ប្រជាសហគមន៍រកកិច្ចអន្តរាគមន៍ពីលោក ហ៊ុន ម៉ានី តំណាងរាស្ត្រមណ្ឌលខេត្តកំពង់ស្ពឺ ឱ្យជួយទប់ស្កាត់សកម្មភាពកាប់បំផ្លាញព្រៃឈើក្នុងសហគមន៍ «ឧត្ដមស្រែពស់ និងព្រៃមេត្តាធម្មជាតិ» ពីសំណាក់ក្រុមទាហាន «ង៧០» និងពលរដ្ឋមួយចំនួនស្ថិតនៅឃុំត្រពាំងជោរ ស្រុកឱរ៉ាល់ ក្រោយគ្មានដំណោះស្រាយពីអាជ្ញាធរពាក់ព័ន្ធ។
ការរកកិច្ចអន្តរាគមន៍ពីលោក ហ៊ុន ម៉ានី តំណាងរាស្ត្រមណ្ឌលខេត្តកំពង់ស្ពឺ និងជាកូនប្រុសលោកនាយករដ្ឋមន្ត្រី ហ៊ុន សែន ធ្វើឡើងតាមរយៈការដាក់ញត្តិនៅទីស្នាក់ការរដ្ឋសភាមណ្ឌលខេត្តកំពង់ស្ពឺ របស់ប្រជាសហគមន៍ឃុំត្រពាំងជោរ ប្រហែល៤០នាក់ នៅថ្ងៃសុក្រនេះ។
សមាជិកសហគមន៍ឧត្ដមស្រែពស់ លោក ខន សារិទ្ធិ បានលើកឡើងថា ព្រៃសហគមន៍ឧត្ដមស្រែពស់ និងព្រៃមេត្តាធម្មជាតិ កំពុងរងការកាប់បំផ្លាញ ឈូសឆាយ និងដឹកឈើចេញរាល់ថ្ងៃពីសំណាក់ទាហាន និងប្រជាពលរដ្ឋមួយចំនួនរស់នៅតំបន់នោះ ដោយគ្មានការចុះទប់ស្កាត់ពីអាជ្ញាធរឡើយ។
លោកបន្តថា កន្លងមក ប្រជាសហគមន៍បានដាក់ញត្តិទៅក្រសួងរៀបចំដែនដី រដ្ឋបាលខេត្តកំពង់ស្ពឺ និងស្ថាប័នផ្សេងទៀតឱ្យជួយដោះស្រាយ ប៉ុន្តែរហូតមកដល់ពេលនេះ ពុំទាន់មានស្ថាប័នណាមួយចេញមុខដោះស្រាយឡើយ ទើបអ្នកភូមិនាំគ្នាទៅរកកិច្ចអន្តរាគមន៍បន្ថែមពីតំណាងរាស្ត្រខេត្តកំពង់ស្ពឺបន្ថែមទៀត។
លោកបន្ថែមថា៖ «យើងស្នើសុំឱ្យលោក ហ៊ុន ម៉ានី ជួយ ដោយសារគាត់ជាតំណាងរាស្ត្រខេត្តកំពង់ស្ពឺ និងគាត់ជាកូនសម្ដេច[ហ៊ុន សែន]ផង ក្រែងលោគាត់អាចជួយដោះស្រាយបាន។ ឥលូវនេះ យើងអស់ជម្រើសហើយ យើងបានដើរញត្តិគ្រប់កន្លែងហើយ តែវាចេះតែស្ងាត់ ហើយព្រៃបានរងការកាប់កាន់តែខ្លាំងទៅៗ»។
ក្នុងញត្តិដែលពលរដ្ឋដាក់ទៅទីស្នាក់ការរដ្ឋសភាមណ្ឌលខេត្តកំពង់ស្ពឺ នៅថ្ងៃទី២៧ ខែឧសភានេះ បានលើកឡើងថា កាលពីឆ្នាំ២០០៣ ផ្ទៃដីព្រៃសហគមន៍ឧត្ដមស្រែពស់ មានទំហំ២ ៤៣៣ហិកតា ដោយមានពលរដ្ឋអាស្រ័យផលចំនួន២៥៣គ្រួសារ ហើយនៅចន្លោះឆ្នាំ២០០៨ និងឆ្នាំ២០១៧ អាជ្ញាធរបានកាត់ឆ្វៀលដីព្រៃសហគមន៍នេះទៅឱ្យក្រុមហ៊ុនឯកជន និងក្រុមគ្រួសារទាហាន«ង៧០» អស់ជាច្រើនហិកតា។
