ប្រធានរដ្ឋសភាសហរដ្ឋអាមេរិក លោកស្រី ណានស៊ី ផេឡូស៊ី (Nancy Pelosi)បានធ្វើដំណើរទៅដល់កោះតៃវ៉ាន់ហើយនៅយប់ថ្ងៃអង្គារនេះ។ នេះបើតាមកាសែត The New York Times ចេញផ្សាយនៅថ្ងៃអង្គារនេះ។
នៅក្នុងសេចក្តីថ្លែងការណ៍មួយដែលបានចេញផ្សាយភ្លាមៗ បន្ទាប់ពីការទៅដល់របស់ខ្លួន ប្រធានសភាសហរដ្ឋអាមេរិករូបនេះបានឱ្យដឹងថា ដំណើរទស្សនកិច្ចនេះ គឺជាសញ្ញាមួយដែលបង្ហាញឱ្យឃើញពីការប្តេជ្ញាចិត្តមិនផ្លាស់ប្តូររបស់អាមេរិកក្នុងការគាំទ្រលទ្ធិប្រជាធិបតេយ្យដ៏រស់រវើករបស់តៃវ៉ាន់។
លោកស្រីបន្តថា៖ «សាមគ្គីភាពរបស់អាមេរិកដែលមានជាមួយនឹងប្រជាជន ២៣លាននាក់នៃកោះតៃវ៉ាន់នេះ គឺពិតជាមានសារៈសំខាន់ជាងពេលណាៗទាំងអស់»។
យោងតាមប្រភពស្និទ្ធនឹងលោកស្រី ណានស៊ី ផេឡូស៊ី បានឱ្យដឹងថា ដំណើរទស្សនកិច្ចរបស់លោកស្រី គឺភាគច្រើនផ្ដោតសំខាន់លើការជួបប្រជុំជាមួយប្រធានាធិបតីតៃវ៉ាន់ លោកស្រី សៃ អ៊ីងវេន (Tsai Ing-wen) ដែលនឹងត្រូវធ្វើឡើងនៅថ្ងៃពុធ ក្នុងសប្តាហ៍នេះ។
គួរបញ្ជាក់ថា ចិនដែលតែងតែអះអាងថា កោះតៃវ៉ាន់គឺជាទឹកដីរបស់ខ្លួន ក៏បានព្រមានចាត់វិធានការទាំងឡាយ ទាក់ទិននឹងដំណើរទស្សនកិច្ចរបស់លោកស្រី ផេឡូស៊ី ទៅកាន់ដែនកោះមួយនេះផងដែរ។
ទោះជាយ៉ាងណា សហរដ្ឋអាមេរិកបានឆ្លើយតបថា ការព្រមាននេះនឹងមិនមានឥទ្ធិពលអ្វីលើខ្លួនឡើយ ខណៈពួកគេថា លោកស្រី ផេឡូស៊ី មានសិទ្ធិទៅកាន់កោះតៃវ៉ាន់គ្រប់ពេលវេលា៕
