ព្រះសង្ឃ និងប្រជាសហគមន៍ លើកឡើងថា ព្រៃឈើនៅសហគមន៍ «ឧត្ដមស្រែខ្ពស់» ហៅ «ព្រៃមេត្តាធម្មជាតិ» ស្ថិតនៅឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ បានរងនូវការកាប់បំផ្លាញស្ទើររាល់ថ្ងៃ ដោយគ្មានការចូលរួមទប់ស្កាត់ពីអាជ្ញាធរពាក់ព័ន្ធឡើយ។
ព្រះតេជគុណ ព្រំ សុជាតិ គង់នៅវត្តមេត្តាធម្មជាតិ មានសង្ឃដីកាប្រាប់ វីអូឌី នៅថ្ងៃស្រុកនេះថា ព្រៃសហគមន៍នៅជុំវិញវត្តមេត្តាធម្មជាតិ ស្ថិតក្នុងភូមិពោធិ៍មាស ឃុំត្រពាំងជោរ ត្រូវបានជនល្មើសចូលកាប់និងដឹកចេញជារៀងរាល់ថ្ងៃ ដោយគ្មានការខ្លាចញញើតប្រជាសហគមន៍ចុះទៅហាមឃាត់ឡើយ។
ព្រះអង្គអះអាងថា ក្នុង១ថ្ងៃៗ ជនល្មើសចូលកាប់និងដឹកជញ្ជូនឈើចេញពីព្រៃសហគមន៍នេះមិនក្រោម ១០គោយន្តនោះទេ។
ព្រះអង្គមានសង្ឃដីកាបន្ថែមថា៖ «សត្វព្រៃ វាធ្លាប់តែលោតតោង វាទំ ដើររកចំណីរៀងរាល់ថ្ងៃ ដល់ពេលញោមៗមកកាប់ព្រៃផ្ដួលរំលំអស់ ឥលូវសត្វវាមិនដឹងរត់ទៅពួននៅណា រស់នៅណា? បើដើមឈើដួលរលំអស់ហើយ។ អ្នកកាប់ព្រៃហ្នឹងមិនដឹងជាមកពីណា មកទាំងហ្វូងៗមកកាប់។ អ្នកខ្លះយើងលើកដៃសំពះគាត់កុំឱ្យកាប់ គាត់ក៏គេចទៅវិញទៅ។ អ្នកខ្លះយើងអង្វរហើយ គេនៅតែផ្គើននិយាយប្រកែកប្រណាំង ប្រទូស្តរាយជាមួយសហគមន៍ក៏មាន»។
សមាជិកសហគមន៍ឧត្ដមស្រែខ្ពស់ លោក ខន សារិទ្ធិ មានប្រសាសន៍ថា អ្នកដែលចូលកាប់ឈើក្នុងព្រៃសហគមន៍នោះ គឺជាប្រជាពលរដ្ឋនៅក្នុងឃុំត្រពាំងជោរនោះ។ លោកថា ពលរដ្ឋចាប់ផ្ដើមចូលទៅកាប់ព្រៃសហគមន៍ ក្រោយពីសហគមន៍មួយនេះមានជម្លោះដីធ្លីជាមួយគ្រួសារកងទ័ពនៃបញ្ជាការដ្ឋានរថក្រោះកងទ័ពជើងគោក ដែលទទួលបានដីសម្បទានសង្គមកិច្ចពីរដ្ឋាភិបាលនៅតំបន់នោះ។
សមាជិកសហគមន៍រូបនេះបានដាក់ការសង្ស័យថា ករណីពលរដ្ឋហ៊ានចូលកាប់ឈើនៅក្នុងព្រៃសហគមន៍នេះ អាចជាការញុះញង់ពីសំណាក់ទាហាននៅទីនោះ។
លោកបន្ថែមថា៖ «អ្នកទៅកាប់ហ្នឹង គឺប្រជាពលរដ្ឋនៅក្បែរដីព្រៃសហគមន៍ហ្នឹង។ គាត់ថា ទាហានជាអ្នកឱ្យកាប់។ នៅខាងគេ គេអូសទាញកូនចៅគេទៅកាប់អ៊ីចឹងទៅ។ ហើយអ្នកមួយចំនួនទៀតមើលគេកាប់បានអ៊ីចឹង ក៏ចូលទៅកាប់ជាមួយគេដែរទៅ។ ឥលូវកាប់កន្លែងដែលមិនមែនជាដីទាហាន គឺកន្លែងដីវត្តហ្នឹងក៏កាប់ដែរ ហើយបង់លុយឱ្យទាហានមួយគោយន្ត ២ម៉ឺនរៀល ទៅ៣ម៉ឺនរៀល»។