ញត្តិដដែលបន្តថា បច្ចុប្បន្ននេះ ដីព្រៃសហគមន៍នេះនៅសល់ប្រហែល៩០០ហិកតាប៉ុណ្ណោះ និងកំពុងទទួលរងការកាប់ទន្ទ្រាន និងដុតបំផ្លាញយ៉ាងធ្ងន់ធ្ងរបំផុត។ ប្រភពដដែលឱ្យដឹងទៀតថា ព្រៃសហគមន៍ទាំង២នេះជាតំបន់ព្រៃស្រោង ជាជម្រកសត្វព្រៃជាច្រើនប្រភេទកំពុងរស់នៅ ជាពិសេសប្រភេទសត្វព្រៃជិតផុតពូជ ខណៈប្រជាពលរដ្ឋនិងព្រះសង្ឃបានការពារព្រៃនេះជាង២០ឆ្នាំទៅហើយ។
ករណីប្រជាសហគមន៍បានស្នើដល់តំណាងរាស្ត្រខេត្តកំពង់ស្ពឺ លោក ហ៊ុន ម៉ានី ជួយអន្តរាគមន៍ជាបន្ទាន់ ដោយជួយទប់ស្កាត់រាល់សកម្មភាពទាំងឡាយណាដែលនាំឱ្យអន្តរាយដល់សម្បត្តិធនធានធម្មជាតិរបស់ប្រទេសជាតិ។
ក្នុងញត្តិសរសេរថា៖ «សកម្មភាពរបស់ពួកយើងក្នុងការការពារព្រៃសហគមន៍ឧត្ដមស្រែពស់ និងព្រៃមេត្តាធម្មជាតិ មិនមែនធ្វើដើម្បីយកជាសម្បត្តិផ្ទាល់ខ្លួនឯងឡើយ គឺសំណើសុំទុកជាសម្បត្តិរួម ជាប្រយោជន៍រួមរបស់ប្រទេសជាតិ ហើយក៏អាចចូលរួមចំណែកជាមួយរដ្ឋាភិបាលក្នុងការទប់ស្កាត់ការកាប់បំផ្លាញធនធានធម្មជាតិរបស់ប្រទេសកម្ពុជា ដែលមានសម្ដេចតេជោ ហ៊ុន សែន ជានាយករដ្ឋមន្ត្រី»។
វីអូឌី មិនអាចសុំការឆ្លើយតបពីតំណាងរាស្ត្រខេត្តកំពង់ស្ពឺ លោក ហ៊ុន ម៉ានី បានទេ នៅថ្ងៃសុក្រនេះ ដោយអ្នកទទួលទូរសព្ទប្រាប់ថា លោកកំពុងជាប់រវល់ប្រជុំ។
កាលពីថ្ងៃទី១៧ ខែឧសភានេះ ប្រជាសហគមន៍បាននាំគ្នាយកញត្តិទៅដាក់នៅរដ្ឋបាលខេត្តកំពង់ស្ពឺ ដើម្បីសុំឱ្យអភិបាលខេត្ត លោក វ៉ី សំណាង ជួយការពារនិងថែរក្សាព្រៃសហគមន៍ទាំង២នេះជាតំបន់ការពារធម្មជាតិ ប៉ុន្តែពលរដ្ឋអះអាងថា រហូតមកដល់ពេលនេះ រដ្ឋបាលខេត្តនៅពុំទាន់មានការឆ្លើយតបណាមួយឡើយ។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត មានប្រសាសន៍ថា ការដែលប្រជាសហគមន៍ស្នើសុំអន្តរាគមន៍ពីតំណាងរាស្ត្រឱ្យជួយដោះស្រាយបញ្ហាព្រៃឈើនេះ ជារឿងត្រឹមត្រូវ។ លោកថា តំណាងរាស្ត្រកើតចេញពីការបោះឆ្នោតរបស់ប្រជាពលរដ្ឋឱ្យធ្វើជាតំណាង ដើម្បីជួយដោះស្រាយនូវកង្វល់របស់ពួកគេ។
