ប្រទេសថៃ បានរាយការណ៍ពីករណីរកឃើញដំបូងនៃ «ជំងឺអុតស្វា (Monkeypox)» លើបុរសម្នាក់ដែលជាអ្នកដំណើរឆ្លងកាត់ (transit) តាមផ្លូវអាកាស ដែលធ្វើដំណើរមកពីទ្វីបអឺរ៉ុប ហើយឈប់នៅអាកាសយានដ្ឋានអន្តរជាតិក្នុងទីក្រុងបាងកក ដើម្បីរង់ចាំជើងហោះហើរបន្តទៅកាន់ប្រទេសអូស្ត្រាលី។ នេះបើតាមការឱ្យដឹងពីនាយកដ្ឋានប្រយុទ្ធប្រឆាំងនឹងជំងឺឆ្លងថៃ ដែលត្រូវបានយកមកចុះផ្សាយដោយសារព័ត៌មានថៃ Thai PBS World។
ទាក់ទិននឹងករណីនេះ ប្រធានផ្នែកការិយាល័យជំងឺឆ្លង លោកវេជ្ជបណ្ឌិត Chakkarat Pittayawonganon បានបន្ថែមថា មនុស្សសរុបចំនួន១២នាក់ ដែលរួមមានអ្នករួមដំណើរ និងបុគ្គលិកបម្រើការលើយន្តហោះដែលជាប់ពាក់ព័ន្ធជាមួយបុគ្គលរូបនេះ បច្ចុប្បនត្រូវបានដាក់ឱ្យនៅដាច់ដោយឡែកក្នុងប្រទេសថៃ ខណៈគិតរហូតមកដល់ពេលនេះ ពួកគេទាំងអស់នោះមិនទាន់ឃើញមានចេញរោគសញ្ញាគួរឱ្យកត់សម្គាល់ណាមួយទាក់ទងនឹងជំងឺអុតស្វាឡើយ។
ទោះជាយ៉ាងណា ពួកគេនឹងត្រូវដាក់ឱ្យនៅដាច់ដោយឡែកសម្រាប់រយៈពេល២១ថ្ងៃ ដើម្បីតាមដានសុខភាពបន្ត និងធានាឱ្យបានថាពួកគេពិតជាគ្មានជំងឺអុតស្វា។
ទាក់ទិននឹងវិធានការទប់ស្កាត់ការឆ្លងរីករាលដាលនៃជំងឺអុតស្វា ប្រភពដដែលបន្តថា អ្នកជំងឺដែលសង្ស័យថាមានជំងឺអុតស្វា ត្រូវបានកំណត់ចំពោះបុគ្គលដែលមានរោគសញ្ញាពងបែកលើមុខនិងដងខ្លួន ហើយធ្លាប់មានប្រវត្តិពាក់ព័ន្ធជិតស្និទ្ធជាមួយអ្នកឆ្លងជំងឺនេះក្នុងរយៈពេល២១ថ្ងៃចុងក្រោយ ព្រមទាំងបានធ្វើដំណើរមកពីប្រទេសដែលមានការផ្ទុះឡើងនៃជំងឺនេះ និងមានប្រវត្តិចូលរួមក្នុងសកម្មភាពជាមួយអ្នកឆ្លង ឬស្នាក់នៅក្នុងបន្ទប់រួមគ្នាជាមួយអ្នកជំងឺ។
លោកវេជ្ជបណ្ឌិតបន្ថែមថា សម្រាប់ករណីសង្ស័យនឹងត្រូវឆ្លងកាត់ការធ្វើតេស្ត ការត្រួតពិនិត្យប្រវត្តិ ការតាមដានជំងឺ ការព្យាបាល និងការដាក់ឱ្យនៅដាច់ដោយឡែកពីអ្នកដទៃ រហូតទាល់តែមានការបញ្ជាក់ច្បាស់លាស់ថាពួកគេពិតជាគ្មានផ្ទុកជំងឺនេះ។
គួរបញ្ជាក់ថា គិតចាប់តាំងពីថ្ងៃទី៧ ដល់ថ្ងៃទី២៩ ខែឧសភា ករណីឆ្លងជំងឺអុតស្វានៅទូទាំងពិភពលោកត្រូវបានរាយការណ៍ថាមានចំនួន៤០៦ករណី និង៨៨ករណីផ្សេងទៀតជាករណីសង្ស័យ ដែលត្រូវបានរកឃើញនៅក្នុងប្រទេសចំនួន៣២៕