ការិយាល័យរបស់ប្រធានាធិបតីកូរ៉េខាងត្បូង លោក Yoon Suk-yeol បានឱ្យដឹងនៅថ្ងៃសុក្រនេះថា ប្រទេសរបស់ខ្លួនគ្រោងនឹងផ្ដល់វ៉ាក់សាំងការពារជំងឺកូវីដ-១៩ និងការផ្គត់ផ្គង់ផ្នែកវេជ្ជសាស្រ្តមួយចំនួនផ្សេងទៀតដល់ប្រទេសក្បែរខាងគឺកូរ៉េខាងជើង។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ការប្រកាសពីគម្រោងនៃការផ្ដល់ជូនដោយកូរ៉េខាងត្បូង ត្រូវបានធ្វើឡើងមួយថ្ងៃបន្ទាប់ពីប្រទេសក្បែរខាងរបស់ខ្លួនមួយនេះបានរាយការណ៍ពីការផ្ទុះឡើងនៃជំងឺរាតត្បាតក្នុងទ្រង់ទ្រាយធំ រួមនឹងករណីអ្នកស្លាប់ដោយសារជំងឺនេះ ដែលមិនធ្លាប់កើតឡើងកាលពីពេលកន្លងទៅ។
ទាក់ទិននឹងករណីនេះ អ្នកនាំពាក្យរបស់ប្រធានាធិបតីកូរ៉េខាងត្បូង បានឱ្យដឹងនៅក្នុងសេចក្ដីថ្លែងការណ៍មួយថា៖ «យើងនឹងពិភាក្សាអំពីផែនការលម្អិតបន្ថែមទៀត ទាក់ទិននឹងការផ្ដល់ជំនួយទាំងនេះដល់កូរ៉េខាងជើង»។
គួរបញ្ជាក់ថា យោងតាមរបាយការណ៍របស់អង្គការសុខភាពពិភពលោក គិតចាប់តាំងថ្ងៃទី៣ ខែមករា ឆ្នាំ២០២០ រហូតដល់ថ្ងៃទី១១ ខែឧសភា ឆ្នាំ២០២២នេះ កូរ៉េខាងជើងពុំដែលប្រកាសពីការរកឃើញករណីឆ្លងជំងឺកូវីដ-១៩ឡើយ ដែលករណីនេះបានបង្កឱ្យមានជាការភ្ញាក់ផ្អើលយ៉ាងខ្លាំង ខណៈតួលេខអ្នកឆ្លងជំងឺនេះបច្ចុប្បន្ននៅជុំវិញពិភពលោក បានឈានដល់ចំនួនជាង៥០០លានករណីហើយ៕