តុលាការខេត្តសៀមរាប បានកោះហៅពលរដ្ឋចំនួន៣នាក់ឱ្យចូលបំភ្លឺនៅសាលាដំបូងខេត្តនៅចុងសប្ដាហ៍នេះនិងដើមខែក្រោយ ទៅតាមបណ្ដឹងរបស់មន្ត្រីបរិស្ថានខេត្ត ពាក់ព័ន្ធរឿងជម្លោះដីធ្លី។
កាលពីថ្ងៃទី៧ ខែមិថុនា ឆ្នាំ២០២២ ព្រះរាជអាជ្ញាអមសាលាដំបូងខេត្តសៀមរាប លោក ឆេង ហាក់ងិន ចេញដីកាកោះហៅពលរដ្ឋ២នាក់ រួមមាន លោក សាន សិទ្ធ និងអ្នកស្រី ស្វាយ ពៅ ឱ្យចូលបំភ្លឺនៅថ្ងៃទី២៤ ខែមិថុនានេះ ពាក់ព័ន្ធករណីបោះបង្គោលហ៊ុមព័ទ្ធ ដាក់សញ្ញាសម្គាល់ ក្នុងគោលបំណងកាន់កាប់ធ្វើជាកម្មសិទ្ធិលើដីសហគមន៍ «តំបន់ការពារធម្មជាតិជប់សោម» ក្នុងតំបន់ការពារដែនជម្រកសត្វព្រៃ «គូលេនព្រហ្មទេព» ស្ថិតក្នុងភូមិសែនជ័យ ឃុំកន្ទួត ស្រុកស្វាយលើ ខេត្តសៀមរាប។
ចំណែកដីកាមួយទៀតចុះថ្ងៃទី១៣ ខែមិថុនា ឆ្នាំ២០២២ តំណាងអយ្យការអមសាលាដំបូងខេត្តសៀមរាប លោក ថេង សំណាង បានកោះហៅលោក ប្រែង ហ៊ីង ឱ្យឆ្លើយបំភ្លឺលើកទី២ នៅថ្ងៃទី៥ ខែកក្កដា ឆ្នាំ២០២២ ក្រោមបទចោទ «កាប់ឆ្ការ ដុតរុករានព្រៃដើម្បីធ្វើកម្មសិទ្ធិ» ស្ថិតនៅភូមិសែនជ័យដូចគ្នា។
ពលរដ្ឋម្នាក់ដែលត្រូវបានតុលាការកោះហៅទៅបំភ្លឺ លោក សាន សិទ្ធ ប្រាប់វីអូឌីនៅថ្ងៃពុធនេះថា លោកនឹងចូលទៅបំភ្លឺតាមដីកាកោះហៅរបស់តុលាការ ដោយថា លោកមិនបានប្រព្រឹត្តកំហុសអ្វីនោះទេ។ លោកអះអាងថា ដីដែលលោកបោះបង្គោលរបងហ៊ុមព័ទ្ធនោះ ជាដីដែលគ្រួសារលោកបានកាន់កាប់និងអាស្រ័យផលជាង២០ឆ្នាំមកហើយ។
ពលរដ្ឋរូបនេះបន្តថា កាលពីថ្ងៃទី១៧ ខែមិថុនានេះ លោកក៏បានប្តឹងមន្ត្រីបរិស្ថានចំនួន៤នាក់ទៅតុលាការ ពាក់ព័ន្ធការបំផ្លាញទ្រព្យសម្បត្តិ និងការដកបង្គោលរបងរបស់លោកចោល ប៉ុន្តែមិនទាន់ឃើញតុលាការចាត់វិធានការលើបណ្តឹងរបស់លោកនៅឡើយ។
លោកបន្ថែមថា៖ «ខ្ញុំឆ្ងល់ដែរ! ពាក់ព័ន្ធរឿងតុលាការដែលគេកោះហៅនេះ គេដកបង្គោលរបងខ្ញុំភ្លាម ហើយគេប្តឹងខ្ញុំ តុលាការកោះហៅខ្ញុំភ្លាម! ដល់ពេលខ្ញុំប្តឹងសហគមន៍រឿងយកដីខ្ញុំយូរណាស់ហើយ តុលាការដូចអត់មានចំណាត់ការឬដោះស្រាយឱ្យពួកខ្ញុំសោះ។ អ៊ីចឹងខ្ញុំគ្រាន់តែឆ្ងល់ថា ម៉េចពេលមន្ត្រីប្តឹងពលរដ្ឋ ចាត់ការលឿនម៉្លេះ? ដល់ពេលពលរដ្ឋប្តឹងមន្ត្រី ហេតុអីយូរម៉្លេះ? មិនព្រមចាត់ការ?»
