ប្រធានាធិបតីអ៊ុយក្រែនលោក វ្ល៉ាឌីមៀ ហ្សេលេនស្គី (Volodymyr Zelenskiy) បានឱ្យដឹងនៅថ្ងៃចន្ទម្សិលមិញថា ចក្រភពអង់គ្លេសបាននិងកំពុងផ្តល់នូវសព្វាវុធដ៏ត្រឹមត្រូវដល់ប្រទេសរបស់ខ្លួន ដើម្បីប្រយុទ្ធតទល់នឹងសង្រ្គាមជាមួយរុស្ស៊ី ខណៈលោកក៏បានថ្លែងអំណរគុណដល់នាយករដ្ឋមន្ត្រីអង់គ្លេសលោក បូរីស ចនសុន (Boris Johnson) ដែលយល់ច្បាស់អំពីតម្រូវការមួយនេះផងដែរ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ដោយមានការសម្របសម្រួលជាមួយសហរដ្ឋអាមេរិក អង់គ្លេសកាលពីថ្ងៃចន្ទបានអះអាងថា ខ្លួននឹងផ្គត់ផ្គង់ដល់អ៊ុយក្រែននូវប្រព័ន្ធរ៉ុក្កែតទំនើប ដែលអាចវាយប្រហារចំគោលដៅបានក្នុងរយៈចម្ងាយរហូតដល់ ៨០គីឡូម៉ែត្រ ជាផ្នែកនៃជំនួយយោធាថ្មីមួយរបស់ចក្រភពអង់គ្លេសសម្រាប់ប្រទេសដែលកំពុងតែរងនូវការឈ្លានពានមួយនេះ ។
ក្នុងសុន្ទរកថាមួយតាមរយៈប្រព័ន្ធវីដេអូ កាលពីយប់ថ្ងៃចន្ទ លោក វ្ល៉ាឌីមៀ ហ្សេលេនស្គី ថ្លែងថា៖ «ខ្ញុំសូមធ្វើការថ្លែងអំណរគុណដល់លោកនាយករដ្ឋមន្ត្រី បូរីស ចនសុន សម្រាប់ការយល់ដឹងយ៉ាងច្បាស់អំពីតម្រូវការ និងការត្រៀមខ្លួនរបស់យើងតាមរយៈការផ្តល់ឱ្យនូវសព្វាវុធទាំងឡាយដ៏ត្រឹមត្រូវ និងចាំបាច់ដើម្បីការពារអាយុជីវិតប្រជាជនរបស់យើង»។
គួរបញ្ជាក់ថា ការឈ្លានពានរបស់រុស្ស៊ីលើអ៊ុយក្រែន គិតរហូតមកដល់ពេលនេះ បានឈានចូលដល់សប្តាហ៍ទី១៥ហើយ ដែលបានបង្កឱ្យជនស៊ីវិលរាប់ពាន់នាក់បានស្លាប់បាត់បង់ជីវិត តំបន់ទីក្រុងជាច្រើនប្រែក្លាយទៅជាគំនរបាក់បែក និងបង្កឱ្យមានជាវិបត្តិមនុស្សធម៌ធ្ងន់ធ្ងរកើតឡើង ខណៈមនុស្សរាប់លាននាក់ បានភៀសខ្លួនចេញពីប្រទេសផងដែរ។
ទាក់ទិននឹងករណីនេះ ចក្រភពអង់គ្លេសបានខិតខំធ្វើសកម្មភាពជាច្រើន ក្នុងការឆ្លើយតបជាអន្តរជាតិចំពោះការលុកលុយរបស់រុស្ស៊ីលើអ៊ុយក្រែន ដែលរួមមានការផ្តល់ជំនួយផ្នែកយោធា ការជំរុញឱ្យមានការដាក់ទណ្ឌកម្មធ្ងន់ធ្ងរបន្ថែមទៀតលើរុស្ស៊ី និងផ្តល់ការគាំទ្រផ្នែកហិរញ្ញវត្ថុផងដែរ៕
