កម្ពុជារកចំណូលបានជាង «២លាន ៤សែនដុល្លារ» ពីការលក់សំបុត្រចូលទស្សនារមណីយដ្ឋានអង្គរ ក្នុងរយៈពេល៦ខែ ដើមឆ្នាំ២០២២ ដោយចំនួននេះមានការកើនឡើងជាង១ ០០០ភាគរយ។
សេចក្ដីប្រកាសពត៌មានរបស់គ្រឹះស្ថានអង្គរកាលពីចុងសប្ដាហ៍មុន ឱ្យដឹងថា ចំណូលចូលទស្សនារមណីយដ្ឋានអង្គរក្នុងពេល៦ខែដើមឆ្នាំនេះជាង ២លានដុល្លារ (២ ៤២០ ០៨១) មានការកើនឡើងជាង ១ ០០០% បើធៀបនឹងរយៈពេលដូចគ្នាក្នុងឆ្នាំ២០២១។
ប្រភពដដែលបន្តថា ក្រៅពីការលក់សំបុត្រចូលទស្សនារមណីយដ្ឋានអង្គរ កម្ពុជាក៏បានលក់សំបុត្រទស្សនា «តំបន់កោះកែរ» ដល់ភ្ញៀវទេសចរអន្តរជាតិចំនួន១៨៧នាក់ បានចំណូលចំនួន២ ៨០៥ដុល្លារ និងចំណូលពីការលក់សំបុត្រទៅទស្សនានៅ «កំពង់ផែចុងឃ្នៀស» ដល់ទេសចរ ២ ៣៤០នាក់ បានចំនួន៩ ៣៤៥ដុល្លារ។
សេចក្តីប្រកាសព័ត៌មានរបស់គ្រឹះស្ថានអង្គរបញ្ជាក់ថា ចំណូលពីការលក់សំបុត្រចូលទស្សនារមណីយដ្ឋានអង្គរ ក៏បានឧបត្ថម្ភមួយចំនួនទៅមូលនិធិគន្ធបុប្ផាផងដែរ ។
ស្ថិតិទេសចរផ្លូវការក្រសួងទេសចរណ៍កាលពីឆ្នាំ២០២២ បង្ហាញថា នៅក្នុងឆ្នាំ២០២១ កម្ពុជាទទួលបានភ្ញៀវទេសចរអន្តរជាតិសរុប១៩៦ ៤៩៥នាក់ ដោយចំនួននេះថយចុះ៨៥ភាគរយ ធៀបឆ្នាំ២០២០។ ក្រសួងថា ចំនួននេះបង្ហាញថា ចំណូលបានពីទេសចរអន្តរជាតិមានចំនួន១៨៤លានដុល្លារ ដោយធ្លាក់ចុះ៨២ភាគរយ ពោលគឺធ្លាក់ចុះពីចំនួន១ ០២៣លានដុល្លារ កាលពីឆ្នាំ២០២០៕
