លោកនាយករដ្ឋមន្ត្រី ហ៊ុន សែន សម្រេចកាត់ដីអភិរក្សតំបន់បឹងទន្លេសាបជាង៦ ០០០ហិកតា ពីតំបន់៣បញ្ចូលទៅតំបន់២ នៅក្នុងភូមិសាស្ត្រខេត្តកំពង់ធំ និងបន្ទាយមានជ័យ ឱ្យពលរដ្ឋបានអាស្រ័យផលឡើងវិញ ក្រោយពីប្រើវិធានការក្ដៅបញ្ជាឱ្យមន្ត្រីចុះបង្ក្រាបបទល្មើសទន្ទ្រានដីព្រៃលិចទឹកនៅតំបន់នោះជាច្រើនម៉ឺនហិកតារួចមក។
អនុក្រឹត្យចុះថ្ងៃទី៣១ ខែឧសភា ឆ្នាំ២០២២ រដ្ឋាភិបាលបានសម្រេចកាត់ដីទំហំ ៦ ៣៥៨ហិកតា ស្មើជាង២ ០០០ក្បាលដី (២០២៥ក្បាលដី) ចេញពីតំបន់៣ ស្ថិតក្នុងភូមិសាស្ត្រខេត្តកំពង់ធំ បញ្ចូលទៅតំបន់២ ដើម្បីឱ្យពលរដ្ឋបានអាស្រ័យផល។
អនុក្រឹត្យដាច់ដោយឡែកមួយទៀត រដ្ឋាភិបាលបានសម្រេចកាត់ដីទំហំជិត៦០ហិកតា ចេញពីតំបន់៣ដូចគ្នានៃផ្ទៃដីបឹងទន្លេសាប ស្ថិតក្នុងភូមិសាស្ត្រខេត្តបន្ទាយមានជ័យ ឱ្យទៅពលរដ្ឋ ២២គ្រួសារ ស្ថិតនៅភូមិកាបៅ និងភូមិកំពង់ក្រសាំង ឃុំភ្នំលៀប ស្រុកព្រះនេត្រព្រះ ខេត្តបន្ទាយមានជ័យ ដើម្បីអាស្រ័យផលតាមការស្នើសុំ។ តែយ៉ាងណា អនុក្រឹត្យទាំង២នេះមិនបានបង្ហាញឈ្មោះម្ចាស់អចលនវត្ថុដែលត្រូវទទួលបានសិទ្ធិអាស្រ័យទាំងអស់នោះទេ។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង សាទរចំពោះការសម្រេចរបស់រដ្ឋាភិបាលនេះ តែលោកចង់ឃើញរដ្ឋាភិបាលបង្ហាញតម្លាភាព ដើម្បីទប់ស្កាត់កុំឱ្យមន្ត្រីខិលខូចឆ្លៀតយកវិធាននេះប្រព្រឹត្តអំពើពុករលួយនិងបក្ខពួកនិយម។
លោកថា៖ «ខ្ញុំស្នើសុំធ្វើយ៉ាងណាឱ្យមានការចូលរួមឃ្លាំមើលពីអ្នកសារព័ត៌មាន ពីសង្គមស៊ីវិល ឬដៃគូផ្សេងៗក្នុងតំបន់ផ្ទាល់ ក្នុងការពិនិត្យមើលជាក់ស្តែង ធ្វើយ៉ាងណាឱ្យការបែងចែកហ្នឹងដោយតម្លាភាព ដោយគ្មានការរើសអើង ដែលទាំងអស់ហ្នឹងដែលយើងចង់ឃើញ»។
ចំណែកពលរដ្ឋរស់នៅភូមិត្រពាំងចាន់ ឃុំត្រពាំងចាន់ ស្រុកបរិបូណ៌ ខេត្តកំពង់ឆ្នាំង លោក ភួង រីម ដែលអះអាងថាមានដីចំនួន៤ហិកតា នៅតំបន់៣នៃបឹងទន្លេសាបផងដែរនោះ លើកឡើងថា គាត់មិនទាន់ទទួលដំណឹងជុំវិញការកាត់ឆ្វៀលដីតំបន់បឹងទន្លេសាបនៅក្នុងខេត្តនេះទៅឱ្យប្រជាពលរដ្ឋនៅឡើយ ខណៈអ្នកភូមិជាង៤០០គ្រួសារផ្សេងទៀតនៅក្នុងភូមិនេះ បានខកខានធ្វើស្រែនៅតំបន់នេះ ចាប់តាំងពីមានការហាមឃាត់ពីរដ្ឋាភិបាលអំឡុងចុងឆ្នាំ២០២១មក។
បុរសអាយុ៤០ឆ្នាំរូបនេះចង់ឱ្យរដ្ឋាភិបាលផ្តល់សិទ្ធិឱ្យពួកគេបានប្រកបមុខរបរលើដីស្រែដែលធ្លាប់អាស្រ័យផលឡើងវិញ ដើម្បីដោះស្រាយបញ្ហាជីវភាព។
លោកថា៖ «ប្រជាពលរដ្ឋរស់ដោយសារពឹងស្រែពឹងចម្ការហ្នឹងហើយ កាលណាបើគាត់បិទស្រែបិទចម្ការហ្នឹងទៀត ប្រជាពលរដ្ឋដឹងទៅរកអីទេ ជំពាក់បំណុលគេកាន់តែច្រើនឡើងៗ»។
នៅសប្តាហ៍មុននេះ លោកនាយករដ្ឋមន្ត្រី ហ៊ុន សែន តាមរយៈការថ្លែងសារនៅលើបណ្តាញសង្គម បានចេញបញ្ជាឱ្យស្ថាប័នពាក់ព័ន្ធសិក្សាពីការកែសម្រួលផ្ទៃដីបឹងទន្លេសាប និងកាត់ដីជូនពលរដ្ឋដែលអាស្រ័យផលជាក់ស្ដែងយូរឆ្នាំតាមរូបមន្តស្បែកខ្លា និងប្រកាសប្រឆាំងដាច់ខាតចំពោះអ្នកមានអំណាចដែលទន្ទ្រានយកដីបឹងទន្លេសាប។
ការប្រកាសនេះ ក្រោយពីលោកបានចេញបញ្ជាកាលពីចុងឆ្នាំ២០២១ ឱ្យកងកម្លាំង និងក្រសួងពាក់ព័ន្ធចុះទប់ស្កាត់បទល្មើសទន្ទ្រានកាន់កាប់ដីព្រៃលិចទឹករាប់ម៉ឺនហិកតានៅតំបន់បឹងទន្លេសាប និងរឹបអូសដីទាំងនោះមកធ្វើជាសម្បត្តិរដ្ឋវិញ។
ក្រោយវិធានការចុះបង្ក្រាប មន្ត្រីមួយចំនួនត្រូវបានចាត់វិធានការច្បាប់ តែមន្ត្រីខ្លះបានគេចផុតពីសំណាញ់ច្បាប់ តាមរយៈប្រគល់ដីខ្លះឱ្យទៅរដ្ឋាភិបាលគ្រប់គ្រងវិញ៕