រដ្ឋាភិបាលកម្ពុជាសម្រេចចុះហត្ថលេខាដើម្បីបញ្ជាទិញវ៉ាក់សាំងការពារកូវីដ-១៩ជាង១០៤លានដូសបន្ថែមទៀតពីក្រុមហ៊ុនផលិតវ៉ាក់សាំងប្រភេទស៊ីណូវ៉ាក់របស់ចិន ដើម្បីទុកប្រើប្រាស់រយៈពេល៣ឆ្នាំ ពីឆ្នាំ២០២៤ ដល់ឆ្នាំ២០២៦។
តាមរយៈសារជាសំឡេងនៅលើបណ្ដាញសង្គមរបស់លោកនាយករដ្ឋមន្ត្រី ហ៊ុន សែន នៅយប់ថ្ងៃទី១ ខែមិថុនា ឆ្នាំ២០២២នេះ លោកបានថ្លែងថា បើទោះបីជារយៈពេលជិត១ខែមកនេះ កម្ពុជាពុំមានករណីឆ្លងថ្មីនិងស្លាប់ដោយសារជំងឺកូវីដ-១៩ ប៉ុន្តែជំងឺនេះនៅមិនទាន់បិទបញ្ចប់នៅលើសកលលោកនៅឡើយ ដែលករណីនេះ កម្ពុជាចាំបាច់ត្រូវត្រៀមបម្រុងទុកនូវវ៉ាក់សាំងកូវីដ-១៩ សម្រាប់ចាក់ជូនប្រជាពលរដ្ឋបន្ថែមទៀត។
លោកនាយករដ្ឋមន្ត្រី ហ៊ុន សែន បន្តថា ដោយមើលឃើញពីភាពចាំបាច់ និងដើម្បីការពារពលរដ្ឋពីជំងឺឆ្លងនេះបន្តទៀត រដ្ឋាភិបាលបានសម្រេចចុះហត្ថលេខាបញ្ជាទិញវ៉ាក់សាំងកូវីដ-១៩ ចំនួន១០៤ ៨៧៣ ១៥៧ដូសបន្ថែមទៀត ទុកសម្រាប់ប្រើប្រាស់ក្នុងឆ្នាំ២០២៤ ដល់ឆ្នាំ២០២៦។
លោកថា៖ «ដោយសារតែជំងឺកូវីដ-១៩ នៅមិនទាន់បិទបញ្ចប់នៅលើពិភពលោក យើងពុំមានសុវត្ថិភាពនោះទេ ដូច្នេះយើងត្រូវត្រៀមបម្រុងទុកយថាហេតុដ៏អាក្រក់ សម្រាប់ពេលខ្វះវ៉ាក់សាំង នៅក្នុងចន្លោះឆ្នាំ២០២៤ ដល់ឆ្នាំ២០២៦ គឺរយៈពេល៣ឆ្នាំ។ ដូច្នេះហើយបានជារាជរដ្ឋាភិបាលត្រូវចុះហត្ថលេខាដើម្បីទិញសម្រាប់ឱ្យរោងចក្រផលិតឱ្យយើង។ ចំនួនលេខគត់រហូតទៅដល់១០៤លានដូស ដោយសហគ្រាសផលិតឱសថកម្ពុជា សហការជាមួយនឹងក្រុមហ៊ុនផលិតស៊ីណូវ៉ាក់របស់សាធារណរដ្ឋប្រជាមានិតចិន នឹងត្រូវផ្គត់ផ្គង់ឱ្យរាជរដ្ឋាភិបាលជិត៣៥លានដូសក្នុងមួយឆ្នាំ។ នេះជាតម្រូវការចាំបាច់ ដើម្បីឱ្យយើងប្រើប្រាស់ រាប់ទាំងកុមារ»។
បើតាមលោកនាយករដ្ឋមន្ត្រី សម្រាប់ឆ្នាំ២០២២ និងឆ្នាំ២០២៣ កម្ពុជានឹងបន្តប្រើប្រាស់វ៉ាក់សាំងដែលបានមកពីការទិញ និងជំនួយដែលនៅសល់ក្នុងឃ្លាំងប្រមាណ៩លានដូស និងវ៉ាក់សាំងដែលមិនទាន់ដឹកមកដល់ជាង២០លានដូស ក្នុងនោះមានពីប្រទេសចិនចំនួន១៥លានដូស សហរដ្ឋអាមេរិកជាង៥លាន៥សែនដូស និងវ៉ាក់សាំងសម្រាប់ចាក់កុមារពីប្រទេសអូស្ត្រាលីចំនួន៥០ម៉ឺនដូស។
ក្រៅពីនោះ លោកនាយករដ្ឋមន្ត្រី ហ៊ុន សែន ក៏បានអំពាវនាវដល់ប្រជាពលរដ្ឋទៅទទួលយកវ៉ាក់សាំងដូសជំរុញ ដើម្បីការពារខ្លួន និងការពារសហគមន៍ពីការឆ្លងជំងឺនេះផងដែរ។ លោកបានបញ្ជាក់ដែរថា រដ្ឋាភិបាលនៅតែបន្តផ្តល់វ៉ាក់សាំងដល់ប្រជាពលរដ្ឋដោយឥតគិតថ្លៃ។
បើតាមក្រសួងសុខាភិបាល រយៈពេល២៧ថ្ងៃមកហើយ បើគិតត្រឹមថ្ងៃម្សិលមិញ ដែលកម្ពុជាពុំមានករណីឆ្លងជំងឺកូវីដ-១៩ថ្មី និងករណីស្លាប់ដោយសារជំងឺនេះទេ។
ក្រសួងបន្តថា គិតមកដល់ថ្ងៃម្សិលមិញ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១៣៦ ២៦២នាក់ ក្នុងនោះ ជាសះស្បើយ ១៣៣ ២០៥នាក់ និងករណីស្លាប់ ៣ ០៥៦នាក់។ សម្រាប់កំណើននៃការចាក់វ៉ាក់សាំងវិញ ក្រសួងថា គិតមកដល់ពេលនេះ មានពលរដ្ឋជាង៩៤ភាគរយនៃចំនួនប្រជាជនសរុប១៦លាននាក់ ដែលបានចាក់វ៉ាក់សាំងការពារជំងឺនេះ៕