តុលាការកំពូល នៅថ្ងៃសុក្រនេះ បានតម្កល់សាលដីកាសាលាឧទ្ធរណ៍លើសំណុំរឿង «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» លើយុវជនចលនាមាតាធម្មជាតិ ៣នាក់ ទុកជាបានការដដែល។
យុវជនចលនាមាតាធម្មជាតិទាំង៣នាក់ រួមមាន លោក ថុន រដ្ឋា កញ្ញា ភួន កែវរស្មី និងកញ្ញា ឡុង គន្ធា ត្រូវបានតុលាការជាន់ទាបកាត់ទោសជាប់ពន្ធនាគារចន្លោះពី១៨ខែ ទៅ២០ខែ កាលពីខែឧសភា ឆ្នាំ២០២១ ក្រោមបទចោទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» ប្រព្រឹត្តកាលពីអំឡុងឆ្នាំ២០១៣ ដល់ឆ្នាំ២០២០ បន្ទាប់ពីពួកគេបានធ្វើសកម្មភាពរិះគន់បញ្ហាបរិស្ថាននៅកម្ពុជា ដូចជា ការលុបបឹងតាមោក ការបង្ហូរទឹកស្អុយដោយគ្មានបច្ចេកទេស បញ្ហាសំរាម ដើម្បីទាមទារឱ្យថ្នាក់ដឹកនាំដោះស្រាយ។
ប្រធានក្រុមប្រឹក្សាជំនុំជម្រះនៃតុលាការកំពូល លោក និល ណុន បានប្រកាសនៅក្នុងសវនាការនៅថ្ងៃសុក្រនេះ ដោយបដិសេធបណ្ដឹងសាទុក្ខរបស់មេធាវីការពារក្ដីឱ្យយុវជនមាតាធម្មជាតិ និងសម្រេចតម្កល់សាលក្រមរបស់សាលាឧទ្ធរណ៍រាជធានីភ្នំពេញ ទុកជាបានការដដែល។
កញ្ញា ភួន កែវរស្មី មានប្រសាសន៍នៅមុខតុលាការកំពូលនៅព្រឹកនេះថា ការសម្រេចរបស់តុលាការកំពូលនៅពេលនេះធ្វើឱ្យពួកគាត់នៅជាប់ទោស បើទោះបីជាបច្ចុប្បន្នបាននៅក្រៅឃុំបណ្ដោះអាសន្នក៏ដោយ។ កញ្ញាចាត់ទុកការសម្រេចនេះថាជារឿងអយុត្តិធម៌ ខណៈដែលពួកគេមិនបានប្រព្រឹត្តកំហុសដូចការចោទប្រកាន់។
កញ្ញាបានលើកឡើងថា៖ «ពួកយើងនៅតែនិយាយដដែលអ៊ីចឹង ពួកយើងជាជនស្អាតស្អំ ហើយយើងគិតថា យើងមានសង្ឃឹមចំពោះតុលាការកំពូលហើយបានយើងខំដើរឱ្យអស់នីតិវិធី ដោយសង្ឃឹមថាខ្លួនឯងបានទទួលយុត្តិធម៌ ប៉ុន្តែឥលូវយើងនៅតែរងនូវអំពើអយុត្តិធម៌ដដែលពីខាងតុលាការកំពូល ដែលសម្រេចឱ្យពួកយើងនៅមានបទចោទ ហើយនិងនៅក្រៅឃុំដោយមានទាំងបទល្មើស រួមគំនិតក្បត់ផង ហើយនិងញុះញង់ផង ហើយមួយទៀតយើងត្រូវស្ថិតនៅក្រោមការត្រួតពិនិត្យ[របស់តុលាការ]ទៀត»។
កញ្ញា ភួន កែវរស្មី នៅតែបញ្ជាក់ដដែលថា សកម្មភាពរបស់ពួកគាត់នាពេលកន្លងមក គឺធ្វើឡើងក្នុងគោលបំណងការពារធនធានធម្មជាតិ ដែលជាប្រយោជន៍រួមសម្រាប់ប្រទេសជាតិ ហើយការស៊ើបអង្កេតនោះទៀតសោត ក៏ធ្វើឡើងដោយមានប្រភពច្បាស់លាស់ និងពុំមានចេតនាណាមួយទៅញុះញង់បង្កឱ្យប៉ះពាល់ដល់សង្គមឬស្ថាប័នណាមួយនោះដែរ។
បើទោះមានបទចោទនៅតុលាការ កញ្ញា រស្មី និយាយថា ពួកគេនៅតែបន្តសកម្មភាពនានា ដើម្បីការពារបរិស្ថាន ធនធានធម្មជាតិ និងធ្វើយុទ្ធនាការនានា ដើម្បីទាមទារឱ្យមានការទម្លាក់បទចោទទៅលើពួកគេ។
នាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្សលីកាដូ លោក អំ សំអាត បង្ហាញការសោកស្តាយចំពោះការសម្រេចរបស់តុលាការកំពូល ជុំវិញសំណុំរឿងរបស់យុវជនទាំង៣នាក់នៃចលនាមាតាធម្មជាតិ។ លោកសង្កេតឃើញថា យុវជនទាំងនោះបានចូលរួមយ៉ាងសកម្មនៅក្នុងកិច្ចគាំពារធនធានធម្មជាតិ និងបរិស្ថាន ព្រមទាំងបានលើកពីបញ្ហាប្រឈមជារួមរបស់ទាំងអស់គ្នាមកបង្ហាញ ដើម្បីជំរុញឱ្យមានដំណោះស្រាយ ដែលករណីនេះ ស័ក្តិសមនឹងទទួលបានការលើកទឹកចិត្ត។
លោកថា៖ «យុវជនទាំងអស់ហ្នឹង គាត់បំពេញការងារជាអ្នកបរិស្ថាន ដើម្បីជួយការពារបរិស្ថាននៅក្នុងប្រទេសកម្ពុជាយើង អ៊ីចឹងមិនគួរណាត្រូវបានចោទប្រកាន់ និងផ្ដន្ទាទោសពួកគាត់ទេ។ […] សកម្មភាពរបស់យុវជនការពារបរិស្ថានកន្លងមក វាគួរតែទទួលបាននូវការគាំទ្រ និងការកោតសរសើរ ដើម្បីឱ្យមានការចូលរួមសស្រាក់សស្រាំងនៅក្នុងកិច្ចការពារបរិស្ថាន និងធនធានធម្មជាតិហ្នឹង»។
មន្ត្រីសង្គមស៊ីវិលរូបនេះថា យុវជនបរិស្ថានទាំងនេះមិនគួរណារងការចោទប្រកាន់ គំរាមកំហែង និងបំភិតបំភ័យបែបនេះឡើយ បើទោះបច្ចុប្បន្នពួកគេបាននៅក្រៅឃុំក៏ដោយ ប៉ុន្តែពួកគេក៏នៅតែស្ថិតក្រោមយុត្តាធិការរបស់តុលាការដដែល។
គួរបញ្ជាក់ថា ក្រៅពីការជាប់ទោសពាក់ព័ន្ធនឹងបទញុះញង់នេះ យុវជនចលនាមាតាធម្មជាតិទាំង៣រូបក៏នៅជាប់បណ្តឹងមួយទៀតនៅសាលាដំបូងរាជធានីភ្នំពេញ ពាក់ព័ន្ធនឹងបទ «រួមគំនិតក្បត់» ផងដែរ ដែលមកដល់ពេលនេះ តុលាការនៅមិនទាន់បើកសវនាការនៅឡើយ៕
