ប្រជាពលរដ្ឋរស់នៅក្បែរភ្នំតាម៉ៅអះអាងថា ក្រុមហ៊ុនបានបង្កើនការឈូសឆាយទាំងថ្ងៃ ទាំងយប់ និងច្រានចោលចំពោះសេចក្ដីប្រកាសព័ត៌មានរបស់រដ្ឋបាលព្រៃឈើនៃក្រសួងកសិកម្ម ដែលថាដីព្រៃនៅជុំវិញសួនសត្វភ្នំតាម៉ៅនោះពោរពេញដោយដីខ្សាច់ មិនមានការលូតលាស់ល្អ និងពុំមានសត្វព្រៃសំខាន់ៗ នោះគឺជារឿងមិនពិត។
ពលរដ្ឋលើកឡើងថា ព្រៃនៅជុំវិញសួនសត្វភ្នំតាម៉ៅមិនមានដំណាំឈើដាំប្រភេទអាកាស្យា និងប្រេងខ្យល់ ដូចអ្វីដែលក្រសួងលើកឡើងនោះទេ ហើយពួកគេថា មានសត្វគ្រប់ប្រភេទ និងសត្វជិតផុតពូជរស់នៅផងដែរ។
តាមរូបភាពពីប្រព័ន្ធផ្កាយរណបបង្ហាញថា គ្រឿងចក្រជាច្រើនគ្រឿងរបស់ក្រុមហ៊ុនឯកជនបានឈូសឆាយដីព្រៃជុំវិញសួនសត្វភ្នំតាម៉ៅអស់ប្រមាណ១៣០ហិកតាហើយ ខណៈដែលអ្នករាយការណ៍ព័ត៌មានវីអូឌីនៅថ្ងៃសុក្រនេះ បានបង្ហោះដ្រូនជាថ្មីម្ដងទៀតបង្ហាញថា ការឈូសឆាយកាន់តែជិតដល់វត្តថ្មអន្ទងដែលស្ថិតនៅក្នុងបរិវេណសួនសត្វភ្នំតាម៉ៅ។
ប្រជាពលរដ្ឋដែលមកមើលការឈូសឆាយព្រៃឈើនៅភ្នំតាម៉ៅ លោក ធាម សុខា បានលើកឡើងថា មិនមានជ្រូកព្រៃដែលទៅស៊ីដំណាំពលរដ្ឋនោះទេ គឺមានតែជ្រូកព្រៃមកស៊ីបាយដែលព្រះសង្ឃបានដាក់ឱ្យ ម្យ៉ាងទៀតក៏មិនមានដើមឈើដាំប្រភេទអាកាស្យា ប្រេងខ្យល់ និងឈើធម្មជាតិដូច ការលើកឡើងរបស់ក្រសួងនោះដែរ។ លោក សុខា ដែលជាអ្នកកើតនៅទីនោះផ្ទាល់អះអាងថា ព្រៃឈើ និងសត្វព្រៃគ្រប់ប្រភេទនៅទីនោះមានតាំងពីយូរលង់ណាស់មកហើយ។
លោកថា៖«អត់ដែលមាន មានតែវាមកវត្ត យប់ឡើងវាមកហើយ លោកដាំបបរដាំអីឱ្យវាហូបទៅណា។ រដូវភ្ជុំរដូវអីដាក់បាយឱ្យវាទៅ វាចូលស៊ីតែក្នុងវត្ត»។
ពលរដ្ឋម្នាក់នេះ សោកស្ដាយជាខ្លាំងចំពោះដែនជម្រកសត្វព្រៃ និងសង្គ្រោះសត្វព្រៃមួយនេះកំពុងបាត់បង់ បន្តិចម្តងៗ និងសង្ឃឹមថាក្រុមហ៊ុនកុំបន្តឈូសឆាយបន្តទៅទៀត។
ចៅអធិការវត្តថ្មអន្ទង ព្រះតេជព្រះគុណ សុត ផល្លី មានថេរដីកាថា ចាប់តាំងពីមានការឈូសឆាយមក សត្វព្រៃដែលធ្លាប់មកលេងវត្ត រួមមានជ្រូកព្រៃ ឈ្លូស ប្រើស ជាដើមមានការថយចុះខ្លាំងគួរឱ្យកត់សម្គាល់។
