អ្នករាយការណ៍ពិសេសរបស់អង្គការសហប្រជាជាតិ (UN) ទទួលបន្ទុកស្ថានភាពសិទ្ធិមនុស្សប្រចាំកម្ពុជា លោក វិទិត មុនតាប៊ន (Vitit Muntarbhorn) នឹងមកបំពេញទស្សនកិច្ចផ្លូវការលើកដំបូងនៅកម្ពុជា ចាប់ពីថ្ងៃទី១៥ ដល់ថ្ងៃទី២៦ ខែសីហា ឆ្នាំ២០២២ ដើម្បីវាយតម្លៃស្ថានភាពសិទ្ធិមនុស្សនៅកម្ពុជា។
គេហទំព័ររបស់ UN បានឱ្យដឹងថា អ្នករាយការណ៍ពិសេស UN លោក វិទិត មុនតាប៊ន នឹងវាយតម្លៃស្ថានភាពសិទ្ធិមនុស្សនៅក្នុងប្រទេសកម្ពុជា និងការខិតខំប្រឹងប្រែងរបស់រដ្ឋាភិបាលក្នុងការបង្កើតបរិយាកាសអំណោយផល សម្រាប់ការទទួលបានសិទ្ធិមនុស្ស សិទ្ធិនយោបាយ សិទ្ធិពលរដ្ឋ សិទ្ធិសេដ្ឋកិច្ច សង្គមនិងវប្បធម៌ បន្ទាប់ពីការរាតត្បាតនៃជំងឺកូវីដ-១៩។
លោក Vitit Muntarbhorn ថា៖ «ខ្ញុំទន្ទឹងរង់ចាំជួបជាមួយភាគីពាក់ព័ន្ធជាច្រើន រួមទាំងតំណាងរដ្ឋាភិបាល អ្នកការពារសិទ្ធិមនុស្ស និងភាគីពាក់ព័ន្ធផ្សេងទៀត ដើម្បីវាយតម្លៃស្ថានភាពសិទ្ធិមនុស្សនៅកម្ពុជា និងកិច្ចខិតខំប្រឹងប្រែងរបស់កម្ពុជា ក្នុងការអនុវត្តច្បាប់សិទ្ធិមនុស្សអន្តរជាតិ»។
អ្នករាយការណ៍ពិសេសរូបនេះធ្វើទស្សនកិច្ចដោយផ្ទាល់នៅពេលនេះ តាមការអញ្ជើញរបស់រដ្ឋាភិបាលនៅថ្នាក់ជាតិ និងថ្នាក់ក្រោមជាតិ ហើយលោកនឹងជួបតំណាងសង្គមស៊ីវិលជាតិនិងអន្តរជាតិ ព្រមទាំងភាគីពាក់ព័ន្ធផ្សេងទៀត អំឡុងពេលបំពេញទស្សនកិច្ចនេះ ហើយការចូលរួមនឹងត្រូវបានកំណត់យ៉ាងតឹងរ៉ឹងចំពោះអ្នកសារព័ត៌មានផងដែរ។
លោក វិទិត មុនតាប៊ន នឹងធ្វើការបង្ហាញការអង្កេតបឋមរបស់លោកក្នុងសន្និសីទសារព័ត៌មាននៅថ្ងៃទី២៦ ខែសីហា ឆ្នាំ២០២២។ ជាមួយគ្នានេះ របាយការណ៍ដែលទទួលបានពីភាគីពាក់ព័ន្ធជុំវិញស្ថានភាពសិទ្ធិមនុស្សនៅកម្ពុជា អ្នករាយការណ៍ពិសេសរូបនេះនឹងយកទៅបង្ហាញនៅក្រុមប្រឹក្សាសិទ្ធិមនុស្សអង្គការសហប្រជាជាតិ ក្នុងខែតុលាខាងមុខ៕