លោកនាយករដ្ឋមន្ត្រី ហ៊ុន សែន ណែនាំទៅក្រសួងការងារ និងបណ្ដុះបណ្ដាលវិជ្ជាជីវៈ ឱ្យសហការជាមួយម្ចាស់រោងចក្រសហគ្រាសទូទាំងប្រទេស ដើម្បីឱ្យកម្មករបានសម្រាកចាក់វ៉ាក់សាំងប្រឆាំងវីរុសកូវីដ-១៩ ដូសជំរុញ ឱ្យបានគ្រប់គ្នា ខណៈរោងចក្រសហគ្រាសជាកន្លែងដែលមានហានិភ័យនៃការឆ្លងរាលដាលជំងឺកូវីដ-១៩ខ្ពស់។
ក្នុងពិធីសម្ពោធសមិទ្ធផលនានា ដែលជាគម្រោងការពារទឹកជំនន់ និងកែលម្អប្រព័ន្ធប្រឡាយ-លូ ជំហានទី៤ ក្នុងរាជធានីភ្នំពេញ លោកនាយករដ្ឋមន្ត្រី ហ៊ុន សែន បានអំពាវនាវដល់ប្រជាពលរដ្ឋទាំងអស់ទៅទទួលយកវ៉ាក់សាំងកូវីដ-១៩ ដូសជំរុញ ខណៈនៅមានពលរដ្ឋយ៉ាងតិចប្រមាណ៦លាននាក់ទៀត ដែលមិនទាន់ទៅទទួលវ៉ាក់សាំងដូសទី៣។
ជាមួយគ្នានេះដែរ លោកបានបញ្ជាទៅរដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ត្រូវសម្របសម្រួលនិងសហការជាមួយម្ចាស់រោងចក្រ ដើម្បីសម្រុកចាក់វ៉ាក់សាំងជូនកម្មករ-កម្មការិនីដែលមិនទាន់ទទួលបានវ៉ាក់សាំងដូសជំរុញ។
លោកនាយករដ្ឋមន្ត្រី ហ៊ុន សែន បានគូសបញ្ជាក់ថា៖ «ប្រមូលផ្ដុំតម្រង់រករោងចក្រ ដោយសហការជាមួយម្ចាស់រោងចក្រ ឱ្យកម្មករបានសម្រាកចាក់វ៉ាក់សាំង ព្រោះកន្លែងហ្នឹងគឺជាកន្លែងដែលងាយ[ឆ្លង] បើសិនជាការកើនឡើងនៅកន្លែងហ្នឹង គឺលំបាក។ ឯកឧត្ដម អ៊ិត សំហេង ត្រូវធ្វើការងារហ្នឹងឱ្យបានល្អ សហការជាមួយបណ្ដារោងចក្រ ដើម្បីធ្វើកិច្ចការងារហ្នឹងឱ្យបានល្អ ចាក់សម្រុកឱ្យកម្មករ-កម្មការិនីរបស់យើងទទួលបាននូវការការពារខ្លួនយ៉ាងរឹងមាំ ដែលអាចចៀសផុតពីហានិភ័យនៃការឆ្លង[ជំងឺកូវីដ-១៩]»។
កាលពីថ្ងៃទី១៨ ខែមេសា ថ្មីៗនេះ រដ្ឋាភិបាល តាមរយៈក្រសួងសុខាភិបាល បានប្រកាសពីការបន្ថែមក្រុមគ្រូពេទ្យ និងទីតាំងសម្រាប់ចាក់វ៉ាក់សាំងប្រឆាំងវីរុសកូវីដ-១៩ ដូសជំរុញ (ដូសទី៣ និងទី៤) នៅតាមរោងចក្រសហគ្រាស ទីផ្សារនិងទីប្រជុំជនសំខាន់ៗ និងនៅតាមសាលារៀន ដើម្បីចាក់ជូនប្រជាពលរដ្ឋ កម្មករ-កម្មការិនី គ្រូបង្រៀននិងសិស្សានុសិស្ស ជាដើម ដើម្បីទប់ស្កាត់ការឆ្លងរីករាលដាលជំងឺកូវីដ-១៩។
បើតាមរបាយការណ៍ក្រសួងសុខាភិបាល គិតត្រឹមថ្ងៃទី១៧ ខែមេសា ឆ្នាំ២០២២នេះ កំណើនអត្រាចាក់វ៉ាក់សាំងកូវីដ-១៩ បានកើនដល់ ៩២,៨៤% ធៀបនឹងចំនួនប្រជាជនសរុប១៦លាននាក់។ ក្នុងនោះ បានចាក់វ៉ាក់សាំងលើប្រជាពលរដ្ឋអាយុពី ១៨ឆ្នាំឡើងទៅ មានចំនួន ១០២,៧៤% ធៀបជាមួយចំនួនប្រជាជនគោលដៅ ១០លាននាក់, កុមារ-យុវវ័យអាយុពី ១២ឆ្នាំ ទៅក្រោម ១៨ឆ្នាំ មានចំនួន ១០០,១៩% ធៀបជាមួយចំនួនប្រជាជនគោលដៅ ១ ៨២៧ ៣៤៨នាក់, កុមារអាយុពី ០៦ឆ្នាំ ដល់ក្រោម ១២ឆ្នាំ មានចំនួន ១០៧,៩០% ធៀបជាមួយនឹងប្រជាជនគោលដៅ ១ ៨៩៧ ៣៨២នាក់, កុមារអាយុ ០៥ឆ្នាំ មានចំនួន ១២៤,៨២% ធៀបជាមួយនឹងប្រជាជនគោលដៅ ៣០៤ ៣១៧នាក់ និងកុមារអាយុ ០៣ឆ្នាំ ដល់ក្រោម ០៥ឆ្នាំ មានចំនួន ៥២,៨៤% ធៀបជាមួយនឹងប្រជាជនគោលដៅ ៦១០ ៧៣០នាក់៕
