ប្រធានរដ្ឋសភាសហរដ្ឋអាមេរិក លោកស្រី ណានស៊ី ផេឡូស៊ី (Nancy Pelosi) បានលើកឡើងនៅថ្ងៃពុធនេះ ក្នុងអំឡុងដំណើរទស្សនកិច្ចរបស់ខ្លួនមកកាន់ទីក្រុងតៃប៉ិ កោះតៃវ៉ាន់ ថាអាមេរិកពិតជាចង់ឱ្យដែនកោះមួយនេះមានសេរីភាពប្រកបដោយសុខសុវត្ថិភាពជានិរន្តរ៍។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ថ្លែងក្នុងសន្និសីទសារព័ត៌មានរួមគ្នាមួយជាមួយនឹងប្រធានាធិបតីតៃវ៉ាន់ លោកស្រី សៃ អ៊ីងវេន (Tsai Ing-wen) លោកស្រី ផេឡូស៊ី បន្តថា ដោយគោរពគោលការណ៍ «ចិនតែមួយ (One China)» សាមគ្គីភាពរបស់អាមេរិកជាមួយតៃវ៉ាន់នាពេលបច្ចុប្បន្ននេះ គឺមានសារៈសំខាន់ជាងពេលណាៗទាំងអស់។
ជាមួយគ្នានេះ លោកស្រីបន្ថែមថា សហរដ្ឋអាមេរិកគាំទ្រស្ថានភាពបច្ចុប្បន្ន (Status Quo) និងមិនចង់ឱ្យមានអ្វីកើតឡើងចំពោះតៃវ៉ាន់ដោយបង្ខំនោះទេ។
ទាក់ទិននឹងសំណួរអំពីផលវិបាកសេដ្ឋកិច្ច ដែលតៃវ៉ាន់អាចនឹងប្រឈមមុខជាមួយនឹងលទ្ធផលនៃដំណើរទស្សនកិច្ចដែលរងនូវការរិះគន់យ៉ាងខ្លាំងពីប្រទេសចិននេះ លោកស្រី ផេឡូស៊ី បានលើកឡើងដោយអះអាងថា ច្បាប់ថ្មីមួយក្នុងការពង្រឹងឧស្សាហកម្មបន្ទះឈីបរបស់ខ្លួន គឺអាចផ្ដល់ជាឱកាសសម្រាប់ការផ្លាស់ប្តូរសេដ្ឋកិច្ចកាន់តែប្រសើរឡើងរវាងសហរដ្ឋអាមេរិក និងតៃវ៉ាន់។
លោកស្រី សៃ អ៊ីងវេន ក៏បានឱ្យដឹងផងដែរថា តៃវ៉ាន់នឹងប្តេជ្ញារក្សាឱ្យបាននូវស្ថានភាពដែលមាននាពេលបច្ចុប្បន្ននេះ នៅទូទាំងច្រកសមុទ្រតៃវ៉ាន់ ខណៈលោកស្រីបន្ថែមថា សមយុទ្ធយោធារបស់ប្រទេសចិនដែលបានធ្វើឡើង ជាការឆ្លើយតបទៅនឹងដំណើរទស្សនកិច្ចរបស់លោកស្រី ផេឡូស៊ី គឺមិនមានឥទ្ធិពលអ្វីលើពួកគេឡើយ។
គួរបញ្ជាក់ថា លោកស្រី ណានស៊ី ផេឡូស៊ី បានធ្វើដំណើរទៅដល់កោះតៃវ៉ាន់ កាលពីយប់ថ្ងៃអង្គារម្សិលមិញនេះ បន្ទាប់ពីចាកចេញពីប្រទេសសិង្ហបុរី និងម៉ាឡេស៊ី ខណៈលោកស្រីថា ដំណើរទស្សនកិច្ចនេះ គឺជាសញ្ញាមួយដែលបង្ហាញឱ្យឃើញពីការប្តេជ្ញាចិត្តមិនផ្លាស់ប្តូររបស់អាមេរិក ក្នុងការគាំទ្រលទ្ធិប្រជាធិបតេយ្យដ៏រស់រវើករបស់តៃវ៉ាន់។
សម្រាប់ដំណើរទស្សនកិច្ចរបស់ប្រធានសភាអាមេរិកមកកាន់ទ្វីបអាស៊ីនេះ លោកស្រីក៏គ្រោងធ្វើដំណើរទៅកាន់ប្រទេសកូរ៉េខាងត្បូង និងជប៉ុនផងដែរ៕