ប្រធានគណបក្សសង្រ្គោះជាតិដែលតុលាការរំលាយ លោក កឹម សុខា បានជួបពិភាក្សាជាមួយប្រធានគណបក្សប្រជាជនកម្ពុជា លោក ហ៊ុន សែន ជាច្រើនម៉ោង ក្នុងឱកាសមេបក្សប្រឆាំងរូបនេះបានដឹកនាំគណៈប្រតិភូចូលរួមគោរពវិញ្ញាណក្ខន្ធសពលោក ហ៊ុន ណេង ដែលជាបងប្រុសបង្កើតនាយករដ្ឋមន្ត្រី។
សហមេធាវីមួយរូបរបស់លោក កឹម សុខា គឺអ្នកស្រី ម៉េង សុភារី កាលពីម្សិលមិញបានឱ្យដឹងលើគណនីហ្វេសប៊ុកផ្ទាល់ខ្លួនថា ប្រធានគណបក្សប្រឆាំងរូបនេះ និងសហការី នឹងចូលរួមគោរពវិញ្ញាណក្ខន្ធសពលោក ហ៊ុន ណេង នៅគេហដ្ឋានរបស់គាត់ នាក្រុងកំពង់ចាម នៅថ្ងៃព្រឹកទី៨ ខែឧសភា ឆ្នាំ២០២២។
វីអូឌី នៅពុំទាន់អាចសុំការឆ្លើយតបពីសហមេធាវី អ្នកស្រី ម៉េង សុភារី និងមនុស្សស្និទ្ធ លោក កឹម សុខា ដែលមានវត្តមានក្នុងឱកាសចូលរួមគោរពវិញ្ញាណក្ខន្ធសពបងប្រុសនាយករដ្ឋមន្ត្រី រួមមានលោក មុត ចន្ថា លោក មាជ សុវណ្ណារ៉ា និងលោក យឹម ស៊ីណន បាននៅឡើយទេ។ ប៉ុន្តែបើតាមរូបភាពជាច្រើនសន្លឹកត្រូវបានផ្សព្វផ្សាយលើបណ្តាញសង្គម បង្ហាញពីកិច្ចពិភាក្សាដ៏ផ្អែមល្ហែមរវាងលោកនាយករដ្ឋមន្ត្រី ហ៊ុន សែន និងជាប្រធានគណបក្សប្រជាជនកម្ពុជា ជាមួយប្រធានគណបក្សសង្រ្គោះជាតិ លោក កឹម សុខា ក្នុងទិដ្ឋភាពស្និទ្ធស្នាល។
សារព័ត៌មានស្និទ្ធរដ្ឋាភិបាល Fresh News បានចុះផ្សាយនៅថ្ងៃទី៨ ខែឧសភានេះថា ឥស្សរជននយោបាយទាំងពីររូប បានចំណាយពេលជួបពិភាក្សាគ្នាជាពិសេស អស់រយៈពេល ៤ម៉ោង ដោយយកផ្លែឈើ និងនំនេក ជាអាហារថ្ងៃត្រង់ថែមទៀតផង ប៉ុន្តែសារព័ត៌មានដដែលនេះក៏មិនបានបង្ហាញពីលទ្ធផលនៃកិច្ចពិភាក្សានោះដែរ។
ជំនួយការផ្ទាល់របស់លោក កឹម សុខា គឺលោក មុត ចន្ថា បានប្រាប់ វីអូឌី កាលពីថ្ងៃសុក្រសប្តាហ៍មុនថា ការអញ្ជើញទៅគោរពវិញ្ញាណក្ខន្ធសពលោក ហ៊ុន ណេង ពីសំណាក់លោក កឹម សុខា គឺជាការបង្ហាញនូវកាយវិការក្នុងនាមជាខ្មែរដូចគ្នា ដែលចេះជួយចែករំលែកទុក្ខសោកគ្នាទៅវិញទៅមក។
បងប្រុសបង្កើតរបស់លោកនាយករដ្ឋមន្ត្រី ហ៊ុន សែន គឺលោក ហ៊ុន ណេង បានទទួលមរណភាពដោយសារជំងឺគាំងបេះដូង កាលពីរសៀលថ្ងៃទី៥ ខែឧសភា ក្នុងជន្មាយុ ៧២ឆ្នាំ។ លោក ហ៊ុន ណេង ធ្លាប់ជាសមាជិកអចិន្ត្រៃយ៍រដ្ឋសភា ជាអ្នកតំណាងរាស្ត្រមណ្ឌលខេត្តកំពង់ចាមគណបក្សប្រជាជនកម្ពុជា និងជាអតីតអភិបាលខេត្តកំពង់ចាមផងដែរ។
សពរបស់លោក ហ៊ុន ណេង ត្រូវតម្កល់ធ្វើបុណ្យនៅឯគេហដ្ឋានរបស់លោក ស្ថិតនៅក្នុងភូមិទី៧ សង្កាត់កំពង់ចាម ក្រុងកំពង់ចាម រួចដង្ហែយកទៅបញ្ចុះនៅវត្តសុវណ្ណគិរីរតនៈភ្នំប្រុស ស្ថិតនៅភូមិត្រពាំងចារ ឃុំក្រឡា ស្រុកកំពង់សៀម នៅថ្ងៃទី៩ ខែឧសភា។
នៅប៉ុន្មានម៉ោងក្រោយពីការទទួលបានដំណឹងពីមរណភាពនេះ លោក កឹម សុខា ក៏បានសរសេរសារចូលរួមរំលែកទុក្ខទៅកាន់លោកនាយករដ្ឋមន្ត្រី ហ៊ុន សែន និងគ្រួសារ ហើយលោកនាយករដ្ឋមន្ត្រីក៏បានសរសេរសារត្រលប់ទៅវិញ ដោយបានអរគុណចំពោះទឹកចិត្តចូលរួមរំលែកទុក្ខរបស់លោក កឹម សុខា ផងដែរ។
កាលពីថ្ងៃទី៥ ខែឧសភា ឆ្នាំ២០២០ លោក កឹម សុខា ក៏បានអញ្ជើញទៅគោរពវិញ្ញាណក្ខន្ធមហាឧបាសិកា ប៊ុន ស៊ាងលី ម្ដាយបង្កើតរបស់លោកស្រី ប៊ុន រ៉ានី និងជាម្ដាយក្មេករបស់លោកនាយករដ្ឋមន្ត្រី ហ៊ុន សែន ។
ក្នុងឱកាសនោះ លោក ហ៊ុន សែន និងលោក កឹម សុខា បានឆ្លៀតជជែកគ្នារយៈពេលជិត ១ម៉ោង ខណៈអ្នកវិភាគនយោបាយមួយចំនួនបានមើលឃើញថា កិច្ចសន្ទនាពេលនោះទំនងអាចឈានទៅដោះស្រាយការជាប់គាំងនយោបាយ ឬបញ្ចប់ជម្លោះនយោបាយរវាងបក្សកាន់អំណាច និងបក្សប្រឆាំង។ ក៏ប៉ុន្តែរហូតមកដល់ពេលនេះ វិបត្តិនយោបាយរវាងគណបក្សទាំងពីរនៅតែរកដំណោះស្រាយមិនទាន់ឃើញដដែល៕