ក្រុមប្រឹក្សានាយកប្រតិបត្តិនៃធនាគារពិភពលោក (World Bank) នៅថ្ងៃអង្គារម្សិលមិញ បានអនុម័តផ្ដល់ហិរញ្ញប្បទានចំនួន ១,៤៩ពាន់លានដុល្លារបន្ថែមទៀតដល់អ៊ុយក្រែន ដើម្បីជួយឱ្យរដ្ឋាភិបាលរបស់ប្រទេសមួយនេះមានលទ្ធភាពក្នុងការបើកប្រាក់ឈ្នួលដល់មន្រ្តីរាជការ និងបុគ្គលិកកម្មករក្នុងវិស័យសាធារណៈនានា។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ការសម្រេចនេះត្រូវបានធ្វើឡើងបន្ទាប់ពីអ៊ុយក្រែនលើកឡើងថា ខ្លួននាពេលដ៏ខ្លីខាងមុខនេះ នឹងត្រូវការថវិកាយ៉ាងតិចណាស់៥ពាន់លានដុល្លារក្នុងមួយខែ ដើម្បីផ្គត់ផ្គង់ដល់រដ្ឋាភិបាលរបស់ខ្លួន ក្នុងការប្រឈមមុខនឹងការឈ្លានពានដោយរុស្ស៊ី ខណៈសេដ្ឋកិច្ចរបស់ខ្លួនបច្ចុប្បន្នកំពុងតែរងនូវការប៉ះពាល់ធ្ងន់ធ្ងរ។
ធនាគារពិភពលោក ក៏បាននិងកំពុងធ្វើការជាមួយប្រទេសម្ចាស់ជំនួយទាំងឡាយ ដើម្បីប្រើប្រាស់កម្មវិធីហិរញ្ញប្បទានផ្សេងៗរបស់ខ្លួន ក្នុងការជួយគាំទ្រដល់ផ្នែកថែទាំសុខភាព ការអប់រំ សេវាសង្គម ការផ្គត់ផ្គង់ថាមពល ទឹក និងផ្លូវថ្នល់ដល់ប្រទេសអ៊ុយក្រែនផងដែរ។
ទាក់ទិននឹងករណីនេះ នាយកធនាគារពិភពលោកប្រចាំតំបន់អឺរ៉ុបខាងកើត លោក Arup Banerji បានឱ្យដឹងនៅក្នុងសេចក្តីថ្លែងការណ៍មួយថា៖ «វិស័យទាំងនេះ គឺមានសារៈសំខាន់ណាស់ក្នុងការទប់ស្កាត់ការធ្លាក់ដុនដាបកាន់តែខ្លាំងនៃជីវភាពរស់នៅ និងភាពក្រីក្រនៅក្នុងប្រទេសអ៊ុយក្រែន ដែលកំពុងតែរងទុក្ខវេទនាដោយសារសង្គ្រាម»។
លោកបន្ថែមថា វាក៏នឹងក្លាយជាមូលដ្ឋានគ្រឹះនៃការស្តារនិងការកសាងប្រទេសឡើងវិញផងដែរ។
ភាពតានតឹងរវាងរុស្ស៊ី និងអ៊ុយក្រែន ក្នុងរយៈពេលចុងក្រោយនេះ បានចាប់ផ្ដើមកើនឡើងខ្លាំងបន្ទាប់ពីរុស្ស៊ីបានបើកការឈ្លានពានទ្រង់ទ្រាយធំមកលើប្រទេសក្បែរខាងរបស់ខ្លួនមួយនេះ ដែលធ្វើឡើងបន្ទាប់ពីការប្រកាសសង្រ្គាមមួយដោយប្រធានាធិបតី លោក វ្លាឌីមៀរ ពូទីន។
ទោះជាយ៉ាងណា រុស្ស៊ីធ្លាប់បានលើកឡើងកាលពីពេលកន្លងទៅថា សកម្មភាពរបស់ខ្លួននេះ គឺជាការអនុវត្ត «ប្រតិបត្តិការយោធាពិសេសមួយ» ដើម្បីបញ្ឈប់រដ្ឋាភិបាលអ៊ុយក្រែនពីការប្រព្រឹត្តអំពើប្រល័យពូជសាសន៍ប្រឆាំងនឹងប្រជាជនរបស់ខ្លួន ខណៈដែលការចោទប្រកាន់នេះ ត្រូវបានបណ្ដាប្រទេសមួយចំនួនចាត់ទុកថាជាការលើកឡើងដោយគ្មានមូលដ្ឋានច្បាស់លាស់៕