ស្ថាប័នជំនាញលើកឡើងថា កម្ពុជាមានករណីសង្ស័យអុតស្វាចំនួន៦ករណី ប៉ុន្តែក្រោយការធ្វើតេស្តនៅមន្ទីរពិសោធន៍នៅវិទ្យាស្ថានប៉ាស្ទ័របានបញ្ជាក់ថាអវិជ្ជមានជំងឺនេះ ដែលករណីនេះ រហូតមកដល់ពេលនេះ កម្ពុជាគ្មានវត្តមានជំងឺអុតស្វាយនៅក្នុងប្រទេសឡើយ។
នាយកដ្ឋានប្រយុទ្ធនឹងជំងឺឆ្លង (CDC) នៃក្រសួងសុខាភិបាល នៅព្រឹកថ្ងៃទី២ ខែមិថុនានេះ បានបញ្ជាក់ពីការរកឃើញករណីសង្ស័យជំងឺអុតស្វាចំនួន៦ករណី ដោយសារអ្នកជំងឺមានកន្ទួលឬពងបែកលើដៃ បាតដៃ ជើង បាតជើង លើមុខ និងមានរោគសញ្ញាមួយចំនួនទៀត ដូចជា គ្រុនក្តៅលើស៣៨,៥អង្សាសេ ឈឺសាច់ដុំ ឡើងកូនកណ្ដុរ ឈឺក្បាល និងឈឺខ្នង ជាដើម។
យ៉ាងណា នាយកដ្ឋានប្រយុទ្ធនឹងជំងឺឆ្លង បញ្ជាក់ថា៖ «យើងរកឃើញករណីសង្ស័យជំងឺអុតស្វាចំនួន៦ករណី តែក្រោយធ្វើតេស្តមន្ទីរពិសោធន៍នៅវិទ្យាស្ថានប៉ាស្ទ័រ បញ្ជាក់ថា អវិជ្ជមានមេរោគជំងឺអុតស្វាទាំងអស់ មានន័យថា គ្មានជំងឺនេះក្នុងប្រទេសយើង[កម្ពុជា]ទេ រហូតមកដល់ពេលនេះ»។
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន កាលពីថ្ងៃទី២២ ខែឧសភា បានជំរុញទៅស្ថាប័នពាក់ព័ន្ធត្រូវពិនិត្យឱ្យហ្មត់ចត់លើអ្នកដំណើរចូលកម្ពុជា ដែលមានកន្ទួលរមាស់នៅលើខ្លួន គ្រុនក្ដៅ និងមានប្រវត្តិធ្វើដំណើរមកពីបណ្ដាប្រទេសប៉ែកអាហ្វ្រិកប្រមាណ១០ប្រទេស ក្រោយតំបន់ទាំងនោះផ្ទុះជំងឺអុតស្វា។
ក្នុងនោះ លោកស្រីបញ្ជាក់ថា រហូតមកដល់ពេលនេះ មិនទាន់មានករណីសង្ស័យ ឬករណីវិជ្ជមានជំងឺអុតស្វាណាមួយនៅកម្ពុជាទេ។
យ៉ាងណា មន្ត្រីជាន់ខ្ពស់ក្រសួងសុខាភិបាលរូបនេះបានអំពាវនាវដល់ពលរដ្ឋកម្ពុជាត្រូវមានការប្រុងប្រយ័ត្នខ្ពស់ជាប់ជានិច្ច ដោយត្រូវបន្តអនុវត្តវិធានការបង្ការជំងឺផ្ទាល់ខ្លួន និងតាមរយៈការណែនាំរបស់ក្រសួង។ ចំណែកគ្រប់មន្ទីរពេទ្យ និងមណ្ឌលសុខភាព ត្រូវតាមដាននិងរាយការណ៍ករណីសង្ស័យណាមួយដែលកើតមានឡើង ដើម្បីបន្តការស៊ើបអង្កេត។
បើតាមសេចក្តីជូនដំណឹងរបស់ក្រសួងសុខាភិបាលកម្ពុជា ក្រោយពីមានការផ្ទុះចេញនូវជំងឺអុតស្វាក្នុងពេលថ្មីៗនេះ បណ្តាប្រទេសចំនួន២៣នៅលើសកលលោក បានរាយការណ៍ទៅអង្គការសុខភាពពិភពលោកពីករណីជំងឺនេះ សរុបករណីឈឺ២៥៧នាក់ និងករណីសង្ស័យ១២០នាក់ គិតត្រឹមថ្ងៃទី២៦ ខែឧសភា ឆ្នាំ២០២២ និងមិនទាន់មានករណីស្លាប់ដោយសារជំងឺនេះនៅឡើយ៕
