រាជរដ្ឋាភិបាលកម្ពុជា បានប្រកាសថ្កោលទោសចំពោះអំពើបាញ់ប្រហារទៅលើអតីតនាយករដ្ឋមន្ត្រីជប៉ុន លោក ស៊ិនហ្សូ អាបេ (Shinzo Abe) កាលពីម្សិលមិញ ដែលបណ្តាលឱ្យលោកស្លាប់ ក្រោយបញ្ជូនទៅដល់មន្ទីរពេទ្យបានប៉ុន្មានម៉ោង។
កម្ពុជា តាមរយៈក្រសួងការបរទេស និងសហប្រតិបត្តិការអន្តរជាតិ កាលពីថ្ងៃទី៨ ខែកក្កដា ឆ្នាំ២០២២នេះ បានចេញសេចក្តីថ្លែងការណ៍មួយ ដោយថ្កោលទោសចំពោះ ការបាញ់សម្លាប់ លោក ស៊ិនហ្សូ អាបេ (Shinzo Abe) អតីតនាយករដ្ឋមន្ត្រីជប៉ុន អំឡុងយុទ្ធនាការឃោសនាបោះឆ្នោតកាលពីម្សិលមិញ។
ក្រសួងការបរទេស បានសម្តែងនូវភាពសោកសៅ និងតក់ស្លុត ចំពោះការទទួលមរណភាពរបស់ លោក ស៊ិនហ្សូ អាបេ (Shinzo Abe) ក្រោយត្រូវបានបាញ់ប្រហារក្នុងអំឡុងពេលធ្វើយុទ្ធនាការឃោសនាបោះឆ្នោតថ្នាក់ជាតិ នៅភាគខាងលិចទីក្រុងណារ៉ា ប្រទេសជប៉ុន នៅថ្ងៃសុក្រ ទី៨ ខែកក្កដា ឆ្នាំ២០២២។
សេចក្តីថ្លែងការណ៍បានបញ្ជាក់ថា៖ «រាជរដ្ឋាភិបាលកម្ពុជា សូមធ្វើការថ្កោលទោសយ៉ាងខ្លាំងបំផុតចំពោះឃាតកម្មដ៏ព្រៃផ្សៃនេះ»។
ក្រសួងការបរទេសដដែល ក៏បានចាត់ទុក អតីតនាយករដ្ឋមន្ត្រីជប៉ុនរូបនេះ ជាថ្នាក់ដឹកនាំដ៏ឆ្នើមមួយរូបរបស់ជប៉ុន និងជាមិត្តភក្ដិជាទីគោរពស្រលាញ់របស់កម្ពុជា ហើយមរណភាពរបស់ លោក ស៊ិនហ្សូ អាបេ គឺជាការបាត់បង់ដ៏គួរឱ្យសោកសង្រេងបំផុតមួយ ដោយមិនត្រឹមតែសំរាប់ប្រជាជនជប៉ុនប៉ុណ្ណោះទេ ប៉ុន្ដែក៏សំរាប់ប្រជាជនកម្ពុជា ផងដែរ។
សេចក្តីថ្លែងការណ៍ដដែល លើកឡើងថា រាជរដ្ឋាភិបាល និងប្រជាជនកម្ពុជា ក៏បានចូលរួមរំលែកទុក្ខដ៏ជ្រាលជ្រៅ និងសំដែងនូវសមានចិត្តដ៏ស្មោះស្ម័គ្រជាទីបំផុតជូនចំពោះគ្រួសារសពរបស់ ស៊ិនហ្សូ អាបេ រដ្ឋាភិបាល និងប្រជាជនជប៉ុន។
ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសកម្ពុជា លោក ប្រាក់ សុខុន ក៏បានថ្លែងសារចូលរួមជាមួយសហការីរបស់លោកជុំវិញពិភពលោក ក្នុងការកាន់មរណទុក្ខរបស់អតីតនាយករដ្ឋមន្ត្រីជប៉ុនរូបនេះ ដែលជាមិត្តដ៏ល្អរបស់កម្ពុជា។
សាររំលែកមរណទុក្ខរបស់លោក ប្រាក់ សុខុន លើហ្វេសប៊ុកថា៖ «ខ្ញុំសូមចូលរួមរំលែកទុក្ខយ៉ាងក្រៀមក្រំបំផុតទៅកាន់ក្រុមគ្រួសារ និងមិត្តភ័ក្តិរបស់ ឯកឧត្តម ក៏ដូចជាប្រជាជនជប៉ុន ចំពោះភាពសោកសង្រេង និងការបាត់បង់ដ៏ធំធេងមួយនេះ។ សមិទ្ធិផលរបស់ឯកឧត្តមទាំងប៉ុន្មាននឹងត្រូវបានមនុស្សរាល់គ្នាចងចាំ និងវាយតម្លៃខ្ពស់ពីមួយជំនាន់ទៅមួយជំនាន់»។
