ប្រធានាធិបតីប្រទេសបេឡារុស លោក អេឡិចហ្សានដឺ លូកាហ្សិនកូ (Alexander Lukashenko) ដែលត្រូវបានគេស្គាល់ថាជាសម្ព័ន្ធមិត្តដ៏ជិតស្និទ្ធបំផុតមួយរូបរបស់ប្រធានាធិបតីរុស្ស៊ី បានអះអាងឱ្យដឹងនៅថ្ងៃអាទិត្យម្សិលមិញថា ប្រទេសរបស់លោក គឺនឹងឈរនៅជាមួយរុស្ស៊ីជានិរន្តរ៍ក្នុងសង្រ្គាមតទល់នឹងប្រទេសអ៊ុយក្រែន។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ជាមួយគ្នានេះ ប្រធានាធិបតីដែលកាន់អំណាចតាំងពីឆ្នាំ១៩៩៤រូបនេះ ក៏បានប្រកាសអនុញ្ញាតឱ្យទាហានរុស្ស៊ីប្រើប្រាស់ទឹកដីនៃប្រទេសរបស់ខ្លួនក្នុងការឈ្លានពានអ៊ុយក្រែនផងដែរ។
ថ្លែងក្នុងពិធីមួយ លោក អេឡិចហ្សានដឺ លូកាហ្សិនកូ បានលើកឡើងថា ប្រទេសលោកគឺបានគាំទ្រយុទ្ធនាការរបស់លោក ពូទីន ប្រឆាំងនឹងអ៊ុយក្រែនតាំងពីដំបូងមកម្ល៉េះ [ចុងខែកុម្ភៈ]។
លោកបន្តថា៖ «បច្ចុប្បន្ន យើងកំពុងតែរងនូវការរិះគន់ថាជាប្រទេសតែមួយគត់ក្នុងពិភពលោកដែលគាំទ្ររុស្ស៊ីក្នុងការប្រយុទ្ធតទល់នឹងអ៊ុយក្រែន»។
លោកបន្ថែមថា៖ «[ទោះជាយ៉ាងណា] យើងគាំទ្រ ហើយនឹងបន្តគាំទ្ររុស្ស៊ី ហើយសម្រាប់អ្នកដែលរិះគន់ទាំងឡាយ តើពួកគេមិនដឹងទេថាយើងមានសម្ព័ន្ធភាពជិតស្និទ្ធជាមួយសហព័ន្ធរុស្ស៊ី? យើងនឹងនៅជាមួយគ្នា [រុស្ស៊ី] ជាបងប្អូន»។
ជាការឆ្លើយតប ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី [ដកស្រង់សម្ដីដោយប្រព័ន្ធផ្សព្វផ្សាយអ៊ុយក្រែន] បានប្រាប់អ្នកយកព័ត៌មាននៅទីក្រុងកៀវថា ការលើកឡើងរបស់លោក អេឡិចហ្សានដឺ លូកាហ្សិនកូ គឺជារឿងគ្រោះថ្នាក់មួយសម្រាប់ប្រជាជនបេឡារុសទាំងមូល។
លោកបន្តថា៖ «លោក [ប្រធានាធិបតីបេឡារុស] មិនត្រូវអូសប្រទេសបេឡារុសចូលទៅក្នុងសង្រ្គាមឈ្លានពានរបស់រុស្ស៊ីប្រឆាំងនឹងអ៊ុយក្រែនឡើយ។ ខ្ញុំជឿថា នេះគឺជាសញ្ញាដ៏គ្រោះថ្នាក់មួយ»។
គួរបញ្ជាក់ថា រុស្ស៊ីបានបើកការឈ្លានពានទ្រង់ទ្រាយធំរបស់ខ្លួនទៅលើអ៊ុយក្រែន តាមផ្លូវគោក ផ្លូវអាកាស និងសមុទ្រ កាលពីថ្ងៃទី២៤ ខែកុម្ភៈ ដែលបានបង្កឱ្យជនស៊ីវិលរាប់ពាន់នាក់បានស្លាប់ តំបន់ទីក្រុងជាច្រើនប្រែក្លាយទៅជាគំនរបាក់បែក និងបង្កឱ្យមានជាវិបត្តិមនុស្សធម៌ធ្ងន់ធ្ងរកើតឡើង ខណៈមនុស្សរាប់លាននាក់ក៏បានភៀសខ្លួនចេញពីប្រទេសផងដែរ។
ទោះជាយ៉ាងណា រុស្ស៊ីធ្លាប់បានលើកឡើងកាលពីពេលកន្លងទៅថា សកម្មភាពរបស់ខ្លួននេះ គឺជាការអនុវត្ត «ប្រតិបត្តិការយោធាពិសេសមួយ» ដើម្បីបញ្ឈប់រដ្ឋាភិបាលអ៊ុយក្រែនពីការប្រព្រឹត្តអំពើប្រល័យពូជសាសន៍ប្រឆាំងនឹងប្រជាជនរបស់ខ្លួន ខណៈដែលការចោទប្រកាន់នេះ ត្រូវបានបណ្ដាប្រទេសមួយចំនួនចាត់ទុកថាជាការលើកឡើងដោយគ្មានមូលដ្ឋានច្បាស់លាស់៕