ព្រះអង្គមានថេរដីកាថា៖«បើមើលទៅដូចប្លែក បាត់ខ្លះ នៅសល់តិច មិនដឹងវាភ័យវារត់បែកគ្នាអីដឹងចាំមើល តាមដានមើល»។
ព្រះតេជព្រះគុណ សុត ផល្លី បន្តថា ចាប់តាំងពីមានក្រុមហ៊ុនឈូសឆាយមកបរិវេណវត្តបានបាត់បង់សម្រស់ធម្មជាតិក្លាយទៅជាស្រងេះស្រងោច និងប៉ះពាល់ផ្លូវចិត្តព្រះអង្គផង។ បន្ថែមពីនេះ ធនធានធម្មជាតិ និងព្រៃឈើមានទំនាក់ទំនងគ្នាដែលមិនអាចខ្វះបានជាមួយនឹងព្រះពុទ្ធសាសនាដែលព្រះអង្គបាន ប្រសូត្រ ត្រាស់ដឹង និងបរិនិពាន្ត ក្រោមដើមឈើ និងមានពុទ្ធដីកាឱ្យថែរក្សាធនធានធម្មជាតិផងដែរ។ ដូច្នេះព្រះតេជព្រះគុណ ផល្លី ចង់ឃើញក្រុមហ៊ុនឈប់កាប់បំផ្លាញព្រៃឈើតទៅទៀត។
ព្រះអង្គមានថេរដីការបន្តថា៖«ធម្មជាតិ និងព្រះពុទ្ធសាសនាទាក់ទងខ្លាំង សូម្បីតែព្រះពុទ្ធ ព្រះអង្គត្រាស់ដឹងនៅក្រោមដើមឈើ ធម្មជាតិហ្នឹងជួយខ្យល់យើងដកដង្ហើម។ កាលណាយើងអង្គុយសមាធិទាក់ទងនឹងក្រោមដើមឈើហ្នឹង វាជួយថាមពលក្នុងខ្លួនយើងហ្នឹង បើអត់មានធម្មជាតិទេ យើងអង្គុយសមាធិអត់ស្ងប់»។
ប្រជាពលរដ្ឋរស់នៅជិតកន្លែងឈូសឆាយ អ្នកស្រី ជា សុខុម បានឱ្យដឹងថា ក្រុមហ៊ុនបង្កើនការឈូសឆាយទាំងថ្ងៃ ទាំងយប់ ព្រមទាំងបានបង្កើនចំនួនគ្រឿងចក្រឈូសឆាយថែមទៀត។
អ្នកស្រីថា៖«ឥឡូវមកទៀតហើយ ពីបាត់ដំបងនៅខាងលិចខ្ញុំ រំលងអត់បាន៥ម៉ែត្រផង គេដាក់នៅហ្នឹងទៀតហើយ ពួកចុងភៅៗអី គ្រឿងចក្រ ជិះទៅមិញវាលច្រើនដែរ តើអូន វាលពីរបីកន្លែងឯណោះ»។
នាយកកម្មវិធីសង្គ្រោះ និងថែទាំសត្វព្រៃ នៃអង្គការសម្ព័ន្ធមិត្តសត្វព្រៃ លោក និក ម៉ាក (Nick Marx) បានធ្លាប់ថ្លែងប្រាប់វីអូឌីកាលពីកន្លងទៅ ដោយអំពាវនាវឱ្យរដ្ឋាភិបាលពិចារណាឡើងវិញចំពោះការឈូសឆាយភ្នំតាម៉ៅនេះ ព្រោះទីតាំងនេះមានសត្វព្រៃ និងសត្វកម្រគ្រប់ប្រភេទ។
