អាជ្ញាធរកម្ពុជា-ថៃ បានលាងសម្អាតផ្លូវថ្នល់នៅមុខច្រកទ្វារអន្តរជាតិប៉ោយប៉ែត នៅថ្ងៃទី២៩ ខែមេសានេះ ដើម្បីត្រៀមបើកដំណើរការឡើងវិញចាប់ពីថ្ងៃទី១ ខែឧសភា ខាងមុខនេះ។
អភិបាលរងខេត្តបន្ទាយមានជ័យ លោក ង៉ោ ម៉េងជ្រួន បានប្រាប់វីអូឌីនៅថ្ងៃនេះថា ជាបឋមនេះ អាជ្ញាធរថៃនឹងអនុញ្ញាតឱ្យប្រជាពលរដ្ឋខ្មែរឆ្លងដែនចូលទៅប្រទេសថៃបាន សម្រាប់តែអ្នកដែលមានលិខិតឆ្លងដែន (Passport) និងបណ្ណឆ្លងដែន (Border Pass) ដែលមានបណ្ណចាក់វ៉ាក់សាំងត្រឹមត្រូវតែប៉ុណ្ណោះ។ ការសម្រេចនេះបានធ្វើឡើងបន្ទាប់ពីមានកិច្ចប្រជុំរវាងអាជ្ញាធរខេត្តស្រះកែវ ប្រទេសថៃ និងអាជ្ញាធរខេត្តបន្ទាយមានជ័យ កាលពីថ្ងៃទី២៨ ខែមេសា។
ច្រកទ្វារអន្តរជាតិប៉ោយប៉ែតត្រូវបានបិទដំណើរការអស់រយៈពេលជាង២ឆ្នាំ ដោយទុកតែការចរាចរទំនិញចេញ-ចូលរវាងថៃនិងកម្ពុជាតែប៉ុណ្ណោះ បន្ទាប់ពីការរាតត្បាតជំងឺកូវីដ-១៩។
មជ្ឈមណ្ឌលគ្រប់គ្រងស្ថានការណ៍ជំងឺកូវីដ-១៩ (CCSA) របស់ប្រទេសថៃ នៅថ្ងៃសុក្រសប្ដាហ៍មុន បានសម្រេចអនុញ្ញាតឱ្យអ្នកទេសចរបរទេសដែលបានចាក់វ៉ាក់សាំងពេញលេញចូលប្រទេសរបស់ខ្លួនឡើងវិញ ដោយមិនចាំបាច់ឆ្លងកាត់ការធ្វើតេស្តរកវីរុសកូវីដ-១៩ឡើយ។
សេចក្ដីសម្រេចនេះត្រូវបានអនុម័តតាមរយៈសំណើដែលដាក់ចេញដោយគណៈកម្មាធិការសិក្សារបស់ក្រសួងសុខភាពសាធារណៈ និងក្រុមការងារត្រួតពិនិត្យជំងឺរាតត្បាត នៅក្នុងកិច្ចប្រជុំមួយរបស់មជ្ឈមណ្ឌល CCSA ដឹកនាំដោយនាយករដ្ឋមន្រ្តីថៃ លោក ប្រាយុទ្ធ ចាន់អូចា ខណៈការអនុវត្តថ្មីនេះនឹងចូលជាធរមាននៅថ្ងៃទី១ ខែឧសភា ខាងមុខ៕
