ពលរដ្ឋនៅខេត្តមណ្ឌលគិរី អះអាងថា ផ្លូវមួយខ្សែនៅក្នុងតំបន់ត្រូវបានបិទដោយម្ចាស់ដីឯកជន ប៉ុន្តែពួកគាត់មិនច្បាស់ថាអ្នកណាជាអ្នកនៅពីក្រោយការអភិវឌ្ឍនោះទេ ខណៈអាជ្ញាធរឃុំថាមិនបានដឹងរឿងនេះ។
លោក បូរ៉េត កំពី ប្រជាពលរដ្ឋរស់នៅឃុំដាក់ដាំ ស្រុកអូររាំង បាននិយាយកាលពីថ្ងៃសុក្រថា កាលពីដើមខែនេះ មានក្រុមហ៊ុនអភិវឌ្ឍន៍មួយបានឈូសឆាយផ្លូវមួយខ្សែនៅក្នុងភូមិពូឡេះ ទៅកាន់ដីមួយកន្លែងដែលកំពុងឈូសឆាយ និងបានសាងសង់របងបិទផ្លូវ។
លោក កំពី បន្តថា ប្រជាពលរដ្ឋប្រើប្រាស់ផ្លូវមួយខ្សែនេះជាយូរមកហើយ។
នៅពេលសួរអំពីភាពស្របច្បាប់នៃរបងនេះ គាត់និយាយថា ផ្លូវនេះគឺជាទ្រព្យសម្បត្តិសាធារណៈ។
លោកបន្តថា៖ «ផ្លូវនេះគឺសម្រាប់បម្រើផលប្រយោជន៍សាធារណៈ»។
លោកបន្ថែមទៀតថា របងនេះត្រូវបានសាងសង់បន្ទាប់ពីពលរដ្ឋផ្ទុះការតវ៉ាកាលពីខែឧសភា ពីព្រោះពួកគេបានឃើញគេយកគ្រឿងចក្រឈូសឆាយចូលក្នុងតំបន់នេះ។
អ្នកភូមិម្នាក់ទៀតឈ្មោះ ច្រូត ខ្លូត បាននិយាយថា លោកមិនដឹងថាអ្នកណាជាអ្នកអភិវឌ្ឍនោះទេ។ លោកបង្ហាញការខកចិត្តចំពោះការបិទផ្លូវនេះ ខណៈបច្ចុប្បន្ន អ្នកភូមិត្រូវចំណាយពេលយូរក្នុងការធ្វើដំណើរក្នុងតំបន់នេះ។
ទោះយ៉ាងណា លោកថា មានផ្លូវវាងថ្មីមួយទៀត ដែលមិនសូវពិបាកក្នុងការធ្វើដំណើរនោះទេ។ លោកបន្ថែមថា ប្រជាពលរដ្ឋបានប្តឹងទៅក្រសួងរៀបចំដែនដី ប៉ុន្តែមិនមានការឆ្លើយតបឡើយ។
មេឃុំដាក់ដាំ លោក ចាស់ ណា មានប្រសាសន៍ថា លោកមិនបានដឹងអំពីបញ្ហានេះទេ មិនថាការបិទផ្លូវ ការសាងសង់ផ្លូវវាងថ្មី ឬការតវ៉ារបស់ប្រជាពលរដ្ឋនៅសាលាឃុំ កាលពីខែឧសភា។
លោកថា៖ «ខ្ញុំមិនទាន់បានទៅទីនោះទេ។ នរណាប្រាប់អ្នកអំពីរឿងនេះ? រហូតមកដល់ពេលនេះ ខ្ញុំមិនដឹងអ្វីអំពីរឿងនោះទេ។ បើខ្ញុំដឹង ខ្ញុំនឹងប្រាប់អ្នក»។
លោកបន្តថា៖ «មិនចាំបាច់និយាយអំពីរឿងនេះទេ។ ប្រសិនបើពួកគេមានការព្រួយបារម្ភ ពួកគេដាក់ពាក្យបណ្ដឹងទៅ»។
លោក កំពី ជាពលរដ្ឋនៅក្នុងឃុំនេះ បានលើកឡើងពីភាពព្រងើយកន្តើយរបស់អាជ្ញាធរឃុំ ដោយថា ប្រជាពលរដ្ឋប្រមាណ២០នាក់បានតវ៉ានៅខាងក្រៅសាលាឃុំ កាលពីខែឧសភា ហើយបានជួបមេឃុំ លោក ចាស់ ណា។
លោកបន្តថា៖ «តើគាត់ធ្វើការដើម្បីអ្វី បើគាត់មិនដឹង? អ៊ីចឹងគាត់ធ្វើការទាំងមិនដឹងអ្វីសោះ? តើប្រជាពលរដ្ឋបានទៅជួបនរណានៅសាលាឃុំ?»
លោក អ៊ាង វុទ្ធី នាយកផ្នែកសិទ្ធិដីធ្លី នៃអង្គការសមធម៌កម្ពុជា មានប្រសាសន៍ថា ប្រសិនបើប្រជាពលរដ្ឋប្រើប្រាស់ផ្លូវនេះជាយូរមកហើយ គួរតែប្រគល់ឱ្យពួកគាត់វិញ។ លោកបន្តថា ចំពោះការអភិវឌ្ឍណាមួយ គួរតែមានកិច្ចព្រមព្រៀង និងមានការចូលរួមពីប្រជាពលរដ្ឋ។
លោកបន្តថា៖ «យោងតាមច្បាប់ ប្រសិនបើផ្លូវនេះជាផ្លូវសាធារណៈដែលប្រជាពលរដ្ឋប្រើប្រាស់ជាយូរមកហើយ យើងមិនអាចបិទផ្លូវនេះបានឡើយ។ ពួកគេត្រូវបើកផ្លូវនេះវិញឱ្យប្រជាពលរដ្ឋ។ វាជាទ្រព្យសម្បត្តិសាធារណៈ។ យើងក៏ត្រូវសិក្សាពីផលប៉ះពាល់នៃការបិទផ្លូវចំពោះផលប្រយោជន៍របស់ប្រជាពលរដ្ឋដែរ»៕
បកប្រែនិងសម្រួលដោយលោក លី សេងហន ចេញពីអត្ថបទដើមភាសាអង់គ្លេស៖ Mondulkiri Road Blocked by Private Development, Residents Say