ប្រធានគណបក្សសង្គ្រោះជាតិដែលត្រូវបានតុលាការរំលាយ លោក កឹម សុខា មានគម្រោងទៅគោរពវិញ្ញាណក្ខន្ធសពលោក ហ៊ុន ណេង បងប្រុសបង្កើតរបស់លោកនាយករដ្ឋមន្ត្រី ហ៊ុន សែន នៅចុងសប្ដាហ៍នេះ នៅឯខេត្តកំពង់ចាម។
ជំនួយការផ្ទាល់របស់លោក កឹម សុខា គឺលោក មុត ចន្ថា បានប្រាប់ វីអូឌី នៅថ្ងៃសុក្រនេះថា ការអញ្ជើញទៅគោរពវិញ្ញាណក្ខន្ធសពលោក ហ៊ុន ណេង ពីសំណាក់លោក កឹម សុខា នេះ គឺជាការបង្ហាញនូវកាយវិការក្នុងនាមជាខ្មែរដូចគ្នា ដែលចេះជួយចែករំលែកទុក្ខគ្នាទៅវិញទៅមក។
លោកថា៖ «បើតាមខ្ញុំដឹង គាត់ [កឹម សុខា] មានគម្រោងទៅហ្នឹង ហើយការទៅចូលរួមគោរពវិញ្ញាណក្ខន្ធនេះ គឺស្របតាមយើងជាពុទ្ធសាសនិកជន ហើយយើងតែងតែទៅចូលរួមក្នុងការចែករំលែកទុក្ខលំបាក និងមរណទុក្ខជាមួយក្រុមគ្រួសារដែលលោក [ហ៊ុន ណេង] ជាទីស្រឡាញ់ ជាទីគោរពមានព្រហ្មវិហារធម៌ចំពោះពួកគាត់។ ហើយយើងខ្មែរដូចគ្នា យើងគួរសម្ដែងនូវការសោកស្ដាយមរណទុក្ខនូវមរណភាពរបស់ឯកឧត្ដម ហ៊ុន ណេង ដែលគាត់ជាអ្នកនយោបាយខ្មែរម្នាក់ផងដែរ»។
បងប្រុសបង្កើតរបស់លោកនាយករដ្ឋមន្ត្រី ហ៊ុន សែន គឺលោក ហ៊ុន ណេង បានទទួលមរណភាពដោយសារជំងឺគាំងបេះដូង កាលពីរសៀលថ្ងៃទី៥ ខែឧសភា ម្សិលមិញ ក្នុងជន្មាយុ ៧២ឆ្នាំ។ លោក ហ៊ុន ណេង ធ្លាប់ជាសមាជិកអចិន្ត្រៃយ៍រដ្ឋសភា ជាអ្នកតំណាងរាស្ត្រមណ្ឌលកំពង់ចាមនៃគណបក្សប្រជាជនកម្ពុជា និងជាអតីតអភិបាលខេត្តកំពង់ចាម។
សពរបស់លោក ហ៊ុន ណេង ត្រូវតម្កល់ធ្វើបុណ្យនៅឯគេហដ្ឋានរបស់លោក ស្ថិតនៅក្នុងភូមិទី៧ សង្កាត់កំពង់ចាម ក្រុងកំពង់ចាម រួចដង្ហែយកទៅបញ្ចុះនៅវត្តសុវណ្ណគិរីរតនៈភ្នំប្រុស ស្ថិតនៅភូមិត្រពាំងចារ ឃុំក្រឡា ស្រុកកំពង់សៀម នៅថ្ងៃទី៩ ខែឧសភា។