ប្រធានមន្ទីរបរិស្ថានខេត្តកំពង់ស្ពឺ លោក ឱម ម៉ាកធារី មានប្រសាសន៍ថា ព្រៃឈើដែលកំពុងរងការកាប់នោះជាដីរបស់គ្រួសារកងទ័ពនៃបញ្ជាការដ្ឋានរថក្រោះកងទ័ពជើងគោក ដែលទើបទទួលបានដីសម្បទានសង្គមកិច្ចពីរដ្ឋាភិបាល។ តែយ៉ាងណា លោកបង្វែរឱ្យទៅសួរខាងទាហានប្រចាំការនៅតំបន់នោះវិញ។
ប្រធានមន្ទីរបរិស្ថានរូបនេះបានចោទប្រសហគមន៍ដែលតវ៉ានិងការពារព្រៃសហគមន៍នោះថាជាក្រុមប្រឆាំង។
លោកបន្ថែមថា៖ «កន្លែងរបស់ទ័ព គេមាន ស.ជ.ណ របស់គេ បងសួរទៅខាងទ័ពនៅទីនោះទៅ ព្រោះនៅទីនោះមានពួកអាក្រុមប្រឆាំង វាចេះតែចុះផ្សាយតែពាសទេ»។
មេភូមិពោធិ៍មាស លោក ភោគ ជុំ បានទទួលស្គាល់ថា ពិតជាមានការកាប់និងដឹកឈើចេញពីព្រៃនៅក្នុងតំបន់នោះមែន ប៉ុន្តែឈើនោះ ពលរដ្ឋកាប់និងដឹកចេញពីដីរបស់ទាហានដែលទទួលបានដីសម្បទានសង្គមកិច្ចពីរដ្ឋាភិបាលប៉ុណ្ណោះ។
កាលពីថ្ងៃទី២០ ខែសីហា ឆ្នាំ២០២១ រដ្ឋាភិបាលបានចេញអនុក្រឹត្យមួយកាត់ដីទំហំជាង២៦០ហិកតា (២៦២,២៤ហិកតា) ពីដែនជម្រកសត្វព្រៃភ្នំឱរ៉ាល់ ស្ថិតភូមិសាស្ត្រភូមិពោធិ៍មាស ឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ ដើម្បីបែងចែកទៅឱ្យគ្រួសារកងទ័ពនៃបញ្ជាការដ្ឋានរថក្រោះកងទ័ពជើងគោក និងពលរដ្ឋចំនួន៤១គ្រួសារ សម្រាប់ធ្វើលំនៅឋាន និងបង្កបង្កើនផល។
ចាប់តាំពីចុងឆ្នាំ២០២១ អ្នកភូមិរាប់រយនាក់នៅឃុំត្រពាំងជោរនោះ បាននាំគ្នាតវ៉ាប្រឆាំងក្រុមទាហាននៃបញ្ជាការដ្ឋានរថក្រោះកងទ័ពជើងគោក មិនឱ្យកាប់បំផ្លាញព្រៃសហគមន៍ «ឧត្ដមស្រែខ្ពស់» ហៅ «ព្រៃមេត្តាធម្មជាតិ» ដែលពួកគេអះអាងថា បានការពារជាង២០ឆ្នាំមកហើយ។
អ្នកភូមិអះអាងថា សហគមន៍ «ឧត្ដមស្រែខ្ពស់» ហៅ «ព្រៃមេត្តាធម្មជាតិ» ពីដើមឡើយមានផ្ទៃដីទំហំជាង២ ០០០ហិកតា ជាតំបន់ព្រៃស្រោង និងមានសត្វជាច្រើនប្រភេទរស់នៅ ប៉ុន្តែក្រោយមកក៏មានក្រុមទាហានបានចូលទៅរំលោភយកជាបន្តបន្ទាប់ ហើយបច្ចុប្បន្នសហគមន៍នេះសល់ដីតិចតួចប៉ុណ្ណោះ ខណៈសត្វព្រៃក៏កំពុងប្រឈមនឹងការបាត់បង់៕