អតីតនាយករដ្ឋមន្ត្រីជប៉ុន លោក សិនហ្សូ អាបេ បានទទួលមរណភាព នៅរសៀលថ្ងៃទី៨ ខែកក្កដា ឆ្នាំ២០២២នេះ នៅមន្ទីរពេទ្យមួយក្នុងប្រទេសនេះ បន្ទាប់ពីរងការបាញ់ប្រហារ អំឡុងពេលថ្លែងសុន្ទរកថាមួយ ក្នុងទីក្រុង Nara ភាគខាងលិចប្រទេសជប៉ុន កាលពីព្រឹកមិញ។
សម្រាប់ប្រធានគណបក្សសង្រ្គោះជាតិ លោក កឹម សុខា វិញ កាលពីម្សិលមិញ បានបង្ហោះសារ រំលែកទុក្ខជូនចំពោះឯកអគ្គរាជទូតជប៉ុនប្រចាំនៅកម្ពុជា និងក្រុមគ្រួសារលោក ស៊ិនហ្សូ អាបេ ដោយថា ការបាញ់ប្រហារនោះ គឺជាអំពើឃាតកម្មយ៉ាងព្រៃផ្សៃ។
លោក កឹម សុខា បង្ហោះសារលើហ្វេសប៊ុកថា៖ «ក្នុងឱកាសដ៏សោកសង្រេងនេះ ខ្ញុំ និងក្រុមគ្រួសារ ព្រមទាំងសហការី ក៏ដូចជាប្រជាពលរដ្ឋខ្មែរ សូមសម្តែងនូវការរំលែកទុក្ខដ៏ក្រៀមក្រំបំផុត ជូនចំពោះក្រុមគ្រួសារសពឯកឧត្តម Shinzo Abe ព្រមទាំងប្រជាពលរដ្ឋជប៉ុន នូវការបាត់បង់ឣ្នកជាទីគោរព ស្រឡាញ់ដ៏ធំធេងនេះ។ជាមួយនេះដែរ ខ្ញុំសូមឧទ្ទិសបួងសួង សូមឱ្យដួងវិញាណក្ខន្ធ ឯកឧត្តម Shinzo Abe បានទៅកាន់សុគតិភពកុំបីឃ្លៀងឃ្លាតឡើយ។
នៅព្រឹកថ្ងៃទី៩ ខែកក្កដា ឆ្នាំ២០២២ នេះ លោកនាយករដ្ឋមន្ត្រី ហ៊ុន សែន បានថ្លែងសារពិសេស និងប្រកាសចូលរួមកាន់ទុក្ខទូទាំងប្រទេស នៅថ្ងៃទី១០ ខែកក្កដា ឆ្នាំ២០២២ ចំពោះមរណភាព លោក អាបេ ស៊ិនហ្សូ អតីតនាយករដ្ឋមន្ត្រីជប៉ុន។ លោកមានប្រសាសន៍ថា មរណភាពរបស់លោក អាបេ មិនត្រឹមតែជាការបាត់ប្រកបដោយភាពសោកស្តាយ តក់ស្លុត រន្ធត់ និងអាឡោះអាល័យសម្រាប់តែប្រជាពលរដ្ឋជប៉ុនប៉ុណ្ណោះ តែសម្រាប់ប្រជាពលរដ្ឋនៅលើពិភពលោក រួមទាំងប្រជាពលរដ្ឋកម្ពុជាផងដែរ។
លោកបញ្ជាក់ថា៖«ក្នុងការកាន់តំណែងជានាយករដ្ឋមន្ត្រីជប៉ុនទាំងពីរលើកឯកឧត្តម អាបេ ស៊ិនហ្សូ បានប្រឹងប្រែងយ៉ាងខ្លាំងដល់ការជំរុញទំនាក់ទំនងរវាងជប៉ុន និងកម្ពុជា រហូតក្លាយទៅជាដៃគូយុទ្ធសាស្ត្រនៅឆ្នាំ២០១៣។ បន្ថែមពីលើនោះ ឯកឧត្តម អាបេ ក៏បានជំរុញនូវការផ្តល់ជំនួយគាំទ្រដល់ការអភិវឌ្ឍគ្រប់វិស័យនៅកម្ពុជា រួមទាំងហេដ្ឋារចនាសម្ព័ន្ធផងដែរ។ ឯកឧត្តម អាបេ ក៏ជានាយករដ្ឋមន្ត្រី ដែលបានជំរុញដល់ទំនាក់ទំនងរវាងអាស៊ាន និងជប៉ុន និងជំរុញដល់ទំនាក់ទំនងមេគង្គ-ជប៉ុនផងដែរ»។
លោក ហ៊ុន សែន បន្ថែមថា ដើម្បីសម្តែងនូវការដឹងគុណចំពោះមនោសញ្ចេតនាការស្រឡាញ់ដ៏ស្មោះត្រង់របស់លោក អាបេ កម្ពុជាសម្រេចឱ្យមានការកាន់មរណទុក្ខនៅទូទាំងប្រទេសមួយថ្ងៃ គឺនៅថ្ងៃអាទិត្យ ទី១០ ខែកក្កដា ឆ្នាំ២០២២។ លើសពីនេះលោក ក៏បានណែនាំដល់គណៈកម្មាធិការបុណ្យជាតិ និងអន្តរជាតិ ឱ្យយកចិត្តទុកដាក់រៀបចំការកាន់មរណទុក្ខនេះ ដោយតម្រូវឱ្យមានការបង្ហូតទង់ជាតិនៅពាក់កណ្តាលដង នៅតាមសាលារៀន និងតាមក្រសួង ស្ថាប័ននានារបស់ជាតិ៕
