លោកនាយករដ្ឋមន្រ្តី ហ៊ុន សែន នឹងដឹកនាំគណៈប្រតិភូជាន់ខ្ពស់ទៅចូលរួមកិច្ចប្រជុំប្រចាំឆ្នាំ២០២២ នៃវេទិកាសេដ្ឋកិច្ចពិភពលោក នៅប្រទេសស្វីស ចាប់ពីថ្ងៃទី២២ ដល់ថ្ងៃទី២៦ ខែឧសភា ឆ្នាំ២០២២។
សេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ ចុះថ្ងៃទី១៩ ខែឧសភា បានឱ្យដឹងថា ការចូលរួមវេទិកាសេដ្ឋកិច្ចពិភពលោក ក្រោមមូលបទ «ការត្រៀមខ្លួនសម្រាប់យុគសម័យក្រោយជំងឺកូវីដ-១៩» នៅទីក្រុងដាវ៉ស-ក្លូស្ទ័រ ប្រទេសស្វីស ពីសំណាក់ប្រមុខរដ្ឋាភិបាលកម្ពុជានេះ ធ្វើឡើងតបតាមការអញ្ជើញរបស់លោកសាស្រ្តាចារ្យ ក្លោស ឆ្វាប់ ស្ថាបនិក និងជាប្រធានប្រតិបត្តិវេទិកាសេដ្ឋកិច្ចពិភពលោក។
ក្រសួងបន្តថា ក្នុងឱកាសចូលរួមក្នុងវេទិកានេះ លោកនាយករដ្ឋមន្រ្តី ហ៊ុន សែន នឹងអញ្ជើញថ្លែងសុន្ទរកថានៅក្នុងពិធីបិទកិច្ចពិភាក្សាជាមួយភាគីពាក់ព័ន្ធ ក្រោមប្រធានបទ «ទស្សនវិស័យយុទ្ធសាស្ត្រលើអាស៊ាន» និងនៅក្នុងកម្មវិធីអាហារការងារថ្ងៃត្រង់ក្រៅផ្លូវការ ជាមួយថ្នាក់ដឹកនាំសេដ្ឋកិច្ចពិភពលោក ក្រោមប្រធានបទ «ការស្ដារសន្តិភាព និងសណ្ដាប់ធ្នាប់ឡើងវិញ»។
ក្រៅពីនោះ លោកនាយករដ្ឋមន្រ្តីក៏រំពឹងថានឹងមានជំនួបពិភាក្សាការងារជាមួយថ្នាក់ដឹកនាំនៃប្រទេសមួយចំនួន ក៏ដូចជាទទួលការចូលជួបសម្តែងការគួរសមពីសំណាក់ឥស្សរជននយោបាយ និងធុរជនពិភពលោកផងដែរ។
ក្រសួងការបរទេសកម្ពុជា បន្តទៀតថា ក្នុងឱកាសស្នាក់នៅប្រទេសស្វីស លោកនាយករដ្ឋមន្ត្រី ហ៊ុន សែន ក៏នឹងអញ្ជើញថ្លែងសុន្ទរកថាបើកក្នុងព្រឹត្តការណ៍ «រាត្រីកម្ពុជា» (CAMBODIA NIGHT) ដែលរៀបចំដោយក្រុមហ៊ុន វើលដ៍ ប្រ៊ីជ គ្រុប (WorldBridge Group) ក្នុងគោលបំណងដើម្បីលើកស្ទួយអំពីធុរកិច្ចបរទេសនៅក្នុងប្រទេសកម្ពុជា។
ក្នុងដំណើរទៅកាន់ប្រទេសស្វីសនោះ លោកនាយករដ្ឋមន្ត្រី ហ៊ុន សែន ក៏គ្រោងនឹងជួបសំណេះសំណាលជាមួយពលរដ្ឋខ្មែរដែលរស់នៅទីនោះ និងបណ្តាប្រទេសអឺរ៉ុបផងដែរ៕