ក្រសួងការងារ និងបណ្ដុះបណ្ដាលវិជ្ជាជីវៈ នឹងចុះជំរឿននិងផ្ទៀងផ្ទាត់ទិន្នន័យចាក់វ៉ាក់សាំងកូវីដ-១៩របស់កម្មករនិយោជិតនៅតាមរោងចក្រសហគ្រាសនានា នៅដើមខែសីហា ឆ្នាំ២០២២។
អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានឱ្យដឹងតាមរយៈសារលើទំព័រហ្វេសប៊ុករបស់លោកនៅថ្ងៃអង្គារម្សិលមិញថា ការបន្តចាក់វ៉ាក់សាំងដូសជំរុញ តាមការកំណត់របស់ក្រសួងសុខាភិបាល នៅតែជាជម្រើសដ៏ល្អបំផុតក្នុងការការពារអាយុជីវិតខ្លួននិងសមាជិកក្រុមគ្រួសារ។ លោកបន្តថា ក្រសួងនឹងចុះជំរឿននិងផ្ទៀងផ្ទាត់ទិន្នន័យចាក់វ៉ាក់សាំងរបស់កម្មករ។
លោកថា៖ «ម្ចាស់ និងអ្នករដ្ឋបាលរោងចក្រសហគ្រាស ត្រូវធ្វើបច្ចុប្បន្នភាពទិន្នន័យពាក់ព័ន្ធនឹងការចាក់វ៉ាក់សាំង[កូវីដ-១៩] ដូសជំរុញនេះដោយខ្លួនឯង មុននឹងអធិការពេទ្យការងារ និងអធិការការងារ ចុះជំរឿននាដើមខែសីហា ឆ្នាំ២០២២នេះ»។
កាលពីថ្ងៃទី១៨ ខែកក្កដា ឆ្នាំ២០២២ ក្រសួងការងារ និងបណ្តុះបណ្តាលវិជ្ជាជីវៈ បានចេញសេចក្ដីជូនដំណឹងមួយដល់ម្ចាស់ឬនាយករោងចក្រសហគ្រាស ត្រូវសហការជាមួយអាជ្ញាធរមូលដ្ឋានរាជធានី-ខេត្ត និងមន្ទីរការងារនិងបណ្ដុះបណ្ដាលវិជ្ជាជីវៈរាជធានី-ខេត្ត ណែនាំដល់កម្មករនិយោជិតទៅចាក់វ៉ាក់សាំងដូសជំរុញ។ ក្រៅពីនោះ ក្រសួងក៏បានណែនាំដល់ម្ចាស់រោងចក្រសហគ្រាស ត្រូវធ្វើបច្ចុប្បន្នភាពព័ត៌មានរោងចក្រសហគ្រាស និងចំនួនកម្មករនិយោជិតតាមរយៈគេហទំព័រ lacms.mlvt.gov.kh និងត្រូវរៀបចំបង្កើតក្រុមការងារសុវត្ថិភាព និងសុខភាពការងារប្រចាំរោងចក្រការងារ ឱ្យបានត្រឹមត្រូវ ដោយអធិការការងារនឹងចុះពិនិត្យលើទិន្នន័យនោះ។
ក្រសួងបានបញ្ជាក់ទៀតថា ក្នុងករណីម្ចាស់ឬនាយករោងចក្រសហគ្រាសមិនអនុវត្តតាមសេចក្តីជូនដំណឹងនេះ នឹងត្រូវទទួលរងការពិន័យ និងចាត់វិធានការតាមផ្លូវច្បាប់ពីអធិការការងារ៕