សហជីពក្នុងក្រុមហ៊ុនល្បែងនាកណ្តាលក្រុងភ្នំពេញបានលើកឡើងថា បុគ្គលិកណាហ្គាវើលដ៍នៅតែរងអំពើហិង្សា និងការគំរាមកំហែងពីសំណាក់កងកម្លាំងអាជ្ញាធរក្រុង ក្នុងពេលពួកគេព្យាយាមតវ៉ាក្បែរក្រុមហ៊ុនដើម្បីស្វែងរកដំណោះស្រាយការងារ។
សេចក្ដីថ្លែងការណ៍របស់សហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កាលពីថ្ងៃទី១ ខែឧសភា ឆ្នាំ២០២២ បានឱ្យដឹងថា ក្រុមកូដករប្រមាណ ១០៤នាក់បានបន្តធ្វើកូដកម្ម ដែលភាគច្រើនសុទ្ធតែជាស្ត្រី ត្រូវបានកងកម្លាំងអាជ្ញាធររាជធានីភ្នំពេញរារាំងមិនឱ្យធ្វើកូដកម្មនៅខាងមុខឬក្បែរក្រុមហ៊ុនណាហ្គាឡើយ ដោយបន្តប្រើរូបភាព ហិង្សា គំរាមកំហែង មួលក្តិចទៅលើក្រុមកូដករទាំងនោះ។
ក្នុងសេចក្ដីថ្លែងការណ៍សរសេរថា៖ «ជាក់ស្តែងថ្ងៃនេះ[១ឧសភា] ជាថ្ងៃប្រារព្ធទិវាពលកម្មអន្តរជាតិ តែក្រុមកូដករដែលជាស្ត្រីចំនួន ៤នាក់បែរជារងនៅអំពើហិង្សា ពីសំណាក់កងកម្លាំងអាជ្ញាធរ រហូតដល់មានរបួសស្នាមដោយការ ធាក់រហូតហើមជើង រុញច្រាន និងច្របាច់ដៃរហូតដល់ជាំជាដើម»។
អ្នកស្រី ណូន ស្រីណែត ជាកូដករម្នាក់ក្នុងចំណោមបួននាក់ដែលអះអាងថា បានទទួលរងអំពើហិង្សាពីអាជ្ញាធរនៅចំថ្ងៃទិវាពលកម្មអន្តរជាតិ ១ឧសភា លើកឡើងថា អ្នកទទួលរងរបួសមានច្រើន ដោយគ្រាន់តែនៅក្នុងចំណោមនោះ មានអ្នករងរបួសធ្ងន់តែបួនទៅប្រាំនាក់ប៉ុណ្ណោះ។
អ្នកស្រី ណូន ស្រីណែត និយាយថា៖ «ខ្ញុំឈរនៅមាត់ទ្វារឡានដោយសារតែគ្នាយើងអត់ទាន់ឡើងឡានអស់ កំពុងតែដើរឡើងឡាន អាជ្ញាធររុញទៅរុញមក ពេលយើងអត់ឡើងផុតគាត់ចាប់គ្រវាត់យើងចេញ»។
អ្នកស្រីអះអាងថា គាត់ត្រូវបានដួលលើថ្នល់ទាំងកម្រោល ប៉ុន្តែអាជ្ញាធរម្នាក់ទៀតនិយាយមកកាន់គាត់ថា ធ្វើពុតជាដួលទៅវិញ។
អ្នកស្រីបន្តថា៖ «មូលហេតុដែលខ្ញុំទៅទោះជាដឹងថាគេនឹងចាប់ដាក់ឡានក៏ដោយ គឺចង់បង្ហាញឱ្យដឹងថា ក្រសួងពាក់ព័ន្ធនឹងក្រុមហ៊ុនមិនទាន់ដោះស្រាយវិវាទរវាងខ្ញុំនឹងណាហ្គាទេ»។
អ្នកនាំពាក្យស្នងការដ្ឋានរាជធានីភ្នំពេញ លោក សាន សុខសីហា បានលើកឡើងថា សមត្ថកិច្ចតែងតែណែនាំកូដករតាមសន្តិវិធី តែក្រុមកូដករទៅវិញទេដែលបង្ករូបភាពហិង្សាលើពួកគាត់។
លោកបញ្ជាក់ថា ក្នុងនាមជាអាជ្ញាធរត្រូវរក្សាសន្តិសុខសណ្តាប់ធ្នាប់ជូនប្រជាពលរដ្ឋទូទៅ មិនមែនដើម្បីផលប្រយោជន៍តែមួយក្រុមកូដករនោះទេ។
លោកបានបន្ថែមថា៖ «ប្រសិនបើគាត់មិនអនុវត្តតាមសេចក្តីណែនាំសាលារាជធានីភ្នំពេញ ឬក៏អាជ្ញាធរពាក់ព័ន្ធទេ គឺសមត្ថកិច្ចយើងនៅតែបន្តប្រចាំការនៅទីនោះដើម្បីធ្វើការ ព្រោះជាទូទៅអាជីវករលក់ដូរនៅម្តុំហ្នឹងមានការត្អូញត្អែរខ្លាំងទាក់ទងនឹងការមកជួបជុំខុសច្បាប់ ដែលមិនមានការអនុញ្ញាតត្រឹមត្រូវ បង្កជាការបាត់បង់សណ្តាប់ធ្នាប់ ស្ទះចរាចរណ៍ គឺពិបាកក្នុងការរកស៊ី»។
