ប្រមុខរដ្ឋាភិបាលបង្ហាញការប្ដេជ្ញាចិត្តក្នុងការគាំពារសិទ្ធិសេរីភាពនៃការបញ្ចេញមតិ និងសេរីភាពខាងសារព័ត៌មាន នៅក្នុងក្របខណ្ឌប្រទេសប្រជាធិបតេយ្យ សេរីពហុបក្ស ខណៈរដ្ឋាភិបាលបានផ្ដល់អាទិភាពជាចម្បងដល់វិស័យសារព័ត៌មានឱ្យចូលរួមចំណែកក្នុងការលើកស្ទួយប្រជាធិបតេយ្យ ប្រយុទ្ធប្រឆាំងអំពើពុករលួយ និងកែទម្រង់ប្រព័ន្ធយុត្តិធម៌ រួមនឹងវិស័យមួយចំនួនទៀត។
ការប្ដេជ្ញាចិត្តនេះបានធ្វើឡើងក្នុងឱកាសកម្ពុជាប្រារព្ធទិវាសេរីភាពសារព័ត៌មានសកលលោក លើកទី២៩ ថ្ងៃទី៣ ខែឧសភា ឆ្នាំ២០២២ ក្រោមប្រធានបទ «សារព័ត៌មានក្នុងសម្ពាធប្រព័ន្ធឌីជីថល»។
នៅក្នុងសារលិខិតរបស់លោកនាយករដ្ឋមន្ត្រី ហ៊ុន សែន ក្នុងទិវាសេរីភាពសារព័ត៌មានពិភពលោក បានលើកឡើងថា រដ្ឋាភិបាលបានប្ដេជ្ញាចិត្តក្នុងការគាំពារសិទ្ធិ សេរីភាពនៃការបញ្ចេញមតិ សេរីភាពខាងសារព័ត៌មាន និងលើកកម្ពស់ភាពជាដៃគូរវាងរដ្ឋាភិបាល ជាមួយស្ថាប័នសារព័ត៌មាន ដែលមិនអាចខ្វះបាននៅក្នុងក្របខណ្ឌប្រទេសប្រជាធិបតេយ្យ សេរីពហុបក្ស។
លោកបន្តថា រដ្ឋាភិបាលបានផ្ដល់អាទិភាពជាចម្បងនៅក្នុងកម្មវិធីនយោបាយរបស់ខ្លួនដល់វិស័យសារព័ត៌មាន ឱ្យចូលរួមចំណែកជាមួយរដ្ឋាភិបាលក្នុងការប្រយុទ្ធប្រឆាំងអំពើពុករលួយ ការកែទម្រង់ច្បាប់និងប្រព័ន្ធយុត្តិធម៌ ការកែទម្រង់រដ្ឋបាលសាធារណៈ ការលើកស្ទួយលទ្ធិប្រជាធិបតេយ្យ និងការគោរពសិទ្ធិមនុស្ស ដើម្បីកសាងសង្គមមួយប្រកបដោយភាពយុត្តិធម៌ សុខសន្តិភាព និងការអភិវឌ្ឍយូរអង្វែង។
ជាមួយគ្នានេះដែរ លោកនាយករដ្ឋមន្ត្រី ហ៊ុន សែន ក៏បានអំពាវនាវដល់អ្នកសារព័ត៌មានជាតិ និងអន្តរជាតិ យកចិត្តទុកដាក់អនុវត្តភារកិច្ចឱ្យបានត្រឹមត្រូវតាមវិជ្ជាជីវៈ និងអភិវឌ្ឍន៍សមត្ថភាពរបស់ខ្លួនបន្ថែមទៀត ទាំងផ្នែកជំនាញបច្ចេកទេស ការផលិតព័ត៌មាន និងផ្សព្វផ្សាយព័ត៌មាន ដើម្បីបង្កើនជំនឿទុកចិត្តដល់សាធារណជន និងឆ្លើយតបទៅនឹងការវិវត្តនៃបច្ចេកវិទ្យាប្រព័ន្ធផ្សព្វផ្សាយព័ត៌មានឌីជីថលផងដែរ។
បើតាមលោកនាយករដ្ឋមន្ត្រី ស្ថាប័នព័ត៌មានបច្ចុប្បន្នកំពុងប្រឈមជាមួយបញ្ហាជាច្រើន ដូចជា វិបត្តិសេដ្ឋកិច្ចសកល និងការអភិវឌ្ឍបច្ចេកវិទ្យាប្រព័ន្ធផ្សព្វផ្សាយឌីជីថលនៃបដិវត្តន៍ឧស្សាហកម្មជំនាន់ទី៤ ដែលធ្វើឱ្យស្ថាប័នសារព័ត៌មាន និងអ្នកសារព័ត៌មានប្រឈមនឹងការប្រកួតប្រជែងទីផ្សារជាមួយបណ្ដាញទំនាក់ទំនងសង្គម និងប្រព័ន្ធផ្សព្វផ្សាយអនឡាញ។
ស្របពេលទិវាសេរីភាពសារព័ត៌មានសកលលោកនេះផងដែរ ក្រុមអង្គការ-សមាគមសារព័ត៌មាន និងអង្គការសមាគមមិនមែនរដ្ឋាភិបាលដែលធ្វើការងារលើកកម្ពស់សិទ្ធិទទួលព័ត៌មាន និងសេរីភាពសារព័ត៌មានជាង២០ស្ថាប័ន បានចេញសេចក្តីថ្លែងការណ៍រួម ដោយទទូចដល់រដ្ឋាភិបាលចាត់វិធានការឱ្យមានប្រសិទ្ធភាព ដើម្បីដោះស្រាយបញ្ហាប្រឈមរបស់អ្នកសារព័ត៌មាន និងបញ្ចប់និទណ្ឌភាពចំពោះរាល់បទឧក្រិដ្ឋទាំងឡាយប្រឆាំងនឹងអ្នកសារព័ត៌មាន។
ក្រៅពីនោះ ពួកគេក៏បានស្នើឱ្យផ្ដល់សុពលភាពនូវអាជ្ញាបណ្ណព័ត៌មានឡើងវិញដល់បណ្ដាញសារព័ត៌មានមួយចំនួនដែលក្រសួងព័ត៌មានបានដកកាលពីឆ្នាំ២០១៧ មកដល់បច្ចុប្បន្ន ដើម្បីឱ្យពួកគេអាចបន្តចូលរួមក្នុងសកម្មភាពផ្តល់ព័ត៌មានជូនពលរដ្ឋបន្តទៀត៕
