ចក្រភពអង់គ្លេសត្រូវបានព្យាករថា នឹងត្រូវរងនូវសីតុណ្ហភាពក្ដៅខ្លាំងបំផុតរហូតដល់កម្រិត៤០អង្សារសេជាលើកដំបូងក្នុងសប្ដាហ៍នេះ។
រដ្ឋាភិបាលរបស់ចក្រភពអង់គ្លេសបានចេញសេចក្តីជូនដំណឹងបន្ទាន់មួយឱ្យប្រជាពលរដ្ឋមានការប្រុងប្រយ័ត្នខ្ពស់ ខណៈសីតុណ្ហភាពត្រូវបានគេព្យាករថានឹងអាចឡើងលើសពីកំណត់ត្រាចាស់៣៨,៧អង្សារសេ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ជាមួយគ្នានេះ រដ្ឋមន្ត្រីទាំងឡាយក៏បានជំរុញឱ្យសាធារណជនស្នាក់នៅក្នុងផ្ទះ កុំធ្វើដំណើរចេញក្រៅបើគ្មានការចាំបាច់ ខណៈសេវាកម្មរថភ្លើង និងសាលារៀនមួយចំនួនក៏ត្រូវបានផ្អាកដំណើរការផងដែរ។
គួរបញ្ជាក់ថា ភាគច្រើននៃទ្វីបអឺរ៉ុបបច្ចុប្បន្នកំពុងតែទទួលរងនូវបញ្ហារលកកម្ដៅដែលបានរុញសីតុណ្ហភាពឱ្យឡើងដល់រង្វង់៤០អង្សារសេនៅក្នុងតំបន់មួយចំនួន ខណៈករណីនេះក៏បានបង្កឱ្យមានជាភ្លើងឆេះព្រៃក្នុងតំបន់ជនបទមួយចំនួនក្នុងប្រទេសព័រទុយហ្គាល់ អេស៉្បាញ និងបារាំងផងដែរ៕