នៅប៉ុន្មានម៉ោងក្រោយពីការទទួលបានដំណឹងពីមរណភាពនេះ លោក កឹម សុខា ប្រធានគណបក្សសង្គ្រោះជាតិដែលត្រូវបានតុលាការរំលាយ បានសរសេរសារចូលរួមរំលែកទុក្ខទៅកាន់លោកនាយករដ្ឋមន្ត្រី ហ៊ុន សែន តាមបណ្ដាញសង្គម ហើយលោកនាយករដ្ឋមន្ត្រីក៏បានសរសេរសារត្រលប់ទៅវិញ ដោយបានអរគុណចំពោះការចូលរួមរំលែកទុក្ខរបស់លោក កឹម សុខា។
សាស្ត្រាចារ្យផ្នែកវិទ្យាសាស្ត្រនយោបាយ លោក ឯម សុវណ្ណរ៉ា បានលើកឡើងថា ការអញ្ជើញទៅគោរពវិញ្ញាណក្ខន្ធសពលោក ហ៊ុន ណេង របស់លោក កឹម សុខា នេះ នឹងមិនមានឥទ្ធិពលដល់ការចរចាស្វែងរកដំណោះស្រាយនយោបាយនៅកម្ពុជានោះទេ។
លោកថា៖ «បើយើងមើលសាររំលែកទុក្ខរបស់លោក កឹម សុខា ហើយការឆ្លើយតបរបស់លោកនាយករដ្ឋមន្ត្រីមកលោក កឹម សុខា ហ្នឹង បើយើងមើលទៅ វាគ្រាន់តែជាការរាប់អានក្នុងនាមជាពលរដ្ឋខ្មែរ ជាទម្លាប់ជនជាតិខ្មែរ នៅពេលដែលមាននរណាម្នាក់មានទុក្ខលំបាក ឬជួបទុក្ខ នៅក្នុងសាច់ញាតិដែលទទួលមរណភាពអ៊ីចឹង គឺជាការរំលែកទុក្ខធម្មតាទេ វាអត់មានអ្វីប្លែកទេ ប៉ុន្តែវាបង្កប់នូវភាពរាប់អានគ្នាជាពលរដ្ឋខ្មែរដែលជាទម្លាប់មួយល្អដែរ»។
យ៉ាងណា លោកថា៖ «នៅក្នុងរបត់នយោបាយប្រឈមគ្នារវាងអ្នកនយោបាយទាំងពីរហ្នឹង មួយគណបក្សកាន់អំណាច មួយគណបក្សក្រៅរដ្ឋាភិបាល យើងពុំទាន់ឃើញមានសញ្ញាវិជ្ជមានណាមួយដែលជំរុញឱ្យមានភាពធូរស្រាលនៅក្នុងភាពជាប់គាំងនយោបាយរបស់កម្ពុជានៅឡើយទេ»។
កាលពីថ្ងៃទី៥ ខែឧសភា ឆ្នាំ២០២០ លោក កឹម សុខា ក៏បានអញ្ជើញទៅគោរពវិញ្ញាណក្ខន្ធមហាឧបាសិកា ប៊ុន ស៊ាងលី ម្ដាយបង្កើតរបស់លោកស្រី ប៊ុន រ៉ានី និងជាម្ដាយក្មេករបស់លោកនាយករដ្ឋមន្ត្រី ហ៊ុន សែន ផងដែរ។
នៅក្នុងឱកាសនោះ លោក ហ៊ុន សែន និងលោក កឹម សុខា បានឆ្លៀតជជែកគ្នារយៈពេលជិត១ម៉ោង ខណៈអ្នកវិភាគនយោបាយមួយចំនួនបានមើលឃើញថា កិច្ចសន្ទនានៅពេលនោះទំនងអាចឈានទៅដោះស្រាយការជាប់គាំងនយោបាយ ឬបញ្ចប់ជម្លោះនយោបាយរវាងបក្សកាន់អំណាច និងបក្សប្រឆាំង។ ក៏ប៉ុន្តែរហូតមកដល់ពេលនេះ វិបត្តិនយោបាយរវាងគណបក្សទាំងពីរនៅតែបន្តកើតមាន៕