មន្ត្រីសិទ្ធិមនុស្សរូបនេះបន្តថា តំណាងរាស្ត្រមានតួនាទីទទួលយកបណ្ដឹងនិងកង្វល់ផ្សេងៗរបស់ប្រជាពលរដ្ឋទៅជជែកជាមួយរដ្ឋាភិបាលនិងស្ថាប័នពាក់ព័ន្ធ ដើម្បីធ្វើការដោះស្រាយ។
លោកបន្ថែមថា៖ «តាមពិតទៅ គាត់ [តំណាងរាស្ត្រ] មិនមានសិទ្ធិអំណាចដោះស្រាយដោយផ្ទាល់ទេ ប៉ុន្តែគាត់មានសិទ្ធិក្នុងការយកព័ត៌មាន ការព្រួយបារម្ភ និងពាក្យបណ្ដឹងរបស់ប្រជាពលរដ្ឋហ្នឹងដាក់ជូនទៅរដ្ឋាភិបាល ជាពិសេសក្រសួងមានសមត្ថកិច្ច ហើយក្រសួងមានសមត្ថកិច្ចទាំងអស់ហ្នឹង ត្រូវទទួលដោះស្រាយនិងធ្វើរបាយការណ៍ទៅតំណាងរាស្ត្រវិញ ដើម្បីឱ្យគាត់ធ្វើការឆ្លើយតបទៅប្រជាពលរដ្ឋវិញ»។
យ៉ាងណា លោកសង្កេតឃើញថា មួយរយៈចុងក្រោយនេះ តំណាងរាស្ត្រហាក់មានភាពអសកម្ម និងមិនសូវអើពើក្នុងការជួយដោះស្រាយនូវកង្វល់របស់ប្រជាពលរដ្ឋឡើយ ជាពិសេសពលរដ្ឋដែលមានជម្លោះដីធ្លី។
កាលពីថ្ងៃទី២០ ខែសីហា ឆ្នាំ២០២១ រដ្ឋាភិបាលបានចេញអនុក្រឹត្យមួយកាត់ដីទំហំជាង២៦០ហិកតា (២៦២,២៤ហិកតា) ពីដែនជម្រកសត្វព្រៃភ្នំឱរ៉ាល់ ស្ថិតភូមិសាស្ត្រភូមិពោធិ៍មាស ឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ ដើម្បីបែងចែកទៅឱ្យគ្រួសារកងទ័ពនៃបញ្ជាការដ្ឋានរថក្រោះកងទ័ពជើងគោក និងពលរដ្ឋចំនួន៤១គ្រួសារ សម្រាប់ធ្វើលំនៅឋាន និងបង្កបង្កើនផល។
ក្រោយទទួលបានដីសម្បទានសង្គមកិច្ចនេះ ក្រុមទាហានបានដាក់គ្រឿងចក្រឈូសឆាយ និងប្រើកម្លាំងកម្មករឱ្យចូលទៅកាប់រុករានព្រៃឈើនៅតំបន់នោះ ប៉ុន្តែត្រូវបានអ្នកភូមិរាប់រយនាក់នៅឃុំត្រពាំងជោរតវ៉ាប្រឆាំង ដោយពួកគេអះអាងថា ព្រៃឈើតំបន់នោះជាព្រៃសហគមន៍ឧត្ដមស្រែពស់ និងព្រៃមេត្តាធម្មជាតិ ដែលពួកគេបានការពារជាង២០ឆ្នាំមកហើយ។
ប្រធានអង្គការប្រឆាំងអំពើពុករលួយ ទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋ (ACNCIPO) លោក ជា ហ៊ាន ដែលចុះពិនិត្យករណីនេះ ប្រាប់ វីអូឌី កាលពីថ្ងៃទី២៤ ខែកុម្ភៈ ថាការកាត់ដីចេញពីដែនជម្រកសត្វព្រៃភ្នំឱរ៉ាល់របស់ក្រសួងបរិស្ថាន ដើម្បីបែងចែកទៅឱ្យគ្រួសារកងទ័ពនៅឃុំត្រពាំងជោរនោះ គឺមានភាពមិនប្រក្រតីជាច្រើន និងបានធ្វើឱ្យប៉ះពាល់ដល់ដីព្រៃសហគមន៍៕