គណៈកម្មាធិការជាតិគ្រប់គ្រងគ្រោះមហន្តរាយ បានឱ្យដឹងថា រយៈពេល៦ខែដើមឆ្នាំ២០២២នេះ គ្រោះមហន្តរាយដោយធម្មជាតិទាក់ទងនឹងអាកាសធាតុបណ្ដាលឱ្យមនុស្សចំនួន៣៤នាក់ស្លាប់ និង៥៤នាក់រងរបួសនៅកម្ពុជា។
របាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ (គ.ជ.គ.ម) បានបញ្ជាក់ថា រយៈពេល៥ខែដើមឆ្នាំ២០២២ ផលប៉ះពាល់ដោយសារអាកាសធាតុនៅកម្ពុជាមានការថយចុះពាក់កណ្ដាល ប្រៀបធៀបនឹងរយៈពេលដូចគ្នាកាលពី៥ខែដើមឆ្នាំ២០២១។ ដោយឡែក ក្នុងរយៈពេលមួយខែមិថុនា ឆ្នាំ២០២២នេះវិញ ក៏មានគ្រោះមហន្តរាយដោយធម្មជាតិ ដូចជា ខ្យល់កន្ត្រាក់ និងការជន់លិចដោយជំនន់ទឹកភ្លៀងផងដែរ។
គណៈកម្មាធិការជាតិដដែលបានឱ្យដឹងថា សម្រាប់ពេល៥ខែដើមឆ្នាំនេះ ករណីខ្យល់កន្រ្តាក់កើតឡើងចំនួន៧៩លើក បណ្ដាលឱ្យផ្ទះរលំ និងខូចខាតធ្ងន់ចំនួន៥២៧ខ្នង មនុស្សស្លាប់២នាក់ របួស១៦នាក់ និងករណីរន្ទះបាញ់មនុស្សស្លាប់ចំនួន២២នាក់ មនុស្សរបួសចំនួន១៧នាក់ និងស្លាប់គោក្របីចំនួន៥៣ក្បាល។
តាមរបាយការណ៍របស់ គ.ជ.គ.ម បានឱ្យដឹងទៀតថា រយៈពេល១ខែមិថុនា ឆ្នាំ២០២២វិញ មានករណីគ្រោះធម្មជាតិរន្ទះបាញ់បានកើតឡើងចំនួន១៣លើក នៅមូលដ្ឋានខេត្តចំនួន៩ ដែលបណ្ដាលឱ្យមនុស្សស្លាប់១០នាក់ ក្នុងនោះមានស្រី៥ និងរបួស៩នាក់។ រីឯគោក្របី ១៦ក្បាលបានស្លាប់ផងដែរ។ ក្នុងរយៈពេល១ខែនេះដែរ ក៏មានករណីខ្យល់កន្ត្រាក់ចំនួន៣១លើក នៅរាជធានី-ខេត្តចំនួន១៨ ដែលបណ្តាលឱ្យមានពលរដ្ឋរងរបួសចំនួន១២នាក់។
គណៈកម្មាធិការជាតិគ្រប់គ្រងគ្រោះមហន្តរាយបានឱ្យដឹងថា ខ្យល់កន្ត្រាក់ និងរន្ទះបាញ់ តែងតែកើតមានរាល់ឆ្នាំ ទោះតិចឬច្រើន ដែលតម្រូវឱ្យមានការប្រុងប្រយ័ត្ន ពិសេសក្នុងរដូវវស្សា។ បន្ថែមពីនេះ អ្វីដែលជាប្រការសំខាន់ គឺការប៉ះពាល់ដោយជំនន់ទឹកភ្លៀង ដោយបរិមាណទឹកភ្លៀងធ្លាក់ច្រើនជាបន្តបន្ទាប់ ចាប់ពីដំណាច់ខែឧសភា មកដល់ដើមខែមិថុនា បណ្តាលឱ្យមានការជន់លិចនៅតាមតំបន់ទំនាប និងទីប្រជុំជន ក្នុងរយៈពេលខ្លី និងបង្កឱ្យមានការប៉ះពាល់និងខូចខាតដំណាំស្រូវនិងដំណាំរួមផ្សំរបស់ប្រជាពលរដ្ឋមួយចំនួន។
ទេសរដ្ឋមន្ត្រី និងជាអនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ លោក គន់ គីម បានលើកឡើងក្នុងរបាយការណ៍សង្ខេបនោះ ដោយអំពាវនាវជូនដល់ប្រជាពលរដ្ឋ និងអាជ្ញាធរពាក់ព័ន្ធគ្រប់លំដាប់ថ្នាក់ ឱ្យត្រៀមលក្ខណៈនិងប្រុងប្រយ័ត្នក្នុងរដូវវស្សានេះ ដែលគ្រោះមហន្តរាយដោយធម្មជាតិអាចនឹងកើតមានជាយថាហេតុ៕