អ្នកគ្រប់គ្រងកម្មវិធីការងារនៃមជ្ឈមណ្ឌលសម្ព័ន្ធភាពការងារនិងសិទ្ធិមនុស្ស ហៅកាត់ថា សង់ត្រាល់ លោក ឃុន ថារ៉ូ លើកឡើងថា ទង្វើរបស់អាជ្ញាធរទៅលើកូដករណាហ្គាវើលដ៍នេះ បានឆ្លុះបញ្ចាំងពីការអនុវត្តក្រមសីលធម៌របស់ពួកគេមិនមានវិជ្ជាជីវៈ ខណៈកូដករធ្វើកូដកម្មស្របតាមលក្ខន្តិកៈរបស់សហជីព និងស្របច្បាប់ស្ដីពីការងារ។
លោក ឃុន ថារ៉ូ មានប្រសាសន៍ថា៖ «អ៊ីចឹងការបន្តធ្វើទុក្ខបុកម្នេញទៅដល់កម្មករនិយោជិតដល់ថ្នាក់ដឹកនាំសហជីព ការរឹតត្បិតសិទ្ធិមូលដ្ឋាន ការប្រើប្រាស់ទម្រង់តុលាការចោទប្រកាន់ ការគំរាមកំហែង ការដាក់សម្ពាធគ្រប់ទម្រង់រូបភាព គឺវាឆ្លុះបញ្ចាំងអំពីការថយក្រោយនៃការអនុវត្តសិទ្ធិការងារនៅក្នុងប្រទេសកម្ពុជា»។
លោកបន្តថា ក្នុងរយៈពេលពីរឆ្នាំចុងក្រោយបន្ទាប់ពីមានការផ្ទុះកូវីដ-១៩ កម្មករនិយោជិតគ្រប់វិស័យទទួលរងនូវផលប៉ះពាល់ខ្លាំងទាក់ទងទៅនឹងបញ្ហាសេដ្ឋកិច្ច ស្របពេលការអនុវត្តសិទ្ធិស្របច្បាប់របស់ពួកគាត់ ក៏មិនមានភាពទូលំទូលាយនោះដែរ។
សេចក្តីប្រកាសព័ត៌មានរបស់ក្រសួងការងារ និងបណ្តុះបណ្តាលវិជ្ជាជីវៈកាលពីថ្ងៃទី២២ ខែមេសា បានកំណត់កិច្ចប្រជុំដោះស្រាយវិវាទការងារនៅក្រុមហ៊ុនកាស៊ីណូណាហ្គាវើលដ៍ជាថ្មីទៀត នៅរសៀលថ្ងៃពុធ ទី៤ ខែឧសភា បន្ទាប់ពីកិច្ចប្រជុំលើកទី៨ កាលពីថ្ងៃទី២២ ខែមេសា នៅមិនទាន់ឈានដល់ចំណុចព្រមព្រៀងគ្នានៅឡើយ។
នៅក្នុងកិច្ចប្រជុំដោះស្រាយវិវាទការងារពេលនោះ ភាគីបុគ្គលិកក្រុមហ៊ុនណាហ្គាវើលដ៍ក៏បានស្នើតាមរយៈក្រសួងការងារ ឱ្យតុលាការទម្លាក់ចោលការចោទប្រកាន់មកលើតំណាងកម្មករនិយោជិតទាំងអស់ ព្រមទាំងស្នើសុំបើកការិយាល័យសហជីពឡើងវិញ និងស្នើសុំសម្ភារផ្សេងៗទៀតមកប្រើប្រាស់ ដើម្បីធ្វើការងារឡើងវិញ។ បន្ថែមពីនេះ ពួកគេក៏ស្នើសុំឱ្យក្រុមហ៊ុនផ្តល់ជម្រើសឱ្យមកខាងភាគីកម្មករនិយោជិត ដើម្បីឱ្យមានភាពយុត្តិធម៌ស្មើៗគ្នា។
វិវាទការងារនៅក្នុងក្រុមហ៊ុនកាស៊ីណូណាហ្គាវើលដ៍ បានកើតឡើងជាងមួយឆ្នាំមកហើយ បន្ទាប់ពីភាគីក្រុមហ៊ុនបានបញ្ឈប់បុគ្គលិកចំនួន១ ៣២៩នាក់ ក្នុងចំណោមបុគ្គលិកសរុបជាង ៨ ០០០នាក់ ពីការងារ ដោយលើកហេតុផលថា ក្រុមហ៊ុនជួបវិបត្តិហិរញ្ញវត្ថុដោយសារជំងឺកូវីដ-១៩។ ក៏ប៉ុន្តែតំណាងសហជីពប្រចាំនៅក្នុងក្រុមហ៊ុនកាស៊ីណូនេះយល់ថា ផែនការបញ្ឈប់បុគ្គលិកទ្រង់ទ្រាយធំនេះ គឺជាការគាស់រំលើងសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនកាស៊ីណូណាហ្គាវើលដ៍ ចេញពីក្រុមហ៊ុនឱ្យអស់ ត្បិតបុគ្គលិកដែលបញ្ឈប់ភាគច្រើនលើសលប់ គឺជាសមាជិក និងថ្នាក់ដឹកនាំសហជីព៕