ប្រធានាធិបតីតៃវ៉ាន់ លោកស្រី សៃ អ៊ីងវេន (Tsai Ing-wen) នៅថ្ងៃពុធនេះ បានថ្លែងអំណរគុណដល់ប្រធានរដ្ឋសភាសហរដ្ឋអាមេរិក លោកស្រី ណានស៊ី ផេឡូស៊ី (Nancy Pelosi) សម្រាប់សកម្មភាពជាក់ស្ដែងរបស់លោកស្រី ក្នុងការបង្ហាញការគាំទ្រតៃវ៉ាន់ក្នុងគ្រាដ៏សំខាន់នេះ ខណៈលោកស្រីថា កោះមួយនេះនឹងមិនចុះញ៉មដោយការគំរាមកំហែងផ្នែកយោធាណាមួយឡើយ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ការថ្លែងអះអាងនេះត្រូវបានធ្វើឡើង ខណៈភាគីទាំងពីរបានជួបគ្នានៅទីក្រុងតៃប៉ិ នៅព្រឹកថ្ងៃពុធនេះ ក្នុងដំណើរទស្សនកិច្ចរបស់លោកស្រី ណានស៊ី ផេឡូស៊ី ទៅកាន់កោះមួយនេះ ដែលបានបង្កឱ្យមានជាការខឹងសម្បាយ៉ាងខ្លាំងពីសំណាក់ប្រទេសចិន។
នៅក្នុងជំនួបនេះ លោកស្រី សៃ អ៊ីងវេន ក៏បានបញ្ជាក់ប្រាប់លោកស្រី ផេឡូស៊ី ឱ្យដឹងថា លោកស្រីគឺជាមិត្តភក្ដិដ៏ស្មោះស្ម័គ្របំផុតមួយរបស់តៃវ៉ាន់ ដោយខ្លួនក៏បានអរគុណសាជាថ្មីម្ដងទៀត ចំពោះការគាំទ្រឥតឈប់ឈររបស់លោកស្រីចំពោះកោះតៃវ៉ាន់នៅលើឆាកអន្តរជាតិផងដែរ។
ប្រធានាធិបតីដដែលបន្តថា តៃវ៉ាន់គឺជាដៃគូដ៏ស្មោះត្រង់មួយរបស់សហរដ្ឋអាមេរិក ខណៈខ្លួននឹងបន្តធ្វើការជាមួយសហរដ្ឋអាមេរិក ដើម្បីពង្រឹងកិច្ចសហប្រតិបត្តិការក្នុងវិស័យសន្តិសុខ ការអភិវឌ្ឍសេដ្ឋកិច្ច និងខ្សែសង្វាក់ផ្គត់ផ្គង់។
គួរបញ្ជាក់ថា លោកស្រី ណានស៊ី ផេឡូស៊ី បានធ្វើដំណើរទៅដល់កោះតៃវ៉ាន់ កាលពីយប់ថ្ងៃអង្គារម្សិលមិញនេះ បន្ទាប់ពីចាកចេញពីប្រទេសសិង្ហបុរី និងម៉ាឡេស៊ី ខណៈលោកស្រីថា ដំណើរទស្សនកិច្ចនេះ គឺជាសញ្ញាមួយដែលបង្ហាញឱ្យឃើញពីការប្តេជ្ញាចិត្តមិនផ្លាស់ប្តូររបស់អាមេរិក ក្នុងការគាំទ្រលទ្ធិប្រជាធិបតេយ្យដ៏រស់រវើករបស់តៃវ៉ាន់។
ទោះជាយ៉ាងណា ចិនដែលតែងតែអះអាងថា កោះតៃវ៉ាន់គឺជាទឹកដីរបស់ខ្លួន បានថ្កោលទោសដំណើរទស្សនកិច្ចរបស់មន្រ្តីជាន់ខ្ពស់អាមេរិករូបនេះមកកាន់កោះតៃវ៉ាន់ ដោយពួកគេចាត់ទុកថាជាការគំរាមកំហែងដល់សន្តិភាព និងស្ថិរភាពនៅច្រកសមុទ្រតៃវ៉ាន់។
ទាក់ទិននឹងករណីនេះ ប្រទេសចិនក៏បានធ្វើការឆ្លើយតបភ្លាមៗតាមរយៈការធ្វើសមយុទ្ធយោធា កោះហៅឯកអគ្គរដ្ឋទូតអាមេរិកប្រចាំនៅទីក្រុងប៉េកាំង និងប្រកាសផ្អាកការនាំចូលកសិផលជាច្រើនពីតៃវ៉ាន់ផងដែរ៕
