ក្រសួងទេសចរណ៍ ឱ្យដឹងថា រយៈពេល៤ថ្ងៃនៃអំឡុងបុណ្យចូលឆ្នាំខ្មែរប្រពៃណីជាតិ មានភ្ញៀវទេសចរជាង ៥លាន១៧ម៉ឺននាក់ ចេញដើរលេងកម្សាន្តនៅទូទាំងប្រទេស ក្នុងនោះ ខេត្តគោលដៅដែលមានភ្ញៀវទៅលេងកម្សាន្តច្រើនជាងគេ គឺខេត្តបាត់ដំបង កំពង់ចាម បន្ទាយមានជ័យ និងសៀមរាប។
រដ្ឋមន្ត្រីក្រសួងទេសចរណ៍ លោក ថោង ខុន ត្រូវបានស្រង់ប្រសាសន៍មកផ្សព្វផ្សាយក្នុងហ្វេសប៊ុករបស់ក្រសួងទេសចរណ៍នៅថ្ងៃចន្ទនេះថា ក្នុងពិធីបុណ្យចូលឆ្នាំប្រពៃណីជាតិខ្មែរ រយៈពេល៣ថ្ងៃ និងថ្ងៃអាទិត្យ១ថ្ងៃទៀត គឺចាប់ពីថ្ងៃទី១៤ ដល់ថ្ងៃទី១៧ ខែមេសា ឆ្នាំ២០២២ នៅទូទាំងប្រទេសទទួលបានភ្ញៀវទេសចរសរុបចំនួន៥ ១៧៥ ៧៥៤នាក់ ក្នុងនោះ ភ្ញៀវជាតិចំនួន៥ ១៤០ ៤៩៥នាក់ និងភ្ញៀវបរទេសផ្ទៃក្នុង ៣៥ ២៥៩នាក់។
ចំណែកគោលដៅទេសចរណ៍សំខាន់ៗដែលភ្ញៀវទេសចរបានទៅកម្សាន្តច្រើនជាងគេនោះ មានដូចជា ខេត្តបាត់ដំបង មានចំនួន៦៥៣ ៨៩៦នាក់, ខេត្តកំពង់ចាម ៥៤១ ៩០០នាក់, ខេត្តបន្ទាយមានជ័យ ៤៧១ ១១៩នាក់, ខេត្តសៀមរាប ៤៥៥ ៩៨៤នាក់, ខេត្តព្រៃវែង ៣៩៦ ៣២៨នាក់, ខេត្តកំពង់ស្ពឺ ៣៤៥ ០១៨នាក់, ខេត្តពោធិ៍សាត់ ៣៣៨ ៩១៦នាក់, ខេត្តកំពង់ឆ្នាំង ៣០០ ៥៦១នាក់, ខេត្តកំពត ២៨៤ ៨៩៣នាក់, ខេត្តព្រះសីហនុ ២៦៤ ៣០៨នាក់ និងរាជធានីភ្នំពេញ ២៤០ ៤៦០នាក់ រួមទាំងបណ្ដាខេត្តផ្សេងៗទៀត។
លោក ថោង ខុន បានបន្តថា ចំនួនភ្ញៀវទេសចរប្រមាណជាង៥លាននាក់នេះជាចំនួនមួយដ៏ច្រើនលើសពីការរំពឹងទុក ចាប់តាំងពីរដ្ឋាភិបាលបានប្រកាសបិទបញ្ចប់ព្រឹត្តិការណ៍សហគមន៍ (ការឆ្លងរាលដាលជំងឺកូវីដ-១៩ក្នុងសហគមន៍) កាលពីអំឡុងខែធ្នូ ឆ្នាំ២០២១ ខណៈដែលពិធីបុណ្យឆ្លងឆ្នាំសកលកន្លងមក ភ្ញៀវសរុបមានប្រមាណ២លាននាក់ ហើយពិធីបុណ្យចូលឆ្នាំចិន-វៀតណាម ភ្ញៀវសរុបមានប្រមាណ៩៤ម៉ឺននាក់។
លោកបន្តថា៖ «តាមការស្ទង់មតិនិងសង្កេតជាក់ស្ដែង មិនមែនពួកគាត់[ភ្ញៀវទេសចរ]មិនខ្លាចឆ្លងជំងឺកូវីដ-១៩ តែពួកគាត់ពិតជាមានក្ដីរីករាយដែលបានដើរកម្សាន្តក្នុងឱកាសចូលឆ្នាំនេះ ដែលខកខានរៀបចំរយៈពេល២ឆ្នាំ ហើយក៏ជឿជាក់លើប្រសិទ្ធភាពនៃវ៉ាក់សាំង ហើយម្យ៉ាងទៀតពួកគាត់ក៏មានទំនុកទុកចិត្តថា ប្រសិនបើមានការឆ្លងជំងឺកូវីដ ក៏ពួកគាត់អាចព្យាបាលខ្លួនឯងនៅផ្ទះបានផងដែរ»។
យោងតាមការសាកសួរនិងស្ទង់មតិបឋម ក្រសួងទេសចរណ៍ឱ្យដឹងថា ចំពោះគ្រួរសារមួយដែលមានសមាជិក៥នាក់ ហើយធ្វើដំណើរកម្សាន្តឆ្ងាយពីផ្ទះ ក្នុងពេល៣ថ្ងៃនេះ ពួកគាត់បានចំណាយថវិកាមិនតិចជាង៥០០ដុល្លារទេ ដែលចំនួននេះគិតរួមទាំងការចំណាយលើការស្នាក់នៅ ហូបចុក ធ្វើដំណើរ (ចាក់សាំង) រួមទាំងការទិញទំនិញផ្សេងៗ រៀបចំរណ្ដាប់ បង្សុកូល និងយកចង្ហាន់ទៅវត្តផងនោះ៕