សេតវិមានបានឱ្យដឹងនៅថ្ងៃព្រហស្បតិ៍ម្សិលមិញថា សហរដ្ឋអាមេរិកនឹងធានាក្នុងការដោះស្រាយរាល់ទុកកង្វល់ដែលពាក់ព័ន្ធនឹងបញ្ហាសន្តិសុខសម្រាប់ស៊ុយអែត និងហ្វាំងឡង់ ក្នុងអំឡុងពេលដែលប្រទេសទាំង២នេះដាក់ពាក្យស្នើសុំចូលជាសមាជិកអង្គការណាតូ (NATO) និងមុនពេលដែលពួកគេត្រូវបានទទួលយកចូលក្នុងសម្ព័ន្ធមួយនេះផងដែរ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ការធានានេះបានធ្វើឡើងបន្ទាប់ពីប្រទេសស៊ុយអែត និងហ្វាំងឡង់ បានលើកឡើងជាការព្រួយបារម្ភទាក់ទងនឹងការដាក់សំណើសមាជិកភាពទៅសម្ព័ន្ធយោធាណាតូថា ពួកគេអាចនឹងងាយរងនូវការគំរាមកំហែងពីរុស្ស៊ី ក្នុងអំឡុងពេលដំណើរការដាក់ពាក្យស្នើសុំ ដែលអាចនឹងចំណាយរយៈពេលរហូតដល់ទៅមួយឆ្នាំក្នុងការទទួលបានការអនុម័តដោយសមាជិកណាតូទាំង៣០។
ទាក់ទិននឹងករណីនេះ អ្នកនាំពាក្យសេតវិមាន លោកស្រី Jen Psaki បានថ្លែងប្រាប់សន្និសីទសារព័ត៌មានមួយថា៖ «យើងជឿជាក់ថា យើងអាចស្វែងរកមធ្យោបាយ ដើម្បីដោះស្រាយរាល់កង្វល់ដែលប្រទេសទាំងពីរនេះ [ស៊ុយអែត ហ្វាំងឡង់] អាចនឹងជួបប្រទះក្នុងអំឡុងរយៈពេលនៃការដាក់ពាក្យស្នើសុំចូលជាសមាជិកភាពរបស់អង្គការណាតូ និងការចូលជាសមាជិកផ្លូវការនៃសម្ព័ន្ធមួយនេះ»។
គួរបញ្ជាក់ថា ប្រទេសស៊ុយអែត និងហ្វាំងឡង់ ត្រូវបានរំពឹងថានឹងធ្វើការសម្រេចចិត្តជាផ្លូវការលើការដាក់ពាក្យស្នើសុំចូលរួមជាមួយអង្គការណាតូក្នុងខែនេះ។
ទោះជាយ៉ាងណា រដ្ឋមន្ត្រីការពារជាតិស៊ុយអែតធ្លាប់បានលើកឡើងឱ្យដឹងកាលពីខែមុនថា ការដាក់ពាក្យស្នើសុំចូលជាសមាជិកភាពរបស់ខ្លួននេះ អាចនឹងបង្កឱ្យមានការឆ្លើយតបជាច្រើនពីប្រទេសរុស្ស៊ី ក្នុងគោលបំណងដើម្បីបំផ្លាញសន្តិសុខរបស់ប្រទេសស៊ុយអែត៕