ក្រុមមន្ត្រីឱ្យដឹងថា យ៉ាងហោចណាស់មនុស្ស២៥នាក់បានស្លាប់ដោយសារករណីរន្ទះបាញ់ និងការរអិលបាក់ដី កាលពីចុងសប្តាហ៍កន្លងទៅ នៅក្នុងប្រទេសបង់ក្លាដែស ខណៈមនុស្សរាប់លាននាក់ផ្សេងទៀតត្រូវបានជាប់គាំងនៅមួយកន្លែង និងបាត់បង់ផ្ទះសម្បែង នៅតំបន់ភាគឦសានដែលរងគ្រោះដោយទឹកជំនន់បង្កឡើយដោយខ្យល់មូសុង។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ទាក់ទិននឹងករណីនេះ ប្រធានមជ្ឈមណ្ឌលព្យាករណ៍ទឹកជំនន់នៃប្រទេសបង់ក្លាដែស លោក Arifuzzaman Bhuiyan បានថ្លែងកាលពីថ្ងៃអាទិត្យម្សិលមិញថា ទឹកទន្លេជាច្រើននៅក្នុងប្រទេសបានហក់ឡើងដល់កម្រិតប្រកាសអាសន្ន។
លោកបន្តថា ទឹកដែលហូរពីភ្នំនានាក្នុងប្រទេសឥណ្ឌាដោយសារភ្លៀងធ្លាក់ខ្លាំងបានធ្វើឱ្យស្ថានភាពនេះកាន់តែធ្ងន់ធ្ងរឡើង ខណៈប៉ូលិសនិងទាហានរាប់ពាន់នាក់ត្រូវបានដាក់ពង្រាយជាបន្តបន្ទាប់ ដើម្បីជួយដល់កិច្ចការងារស្វែងរកនិងជួយសង្គ្រោះ។
លោក Arifuzzaman Bhuiyan បន្ថែមថា គិតរហូតមកដល់ពេលនេះ មានមនុស្សប្រមាណជាង១០ម៉ឺននាក់ត្រូវបានជម្លៀសចេញ ប៉ុន្តែក្នុងនោះ ក៏នៅមានមនុស្សជាង៤លាននាក់កំពុងតែជាប់គាំងក្នុងទីតាំងនានាផងដែរ។
ទាក់ទិននឹងករណីនេះ អ្នកនយោបាយបក្សកាន់អំណាចមួយរូបប្រចាំតំបន់ Sunamganj លោក Syed Rafiqul Haque បានព្រមានថា ប្រទេសអាចនឹងប្រឈមមុខនឹងវិបត្តិមនុស្សធម៌កាន់តែធ្ងន់ធ្ងរបន្ថែមទៀត ប្រសិនបើប្រតិបត្តិការជួយសង្គ្រោះមិនត្រូវបានធ្វើឡើងឱ្យត្រឹមត្រូវនោះទេ។
លោកថា៖ «ទីតាំងស្ទើរតែទាំងស្រុងក្នុងតំបន់កំពុងតែស្ថិតនៅក្រោមទឹក ហើយក្នុងនោះមានមនុស្សរាប់លាននាក់ត្រូវបានជាប់គាំងនៅមួយកន្លែង»។
លោកបន្ថែមថា ជនរងគ្រោះនានា បច្ចុប្បន្នមិនមានអាហារនិងទឹកស្អាតសម្រាប់ទទួលទាននោះទេ ខណៈការទាក់ទងគ្នាមានភាពពិបាក។
គួរបញ្ជាក់ថា ប្រទេសបង់ក្លាដែស ក្នុងរយៈពេលប៉ុន្មានឆ្នាំថ្មីៗនេះ បានជួបប្រទះនឹងបញ្ហាប្រែប្រួលអាកាសធាតុធ្ងន់ធ្ងរ ដែលករណីនេះបានបង្កឱ្យមានជាការខូចខាតទ្រង់ទ្រាយធំនៅក្នុងប្រទេស៕