អ្នកស្រី សាន ស្រែ ជាភរិយារបស់លោក ប្រែង ហ៊ីង មានប្រសាសន៍ថា ក្នុងដីកា តុលាការបានកោះហៅស្វាមីអ្នកស្រីឱ្យឆ្លើយបំភ្លឺជាលើកទី២ ប៉ុន្តែកន្លងមក គ្រួសារអ្នកស្រីមិនធ្លាប់ទទួលបានដីកាកោះហៅលើកទី១នោះទេ។ អ្នកស្រីបន្តថា ស្វាមីអ្នកស្រីបានត្រៀមខ្លួននិងត្រៀមឯកសាររួចហើយសម្រាប់ចូលឆ្លើយលើកទី២នេះ ដោយថា ស្វាមីរបស់អ្នកស្រីមិនបានប្រព្រឹត្តដូចការចោទប្រកាន់ឡើយ។
អ្នកស្រីបន្ថែមថា៖ «ដីហ្នឹងមិនមែនជាដីព្រៃទេ ដីហ្នឹងពួកខ្ញុំបានទៅរស់នៅនិងអាស្រ័យផល [លើដី១៥ហិកតា] តាំងពីឆ្នាំ២០០០មកម៉្លេះ ប៉ុន្តែអាជ្ញាធរភូមិគេធ្វើលិខិតបញ្ជាក់ការកាន់កាប់ហ្នឹងនៅឆ្នាំ២០០២ ហើយខ្ញុំមានដំណាំចេក ស្វាយ ស្វាយចន្ទី មានដំឡូងមី។ សូមជួយរកយុត្តិធម៌ដល់ពួកខ្ញុំផង ខ្ញុំរស់នៅយូរហើយ»។
វីអូឌី មិនអាចសុំការបញ្ជាក់ពីប្រធានមន្ទីរបរិស្ថានខេត្តសៀមរាប លោក ស៊ុន គង់ បានទេ នៅថ្ងៃពុធនេះ។
បើតាមរបាយការណ៍របស់ប្រធានស្នាក់ការ នៃការិយាល័យដែនជម្រកសត្វព្រៃគូលេនព្រហ្មទេព លោក សឿន តូ ដែលផ្ញើទៅអភិបាលស្រុកស្វាយលើ បានឱ្យដឹងថា កាលពីថ្ងៃទី១៤ ខែមិថុនា ឆ្នាំ២០២២ មន្ត្រីឧទ្យានុរក្សចំនួន៤នាក់ បានសហការជាមួយកម្លាំងយោធាចុះល្បាតដីសហគមន៍ជប់សោម ដោយបានជួបប្រទះការបោះបង្គោលរបងហ៊ុមព័ទ្ធដីព្រៃសហគមន៍ដើម្បីធ្វើកម្មសិទ្ធិ ដែលមានឈ្មោះ សាន សិទ្ធ ជាម្ចាស់។
របាយការណ៍ដដែលបន្តថា កម្លាំងល្បាតបានដកចោលបង្គោលរបងនោះអស់ចំនួន៦០បង្គោល និងបានកសាងសំណុំរឿងបញ្ជូនជនសង្ស័យ៦នាក់ទៅតុលាការផងដែរ។
យ៉ាងណា នៅថ្ងៃដដែលនោះ ប្រជាពលរដ្ឋដែលមានដីនៅភូមិសែនជ័យ ឃុំកន្ទួត ស្រុកស្វាយលើ ខេត្តសៀមរាប បានចោទអាជ្ញាធរមូលដ្ឋានថាបានគប់គិតគ្នាបង្កើតសហគមន៍ចង់យកដីធ្លីពួកគេ។ ពលរដ្ឋលើកឡើងថា សហគមន៍នោះទើបបង្កើតនៅចុងឆ្នាំ២០២២នេះ ដែលគណៈកម្មការសហគមន៍ភាគច្រើន គឺជាអាជ្ញាធរ ហើយពុំមានការចូលរួមនិងគាំទ្រពីប្រជាពលរដ្ឋនៅមូលដ្ឋានឡើយ ខណៈពលរដ្ឋប្រហែល២០០គ្រួសារត្រូវអាជ្ញាធរចោទថា កំពុងរស់នៅលើដីសហគមន៍ដោយខុសច្បាប់។
កាលពីថ្ងៃទី១០ ខែមិថុនា ឆ្នាំ២០២២ រដ្ឋាភិបាលបានអនុញ្ញាតឱ្យមានការកំណត់ព្រំប្រទល់ថ្មី នៅតំបន់ការពារធម្មជាតិ ក្នុងខេត្តចំនួន១៥ ក្នុងនោះក៏មានខេត្តសៀមរាបផងដែរ ដើម្បីជួយសម្រួលដល់ប្រជាពលរដ្ឋដែលអាស្រ័យផលជាក់ស្តែងបានកាន់កាប់ដោយស្របច្បាប់៕
