សមត្ថកិច្ចជំនាញនៅខេត្តព្រះសីហនុ កំពុងសិក្សាស្រាវជ្រាវមើលពីផលប៉ះពាល់នៃការជក់បារីអេឡិចត្រូនិច (Vape) ទៅលើសុខភាព និងការចាត់វិធានការទៅលើអ្នកប្រើប្រាស់បារីប្រភេទនេះ ដើម្បីទប់ស្កាត់កុំឱ្យមានការប្រើប្រាស់កាន់តែច្រើនក្នុងស្រទាប់យុវវ័យនៅក្នុងខេត្តមាត់សមុទ្រមួយនេះ។
ស្នងការនគរបាលខេត្តព្រះសីហនុ លោក ជួន ណារិន្ទ បានប្រាប់វីអូឌីនៅថ្ងៃចន្ទនេះថា បច្ចុប្បន្ន លោកបាននិងកំពុងសហការជាមួយអ្នកជំនាញ ដើម្បីពិនិត្យមើលពីកម្រិតនៃការប៉ះពាល់ទៅលើអ្នកដែលជក់បារីអេឡិចត្រូនិច ឬ Vape ព្រមទាំងសិក្សាផ្នែកផ្លូវច្បាប់ ដើម្បីចាត់វិធានការទប់ស្កាត់ការរីករាលដាលនៃការប្រើប្រាស់បារីប្រភេទនេះក្នុងស្រទាប់យុវជន។
លោកបន្តថា ការប្រើប្រាស់បារីអេឡិចត្រូនិចក្នុងខេត្តនេះ មិនទាន់មានការរីករាលដាលខ្លាំងទេ ប៉ុន្តែសមត្ថកិច្ចកំពុងតាមដានដោយយកចិត្តទុកដាក់ចំពោះរឿងនេះ ធ្វើយ៉ាងណាទប់ស្កាត់ការប្រើប្រាស់ឱ្យទាន់ពេលវេលា។
លោក ជួន ណារិន្ទ ថ្លែងថា៖ «យើងកំពុងតាមដានករណីនេះ យើងកំពុងឱ្យជំនាញសហការជាមួយនាយកមន្ទីរប្រឆាំងគ្រឿងញឿន ដើម្បីបង្ហាញនូវអ្វីដែលប៉ះពាល់ នូវអ្វីដែលខុសច្បាប់។ យើងកំពុងតាមដានការងារនេះបន្ដទៀត»។
កន្លងទៅថ្មីៗ គេសង្កេតឃើញថា យុវជនហាក់មានសន្ទុះក្នុងការប្រើប្រាស់បារីអេឡិចត្រូនិចនេះ ខណៈដែលកន្លងមកក៏មានជនខិលខូចផ្សព្វផ្សាយលក់តាមបណ្តាញព័ត៌មានសង្គម ដោយថាវាជាឧបករណ៍នេះអាចផ្តាច់ការជក់បារីបាន មានសុវត្ថិភាពជាងបារីធម្មតា មិនប៉ះពាល់បរិស្ថាននិងសុខភាព ជាដើម។
ប្រធានអង្គការចលនាដើម្បីសុខភាពកម្ពុជា លោកវេជ្ជបណ្ឌិត មុំ គង់ មានប្រសាសន៍ថា ការជក់បារីអេឡិចត្រូនិច (Vape) នេះ ប៉ះពាល់សួតដ៏ធ្ងន់ធ្ងរ ពីព្រោះភាគល្អិតតូចៗដែលមានក្នុងចំហាយរបស់ vape នេះ វាចូលយ៉ាងជ្រៅទៅក្នុងសួតរបស់អ្នកប្រើប្រាស់។
ក្រៅពីការប៉ះពាល់ដល់សួត លោកថា ការជក់បារី vape ក៏អាចបណ្តាលឱ្យឆ្លងជំងឺកូវីដ-១៩ផងដែរ ដោយសារយុវជននិងកុមារបានប្រើប្រាស់ឬចែករំលែកឧបករណ៍សម្រាប់ជក់ពីម្នាក់ទៅម្នាក់ ហើយការជក់បារីប្រភេទនេះក៏ជាច្រកទ្វារនាំទៅរកការជក់គ្រឿងញឿនប្រភេទខុសច្បាប់ជាច្រើនទៀតផងដែរ។
លោកវេជ្ជបណ្ឌិត មុំ គង់ បានរម្លឹកថា រដ្ឋាភិបាលបានចេញសេចក្ដីណែនាំហាមឃាត់ការប្រើប្រាស់ ការនាំចូល ការលក់ និងការធ្វើអាជីវកម្មបារីអេឡិចត្រូនិចនេះរួចរាល់ហើយតាំងពីឆ្នាំ២០២១។
លោកបន្ដថា៖ «ជំហានបន្ទាប់ អាជ្ញាធរថ្នាក់ក្រោមជាតិ និងអាជ្ញាធរមានសមត្ថកិច្ច ត្រូវតែរឹតបន្តឹងនូវសេចក្ដីណែនាំរបស់រដ្ឋាភិបាល ដោយធ្វើយ៉ាងណាកុំឱ្យមានការផ្សព្វផ្សាយលក់គគ្រឹកគគ្រេងតាមបណ្ដាញសង្គមដូចជាបច្ចុប្បន្នជាដើម»។
បើតាមលោក មុំ គង់ ការសិក្សាមួយបានរកឃើញថា នៅសហរដ្ឋអាមេរិក មានយុវជនប្រមាណជាង១ ០០០នាក់ហើយដែលបានស្លាប់ដោយសារការជក់បារីអេឡិចត្រូនិច Vapeនេះ៕