លោកថា៖«ខ្ញុំសុំសម្ដេច ហ៊ុន សែន សុំដូរគំនិតឈូសព្រៃភ្នំតាម៉ៅ ពីព្រោះយើងមានសត្វច្រើននៅសួនសត្វភ្នំតាម៉ៅ និងព្រៃជុំវិញសួនសត្វភ្នំតាម៉ៅ កន្លែងល្អសម្រាប់សត្វព្រៃ។ យើងដោះលែងខ្លះ និងល្អសម្រាប់ប្រជាជនទៅសម្រាក អត់មានកន្លែងផ្សេង អត់មានកន្លែងផ្សេងទៀតជិតភ្នំពេញ កន្លែងធម្មជាតិនៅទីនេះ»។
លោកបន្តថា រដ្ឋាភិបាលកម្ពុជា ក៏ដូចជាប្រជាពលរដ្ឋកម្ពុជាគួរតែមានសំណាងដែលមានសួនសត្វភ្នំតាម៉ៅដែលជាទីតាំងមានព្រៃធម្មជាតិខុសពីប្រទេសមួយចំនួនព្រោះថា មានសួនសត្វនៅចំណុចកណ្ដាល និងព្រៃធម្មជាតិនៅជុំវិញសួនសត្វដែលជាកន្លែងសត្វព្រៃគ្រប់ប្រភេទអាចរស់តាមបែបធម្មជាតិ និងមានសេរីភាព។
លោកបន្តថា៖«ខ្ញុំស្រលាញ់ភ្នំតាម៉ៅ សួនសត្វភ្នំតាម៉ៅនិងជនបរទេសស្រលាញ់ភ្នំតាម៉ៅ មកពីកន្លែងធម្មជាតិ ដូចនៅស្រុកខ្ញុំ ខ្ញុំជនជាតិអង់គ្លេស ខ្ញុំអត់មានសួនសត្វដូចដូចភ្នំតាម៉ៅ អត់មានព្រៃដោះលែងសត្វជុំវិញកន្លែងយើងអត់បាន ដូចគេមានស៊ីម៉ង់ច្រើន ដែកច្រើន កៅស៊ូច្រើនធ្វើផ្លូវ អត់មានកន្លែងធម្មជាតិ»។
វីអូឌីមិនទាន់អាចសុំការឆ្លើយតបពីអគ្គនាយករដ្ឋបាលព្រៃឈើនៃក្រសួងកសិកម្ម លោក កែវ អូម៉ាលីស នៅថ្ងៃសុក្រនេះបាននៅឡើយទេ។
ចំណែកឯប្រធានមន្ទីរកសិកម្ម រុក្ខាប្រមាញ់ និងនេសាទខេត្តតាកែវ លោក ញ៉ិប ស្រ៊ុន បង្វែរសំណួរទៅកាន់អគ្គនាយករដ្ឋបាលព្រៃឈើ លោក កែវ អូម៉ាលីស ដែលជាអ្នកចេញសេក្ដីប្រកាសព័ត៌មានកាលពីថ្ងៃព្រហស្បតិ៍នេះ។
ភ្នំតាម៉ៅដែលមានចំងាយប្រមាណ៤០គីឡូមែត្រ ពីរាជធានីភ្នំពេញមានផ្ទៃដីសួនសត្វ ៤០០ហិកតា និងទីផ្ទៃដីទំហំ២ ៣០០ហិកតាជាព្រៃដែលព័ទ្ធជុំវិញសួន។ ប៉ុន្តែក្នុងចំណោមផ្ទៃដីទំហំ ២ ៣០០ ហិកតា នេះ រដ្ឋាភិបាលបានប្រគល់ឱ្យក្រុមហ៊ុនឯកជន ក្រោមហេតុផលដើម្បីអភិវឌ្ឍសាងសង់ជាលំនៅឋាន និងអគារចំនួន ១ ៥០០ ហិកតា។ ផ្ទៃដីភ្នំតាម៉ៅទាំងមូលមានសត្វព្រៃជាច្រើនប្រភេទកំពុងរស់នៅ បង្កកំណើត និងជាទីកន្លែងជួយសង្គ្រោះសត្វផ្សេងៗ នៅក្នុងប្រទេសកម្ពុជាផងដែរ៕
