គណៈកម្មាធិការជាតិរៀបចំការបោះឆ្នោត (គ.ជ.ប) ស្រាយបំភ្លឺជុំវិញអ្នកដែលមានសិទ្ធិចូលក្នុងការិយាល័យរាប់សន្លឹកឆ្នោត ក្រោយមានការរិះគន់ជុំវិញករណីបិទទ្វារ បិទបង្អួច និងបណ្តេញពលរដ្ឋចេញ មិនឱ្យតាមដានការរាប់សន្លឹកឆ្នោត។
កាលពីថ្ងៃម្សិលមិញ គណបក្សភ្លើងទៀន បានចេញសេចក្តីថ្លែងការណ៍មួយ ដោយបានលើកឡើងថា ការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥នេះ មិនបានប្រព្រឹត្តក្នុងបរិយាកាសស្មើភាព សេរី និងយុត្តិធម៌ ព្រមទាំងស្ថិតក្រោមការចាត់ចែងរបស់ស្ថាប័នបោះឆ្នោតដែលមិនអព្យាក្រឹត្យ និងប្រកាន់បក្ខពួក។
បក្សភ្លើងទៀន បញ្ជាក់បន្ថែមថា នៅថ្ងៃបោះឆ្នោត គ្រប់មណ្ឌលបោះឆ្នោតទូទាំងប្រទេស ត្រូវបានបិទទ្វាររបងចាប់ពីម៉ោង៣រសៀល ហើយបណ្តេញពលរដ្ឋចេញ មិនឱ្យតាមដានការរាប់សន្លឹកឆ្នោតដូចដែលបានណែនាំ និងអនុញ្ញាតដោយ គ.ជ.ប។ តែមានការផ្តល់ឱ្យមន្រ្តីភូមិ-ឃុំរបស់បក្សកាន់អំណាច និងតំណាងអង្គការជាច្រើនរូបរបស់គណបក្សនេះ មានសិទ្ធិស្ថិតក្នុងបរិវេណមណ្ឌលបោះឆ្នោត ខណៈភ្នាក់ងារគណបក្សក្រៅរដ្ឋាភិបាលមួយចំនួន ត្រូវគេបណ្តេញឱ្យនៅក្រៅមណ្ឌលបោះឆ្នោតនៅពេលរាប់សន្លឹកឆ្នោត។
ពាក់ព័ន្ធនឹងករណីនេះ អ្នកនាំពាក្យ គ.ជ.ប បានចេញសេចក្តីបំភ្លឺមួយ នៅថ្ងៃអង្គារនេះ ដោយលើកឡើងថា៖ «យោងតាមមាត្រា៣០ នៃច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំសង្កាត់ និងប្រកាស ៥.៦.៤ នៃបទបញ្ជា និងនីតិវិធីសម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ ឆ្នាំ២០២២ ចែងថា ហាមជនគ្រប់រូបចូលក្នុងការិយាល័យរាប់សន្លឹកឆ្នោត មុនពេលចាប់ផ្តើមការរាប់សន្លឹកឆ្នោត ឬក្រោយការរាប់សន្លឹកឆ្នោត ដោយគ្មានការអនុញ្ញាតជាលាយលក្ខណ៍អក្សរពីគណៈកម្មាធិការជាតិរៀបចំការបោះឆ្នោត»។
បើតាមសេចក្តីបំភ្លឺរបស់ គ.ជ.ប ជនទាំងឡាយដែលត្រូវបានអនុញ្ញាតឱ្យចូលក្នុងការិយាល័យរាប់សន្លឹកឆ្នោត និងបរិវេណខាងក្នុង មានដូចជា មន្ត្រីរាប់សន្លឹកឆ្នោត ភ្នាក់ងារគណបក្សនយោបាយដែលមានបញ្ជីបេក្ខជនឈរឈ្មោះនិងដែលបានអនុញ្ញាត និងអ្នកសង្កេតការណ៍ដែលមានប័ណ្ណសម្គាល់ ផ្តល់ដោយ គ.ជ.ប និងភ្នាក់ងារសន្តិសុខនិងភ្នាក់ងារសង្គ្រោះនៅពេលដែលប្រធានគណៈកម្មការការិយាល័យរាប់សន្លឹកឆ្នោតធ្វើសំណូមពរក្នុងករណីចាំបាច់ប៉ុណ្ណោះ។
គ.ជ.ប បញ្ជាក់ដែរថា តាមគោលការណ៍នៃច្បាប់ស្តីពីការបោះឆ្នោត គ.ជ.ប បើកសិទ្ធិឱ្យគណបក្សនយោបាយប្តឹងជុំវិញភាពមិនប្រក្រតីណាមួយ ដែលខ្លួនបានអង្កេតឃើញនៅថ្ងៃបោះឆ្នោត ហើយស្ថាប័នមួយនេះ នឹងរងចាំទទួលដោះស្រាយពាក្យបណ្តឹងពាក់ព័ន្ធស្របតាមច្បាប់ និងប្រកាន់នូវគោលការណ៍យុត្តិធម៌ ដូចមានចែងក្នុងបាវចនារបស់ គ.ជ.ប។
ជាមួយគ្នានោះដែរ គ.ជ.ប លើកឡើងថា លទ្ធផលនៃការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ ឆ្នាំ២០២២ ត្រូវបានសាទរពីគ្រប់ភាគីពាក់ព័ន្ធនឹងការបោះឆ្នោត រួមមានគណបក្សនយោបាយដែលបានចូលរួមប្រកួតប្រជែង រួមទាំងអ្នកសង្កេតការណ៍ជាតិ-អន្តរជាតិ ដោយពួកគេវាយតម្លៃថា ការបោះឆ្នោតបានប្រព្រឹត្តទៅដោយរលូនល្អ សេរី យុត្តិធម៌ តម្លាភាព គ្មានការគំរាមកំហែង គ្មានអំពើហិង្សា ឬភាពមិនប្រក្រតីណាមួយកើតឡើងឡើយ។
តែយ៉ាងណា គ.ជ.ប ថា មានតែគណបក្សភ្លើងទៀនមួយប៉ុណ្ណោះ ដែលបានធ្វើការវាយតម្លៃផ្ទុយពីការសាទររបស់ភាគីពាក់ព័ន្ធនៃការបោះឆ្នោត ហើយថែមទាំងបានលើកឡើងខុសពីច្បាប់ បទបញ្ជា និងនីតិវិធីរបស់ គ.ជ.ប ថែមទៀត ដើម្បីបំភាន់សាធារណៈមតិឱ្យយល់ខុសមកលើ គ.ជ.ប ក៏ដូចជា ការរៀបចំការបោះឆ្នោតទាំងមូល។
ករណីនេះ គ.ជ.ប បានអំពាវនាវដល់ប្រជាពលរដ្ឋទាំងអស់ បន្តរក្សាភាពស្ងៀមស្ងាត់ និងរងចាំគ.ជ.ប ប្រកាសផ្សាយលទ្ធផលផ្លូវការនៃការបោះឆ្នោតនៅពេលខាងមុខ រហូតដល់ក្រុមប្រឹក្សាឃុំសង្កាត់ថ្មី ចូលកាន់ដំណែង ដើម្បីអភិវឌ្ឍន៍ឃុំសង្កាត់ និងលើកកម្ពស់លទ្ធិប្រជាធិបតេយ្យនៅកម្ពុជា៕