៉ុន្តែចំពោះការរំពឹង ឬក៏សេចក្តីសង្ឃឹមនោះខ្ញុំមិនគិតទេ ប៉ុន្តែខ្ញុំចង់ឱ្យគណៈវិនិច្ឆ័យ ឬ ក្រុមប្រឹក្សាជំនុំជម្រះដោយឥស្សរភាពកុំឱ្យលុះទៅនឹងដោយអគតិ ដូចការចែងកំណត់ទុកដែលថា ចៅក្រមហ្នឹងសម្រេចវៀសចាកនឹងអគតិទាំង៤»។
វីអូឌី មិនអាចសុំការអត្ថាធិប្បាយជុំវិញករណីនេះ ពីអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ បានទេ។
តំណាងអយ្យការអមសាលាដំបូងរាជធានីភ្នំពេញ បានចេញដីកាកាលពីឆ្នាំ២០២០ ចោទប្រកាន់កញ្ញា សេង ធារី និងសកម្មជនបក្សប្រឆាំងសរុប ១២០នាក់ ពីបទ រួមគំនិតក្បត់ និងញុះញង់ ដោយសារការបង្ហោះសារគាំទ្រផែនការមាតុភូមិនិវត្តន៍របស់លោក សម រង្ស៊ី ប្រធានគណបក្សសង្គ្រោះជាតិដែលតុលាការបានរំលាយ កាលពីឆ្នាំ២០១៩។ ដោយសារសំណុំរឿងនេះមានជនសង្ស័យច្រើនពេក តុលាការបានបំបែកសំណុំរឿងនេះជាពីរធំៗ ហើយកញ្ញា សេង ធារី ស្ថិតនៅក្នុងចំណោមជនសង្ស័យចំនួន ៤២នាក់។
កញ្ញា សេង ធារី បានថ្លែងនៅក្រោយពីសវនាការនៅថ្ងៃទី១២ ខែមេសានេះថា នៅក្នុងស្មារតីរបស់កញ្ញាពេលនេះ គឺនៅដដែល ដោយប្រឆាំងនឹងការចោទប្រកាន់របស់តុលាការមកលើកញ្ញា។ កញ្ញាបានប្រាប់ក្រុមអ្នកកាសែតថា រហូតមកដល់ពេលនេះ កញ្ញានៅតែយល់ថា រឿងក្តីនេះ គឺជារឿងនយោបាយសុទ្ធសាធ។
កញ្ញាថា៖ «ពេលវេលាឥឡូវទៅដល់ថ្ងៃទី៣ខែ៥[ឧសភា] ខ្ញុំគិតថា អត់មានសវនាការណាផ្សេងទៀតទេ ថ្ងៃទី៣ខែ៥ ជាការធ្វើសេចក្តីសន្និដ្ឋាន ពីភាគីទាំងអស់ ហើយបន្ទាប់មកមានតែសវនាការមួយទៀតសម្រាប់តែប្រកាសសាលក្រម មានន័យថា យើងកំពុងឆ្ពោះទៅភាពបញ្ចប់ ទៅភាពលីឡឺ ភាពបាយឡុកបាយឡនេះ ដែលកំពុងផ្តល់ភាពគ្រោះថ្នាក់ដល់យើងជាបុគ្គលនៅក្នុងការគាបសង្កត់យើង ប៉ុន្តែកំពុងផ្តល់ភាពគ្រោះថ្នាក់ដល់សង្គមតែម្តង»។
នាយកផ្នែកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត មានប្រសាសន៍ថា លោកនឹងមិនភ្ញាក់ផ្អើល ចំពោះការប្រកាសសាលក្រមលើសំណុំរឿងរបស់កញ្ញា សេង ធារី និងសកម្មជនគណបក្សប្រឆាំងនេះទេ។ លោកថា សម្រាប់មតិជាតិនិងអន្តរជាតិ នៅតែចាត់ទុករឿងនេះថា ជារឿងនយោបាយ។
លោកថា៖ «ហើយខ្ញុំគិតថា វានៅតែមានការចោទប្រកាន់ ហើយនឹងការផ្តន្ទាទោសក្នុងការប្រកាសសាលក្រមចឹង ព្រោះរឿងហ្នឹងវាពាក់ព័ន្ធនឹងរឿងនយោបាយ ហើយប្រសិនបើគ្មានដំណោះស្រាយនយោបាយកើតឡើងទេ ហើយការចរចានយោបាយណាកើតឡើង ដើម្បីបន្ថយស្ថានភាពនយោបាយតានតឹងហ្នឹង ហើយវិលទៅរកវប្បធម៌សន្ទនាវិញទេ អាហ្នឹងអ្នកទាំងអស់គ្នានឹងត្រូវតែជាប់ពន្ធនាគារដូចតែកន្លងមកចឹង»។
សវនាការលើកញ្ញា សេង ធារី និងសំណុំរឿងក្បត់ជាតិរបស់អតីតអ្នកគាំទ្រ សកម្មជន និងថ្នាក់ដឹកនាំគណបក្សសង្គ្រោះជាតិ ដែលត្រូវបានរំលាយកាលពីឆ្នាំ២០១៧ បានចាប់ផ្តើមកាលពីដើមខែធ្នូ ឆ្នាំ២០២១ បន្ទាប់ពីអាក់ខានអស់រយៈពេលជាងមួយឆ្នាំ៕
