អនុរដ្ឋមន្ត្រីការបរទេសចិន លោក Ma Zhaoxu បានថ្លែងប្រាប់ឯកអគ្គរដ្ឋទូតរុស្ស៊ីប្រចាំនៅប្រទេសចិន លោក Andrey Denisov ថាប្រទេសរបស់ខ្លួនមានឆន្ទៈខ្ពស់ក្នុងការពង្រឹងកិច្ចសហប្រតិបត្តិការបន្ថែមទៀតជាមួយរុស្ស៊ី ក្នុងក្របខណ្ឌពហុភាគី រួមទាំងក្រុមប្រទេស G20 ផងដែរ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
យោងតាមសេចក្តីថ្លែងការណ៍មួយរបស់ក្រសួងការបរទេសចិន ដែលចេញនៅថ្ងៃពុធនេះ បានឱ្យដឹងទៀតថា នៅក្នុងកិច្ចប្រជុំមួយកាលពីថ្ងៃអង្គារម្សិលមិញ លោក Ma Zhaoxu ក៏បានបញ្ជាក់ប្រាប់លោក Andrey Denisov ពីឆន្ទៈរបស់ប្រទេសចិន ក្នុងការពង្រឹងការសម្របសម្រួលជាយុទ្ធសាស្ត្រជាមួយរុស្ស៊ី និងពង្រីកកិច្ចសហប្រតិបត្តិការជាក់ស្តែងក្នុងវិស័យផ្សេងៗផងដែរ។
គួរបញ្ជាក់ថា ភាពតានតឹងរវាងរុស្ស៊ី និងអ៊ុយក្រែន ក្នុងរយៈពេលចុងក្រោយនេះ បានចាប់ផ្ដើមកើនឡើងខ្លាំង បន្ទាប់ពីរុស្ស៊ីបានបើកការឈ្លានពានទ្រង់ទ្រាយធំទៅលើប្រទេសក្បែរខាងរបស់ខ្លួនមួយនេះ ដែលធ្វើឡើងបន្ទាប់ពីការប្រកាសសង្រ្គាមមួយដោយប្រធានាធិបតី លោក វ្លាឌីមៀរ ពូទីន។
ទាក់ទិននឹងករណីនេះ ប្រធានាធិបតីសហរដ្ឋអាមេរិក លោក ចូ បៃឌិន កាលពីពេលកន្លងទៅ ក៏ធ្លាប់បានព្រមានលោកប្រធានាធិបតី ស៊ី ជីនពីង ក្នុងអំឡុងជំនួបតាមរយៈប្រព័ន្ធវីដេអូមួយ អំពីផលវិបាកដែលចិនអាចនឹងទទួលបាន ប្រសិនបើប្រទេសមួយនេះផ្ដល់ការគាំទ្រណាមួយ ដើម្បីជួយឱ្យរុស្ស៊ីរួចផុតពីផលប៉ះពាល់នៃទណ្ឌកម្មរបស់លោកខាងលិច ឬផ្តល់ជំនួយផ្នែកយោធាជាដើមនោះ។
ទោះជាយ៉ាងណា ប្រទេសចិនបានបដិសេធម្ដងហើយម្ដងទៀតនូវផែនការបែបនេះ ក្នុងនោះ ខ្លួនក៏ធ្លាប់ច្រានចោលការអះអាងរបស់មន្ត្រីអាមេរិកដែលថារុស្ស៊ីបានព្យាយាមស្វះស្វែងរកជំនួយយោធាពីខ្លួននៅអ៊ុយក្រែនផងដែរ និងបានចោទអាមេរិកថាបានផ្សព្វផ្សាយព័ត៌មានមិនពិតដែលធ្វើឱ្យស្ថានការណ៍ជម្លោះកាន់តែធ្ងន់ធ្ងរបន្ថែមទៀត៕