បណ្ដាញទូរទស្សន៍ Al Jazeera របស់ប្រទេសកាតា បានឱ្យដឹងនៅក្នុងសេចក្ដីថ្លែងការណ៍មួយកាលពីថ្ងៃព្រហស្បតិ៍ម្សិលមិញថា ខ្លួននឹងបញ្ជូនសំណុំរឿងបាញ់សម្លាប់អ្នកកាសែតដ៏ល្បីម្នាក់របស់ខ្លួន អ្នកស្រី ហ្ស៊ីរីន អាប៊ូ អាកឡេះ (Shireen Abu Akleh) ទៅកាន់ព្រះរាជអាជ្ញានៃតុលាការព្រហ្មទណ្ឌអន្តរជាតិ (ICC) ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
អ្នកស្រី ស្ហ្ស៊ីរីន អាប៊ូ អាកឡេះ ជាអ្នកកាសែតជនជាតិប៉ាឡេស្ទីន-អាមេរិកាំងមួយរូប ត្រូវបានខ្មាន់កាំភ្លើងមិនស្គាល់អត្តសញ្ញាណបាញ់សម្លាប់ ក្នុងអំឡុងពេលដែលអ្នកស្រីចុះទៅយកព័ត៌មាននៃការវាយឆ្មក់របស់យោធាអ៊ីស្រាអែល នៅតំបន់ West Bank កាលពីថ្ងៃទី១១ ខែឧសភា កន្លងទៅ។
ទាក់ទិននឹងករណីនេះ ក្រុមអ្នកច្បាប់របស់បណ្ដាញទូរទស្សន៍ Al Jazeera រួមជាមួយអ្នកជំនាញផ្នែកច្បាប់អន្តរជាតិនានា នឹងរៀបចំឯកសារទាក់ទងនឹងការស្លាប់របស់អ្នកកាសែតដ៏ល្បីល្បាញរូបនេះ ដើម្បីបញ្ជូនទៅកាន់ ICC។
យោងតាមការស៊ើបអង្កេតមួយរបស់អាជ្ញាធរប៉ាឡេស្ទីន ចេញកាលពីថ្ងៃព្រហស្បតិ៍ បានអះអាងថា អ្នកស្រី ហ្ស៊ីរីន អាប៊ូ អាកឡេះ ត្រូវបានបាញ់សម្លាប់ដោយទាហានអ៊ីស្រាអែល ហើយករណីនេះគឺជាឃាតកម្មដោយចេតនា។
ទោះជាយ៉ាងណា អ៊ីស្រាអែលបានបដិសេធយ៉ាងដាច់អហង្ការនូវការចោទប្រកាន់នេះ និងថាខ្លួនក៏កំពុងតែបន្តការស៊ើបអង្កេតលើករណីស្លាប់របស់អ្នកកាសែតរូបនេះផងដែរ៕
