រដ្ឋាភិបាលកម្ពុជាចូលរួមរំលែកទុក្ខចំពោះមរណភាពរបស់អតីតនាយករដ្ឋមន្ត្រីជប៉ុន លោក ស៊ិនហ្សូ អាបេ ក្រោយអតីតនាយករដ្ឋមន្ត្រីរូបនេះត្រូវបានខ្មាន់កាំភ្លើងបាញ់ប្រហារ បណ្តាលឱ្យស្លាប់បាត់បង់ជីវិត នៅថ្ងៃសុក្រនេះ។
ក្នុងលិខិតចូលរួមមរណទុក្ខរបស់លោក ហ៊ុន សែន នាយករដ្ឋមន្ត្រីកម្ពុជា ផ្ញើជូនលោក គីស៊ីដា ហ្វីមីអូ នាយករដ្ឋមន្ត្រីជប៉ុន នៅរសៀលថ្ងៃសុក្រនេះ បានលើកឡើងថា តាំងនាមឱ្យរាជរដ្ឋាភិបាល និងប្រជាជនកម្ពុជា លោកសូមសម្តែងនូវការចូលរួមមរណទុក្ខដល់ក្រុមគ្រួសារសព ក៏ដូចជាប្រជាជនជប៉ុន ចំពោះការបាត់បង់ដ៏ធំធេងនេះ។
លោកនាយករដ្ឋមន្ត្រី ហ៊ុន សែន បន្តក្នុងលិខិតនោះថា លោក ស៊ិនហ្សូ អាបេ ជារដ្ឋបុរសជប៉ុនលេចធ្លោមួយរូបដែលត្រូវបានគេទទួលស្គាល់និងលើកសរសើរចំពោះភាពជាអ្នកដឹកនាំប្រកបដោយសមត្ថភាព ក្នុងការជំរុញវឌ្ឍនភាពរបស់ជប៉ុន និងការចួលរួមយ៉ាងសកម្មដល់សន្តិភាព ស្ថិរភាព និងវិបុលភាពនៅក្នុងតំបន់ និងពិភពលោកទាំងមូល ខណៈលោក អេបេ ក៏បានចូលរួមក្នុងការលើកកម្ពស់ទំនាក់ទំនងទ្វេភាគីរវាងកម្ពុជា-ជប៉ុន ក្នុងអាណត្តិដែលលោកជានាយករដ្ឋមន្ត្រីជប៉ុន។
គួរបញ្ជាក់ថា អតីតនាយករដ្ឋមន្ត្រីជប៉ុន លោក ស៊ិនហ្សូ អាបេ បានទទួលមរណភាពនៅរសៀលថ្ងៃទី០៨ ខែកក្កដា ឆ្នាំ២០២២នេះ បន្ទាប់ពីរងការបាញ់ប្រហារ ក្នុងអំឡុងពេលដែលលោកឈរថ្លែងសុន្ទរកថាមួយនៅក្នុងទីក្រុង Nara ភាគខាងលិចប្រទេសជប៉ុន កាលពីព្រឹកមិញនេះ៕