រដ្ឋមន្ដ្រីក្រសួងប្រៃសណីយ៍ អះអាងថា កម្ពុជាកំពុងគិតគូរតភ្ជាប់បណ្ដាញខ្សែកាបក្រោមបាតសមុទ្រពីហុងកុងមកខេត្តព្រះសីហនុ ប្រទេសកម្ពុជា ប្រវែងជាង២ ៧០០គីឡូម៉ែត្រ ដើម្បីធ្វើឱ្យប្រព័ន្ធអ៊ីនធឺណិតនៅកម្ពុជាមានគុណភាពនិងតម្លៃថោកជាងមុន។
ការអះអាងនេះធ្វើឡើងក្នុងសន្និសីទសារព័ត៌មាន ស្តីពី «សមិទ្ធផលសម្រេចបានរយៈពេល៥ឆ្នាំកន្លងមករបស់ក្រសួងប្រៃសណីយ៍ និងទូរគមនាគមន៍» នាព្រឹកថ្ងៃទី៤ ខែសីហានេះ នៅទីស្តីការគណៈរដ្ឋមន្ត្រី។
រដ្ឋមន្ដ្រីក្រសួងប្រៃសណីយ៍ និងទូរគមនាគមន៍ លោក ជា វ៉ាន់ដេត ថ្លែងថា កម្ពុជាមានបណ្ដាញខ្សែកាបក្រោមបាតសមុទ្រប្រហែល៦៤០គីឡូម៉ែត្រ ហើយក្រសួងកំពុងតែគិតគូរតបន្ថែមពីហុងកុង ប្រវែង២ ៧០០គីឡូម៉ែត្របន្ថែមទៀត។
លោកថា នាខែតុលា ឆ្នាំ២០២២នេះ ក្រសួងនឹងចាប់ផ្ដើមគម្រោងបណ្តាញខ្សែកាបអុបទិកក្រោមបាតសមុទ្រ ហុងកុង-ព្រះសីហនុ ប្រវែងសរុប២ ៧១៥គីឡូម៉ែត្រ ដោយរំពឹងថានាឆ្នាំ២០២៤ គម្រោងតបណ្តាញនេះនឹងបញ្ចប់។
លោក ជា វ៉ាន់ដេត បញ្ជាក់ថា៖ «ហើយសង្ឃឹមថាឆ្នាំ២០២៤នឹងចប់ មកដល់ស្រុកខ្មែរ! នៅពេលនោះ សមត្ថភាពអ៊ីនធឺណិតរបស់យើងគឺធំ ដែលយើងលែងព្រួយអំពី[បញ្ហា]សមត្ថភាពអ៊ីនធឺណិតចូល ហើយយើងក៏នឹងទទួលបានសេវាអ៊ីនធឺណិតថោកជាងបច្ចុប្បន្ន»។
បើតាមរដ្ឋមន្ដ្រីក្រសួងប្រៃសណីយ៍រូបនេះ កម្ពុជាមានអ្នកប្រើប្រាស់សេវាទូរសព្ទចលតប្រមាណ១៩លាន៥០ម៉ឺន (១៩ ៥០០ ០០០)លេខ ក្នុងចំណោមនោះ អ្នកប្រើប្រាស់ប្រមាណជាង១៣លាននាក់ ចំណែកអ្នកប្រើសេវាអ៊ីនធឺណិតមានប្រមាណ១៧លាននាក់៕
