តុលាការកំពូល នៅព្រឹកថ្ងៃសុក្រនេះ បានប្រកាសសាលដីកាសម្រេចឱ្យអ្នកស្រី ប៉ែន មុំ អតីតអនុប្រធានគណបក្សសង្រ្គោះជាតិ នៅឃុំកណ្ដាល ខេត្តកំពត បន្តជាប់ពន្ធនាគាររយៈពេល៣ឆ្នាំ។
ការសម្រេចរបស់តុលាការកំពូលនៅពេលនេះ គឺជាការរក្សាសេចក្ដីសម្រេចរបស់សាលាឧទ្ធរណ៍ ដោយកន្លងទៅ បានផ្ដន្ទាទោសអ្នកស្រី ប៉ែន មុំ ជាប់ពន្ធនាគាររយៈពេល៣ឆ្នាំ។
អ្នកស្រី ប៉ែន មុំ ដែលរហូតដល់ពេលនេះបានជាប់ពន្ធនាគារអស់រយៈពេលជិតពីរឆ្នាំមកហើយនោះ ត្រូវបានតុលាការខេត្តកំពតចោទប្រកាន់ពីបទ «រួមគំនិតក្បត់» ដោយថា អ្នកស្រីបានគាំទ្រដំណើរមាតុភូមិនិវត្តន៍ចូលកម្ពុជាវិញរបស់លោក សម រង្ស៊ី កាលពីខែវិច្ឆិកា ឆ្នាំ២០១៩។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ដែលបានចូលរួមឃ្លាំមើលអង្គសវនាការនៅព្រឹកនេះ បានលើកឡើងថា អ្នកស្រី ប៉ែន មុំ គឺជាអ្នកនយោបាយម្នាក់ដែលបានបញ្ចេញមតិ តែត្រូវបានតុលាការចោទប្រកាន់និងផ្ដន្ទាទោសឱ្យជាប់ពន្ធនាគារនេះ ហាក់មិនស្របនឹងផ្លូវច្បាប់នោះទេ តែជាការធ្វើទុក្ខបុកម្នេញនយោបាយច្រើនជាង។
លោកថា៖ «សម្រាប់យើង ជាការយល់ឃើញ សម្រាប់សកម្មជននយោបាយ និងដំណើរការនីតិវិធីផ្លូវច្បាប់នេះ យើងឃើញវាមិនមែនជាការអនុវត្តច្បាប់អ្វីទេ ដែលយើងតែងតែនិយាយថាជាការធ្វើទុក្ខបុកម្នេញច្រើនជាងការអនុវត្តច្បាប់»។
វីអូឌី មិនទាន់អាចសុំការបញ្ជាក់បន្ថែមពីមេធាវីការពារសិទ្ធិរបស់អ្នកស្រី ប៉ែន មុំ គឺលោក សំ សុគង់ បានទេ នៅថ្ងៃសុក្រនេះ។
អ្នកស្រី ប៉ែន មុំ គឺជាមនុស្សម្នាក់ក្នុងចំណោមមេដឹកនាំ សមាជិក សកម្មជន និងអ្នកគាំទ្រ គណបក្សសង្គ្រោះជាតិដែលត្រូវបានតុលាការរំលាយ ជាង១០០នាក់ ត្រូវបានសមត្ថកិច្ចចាប់ខ្លួនតាំងពីឆ្នាំ២០១៩ ហើយអ្នកទាំងនោះភាគច្រើនត្រូវបានកាត់ទោសពីបទឧក្រិដ្ឋធ្ងន់ធ្ងរ ដូចជា ការរួមគំនិតក្បត់ និងការវាយប្រហារប្រឆាំងរដ្ឋាភិបាល ខណៈជាច្រើននាក់ផ្សេងទៀតកំពុងនៅក្រៅប្រទេស និងមិនត្រូវបានកាត់ទោសឱ្យជាប់ពន្ធនាគារឡើយ។
នៅក្នុងការកាត់ទោសទ្រង់ទ្រាយធំ កាលពីខែមិថុនា ឆ្នាំ២០២២ មន្រ្តី សមាជិក និងសកម្មជន គណបក្សសង្រ្គោះជាតិដែលត្រូវបានតុលាការរំលាយជាង៥១នាក់ ត្រូវបានសាលាដំបូងរាជធានីភ្នំពេញផ្ដន្ទាទោសឱ្យជាប់ពន្ធនាគារចន្លោះពី៦ដល់៨ឆ្នាំ ពីបទ «ញុះញង់ និងរួមគំនិតក្បត់»៕
