ស្នងការនគរបាលរាជធានីភ្នំពេញ បង្កើតក្រុមប្រតិបត្តិការចំនួន៩ក្រុមនៅគ្រប់ខណ្ឌទាំងអស់ ដើម្បីចុះល្បាត ទប់ស្កាត់ និងបង្ក្រាបកម្លាំងអនាធិបតេយ្យ ដែលធ្វើសកម្មភាពចាប់ឃាត់ខ្លួនប្រជាពលរដ្ឋបែបអនាធិបតេយ្យ ដោយមិនមានកិច្ចសហការពីអាជ្ញាធរមូលដ្ឋាន។
យោងតាមសេចក្ដីសម្រេច ស្តីពី «ការចាត់តាំងបញ្ជាការដឹកនាំនិងក្រុមប្រតិបត្តិការ ទប់ស្កាត់ និងបង្ក្រាបក្រុមធ្វើសកម្មភាពចាប់ឃាត់ខ្លួនប្រជាពលរដ្ឋបែបអនាធិបតេយ្យ» ចុះថ្ងៃទី៥ ខែសីហា ដែលត្រូវបានផ្សព្វផ្សាយកាលពីថ្ងៃម្សិលមិញ បានសម្រេចចាត់តាំងលោក គល់ យី ស្នងការរងទទួលផែនប្រយុទ្ធប្រឆាំងគ្រឿងញៀន ជាមេបញ្ជាការ និងមានមេបញ្ជាការរង រួមនឹងប្រធាន អនុប្រធាន និងសមាជិក សរុបចំនួន២៦០នាក់ ដើម្បីអនុវត្តការងារនេះនៅក្នុងខណ្ឌទាំង១៤ ក្នុងរាជធានីភ្នំពេញ។
សេចក្ដីសម្រេចបន្តថា ក្រុមការងារត្រួតពិនិត្យ មានភារកិច្ចចុះត្រួតពិនិត្យ រក្សាសណ្ដាប់ធ្នាប់ ទប់ស្កាត់ និងបង្ក្រាបក្រុមជនដែលធ្វើសកម្មភាពចាប់ឃាត់មនុស្សអនាធិបតេយ្យ ក្នុងភូមិសាស្ត្ររាជធានីភ្នំពេញ ហើយក្រុមប្រតិបត្តិនីមួយៗត្រូវបែងចែកកម្លាំងទទួលខុសត្រូវ ២៤លើ២៤ម៉ោង និងធ្វើផែនការសកម្មភាពនិងប្រក្រតិទិនការងារ រួមទាំងកំណត់តំបន់ស្មុគស្មាញ តំបន់ប្រឈម តំបន់ដែលមានហេតុការណ៍ឃាត់ខ្លួនអនាធិបតេយ្យញឹកញាប់ ដើម្បីឱ្យការងារទប់ស្កាត់និងបង្រ្កាបនេះធានាបានប្រសិទ្ធភាព។
ប្រភពដដែលបន្តទៀតថា ក្រុមប្រតិបត្តិការត្រូវធានាគ្រប់គ្រងស្ថានភាពនៅកន្លែងកើតហេតុ និងសម្របសម្រួល ដើម្បីស្វែងរកអត្តសញ្ញាណអង្គភាពនិងអ្នកទទួលខុសត្រូវ ហើយត្រូវទាក់ទងក្រុមប្រតិបត្តិការ ដើម្បីបញ្ជូនកម្លាំងជំនួយមកគ្រប់គ្រងសភាពការណ៍ ព្រមទាំងអនុវត្តវិធានការដោយចាប់បង្ខំ នាំយកអ្នកពាក់ព័ន្ធទាំងអស់មកអង្គភាពដើម្បីស្រាវជ្រាវនិងស៊ើបអង្កេត។
សេចក្តីសម្រេចនោះគូសបញ្ជាក់ដែរថា៖ «[ក្រុមប្រតិបត្តិការ] ត្រូវបញ្ចៀសឱ្យបានក្នុងកម្រិតខ្ពស់ចំពោះការប្រើប្រាស់អាវុធធ្វើជាដំណោះស្រាយជាមួយបញ្ហា ប៉ុន្តែក្នុងលក្ខខណ្ឌដើម្បីការពារការគំរាមកំហែង ត្រូវប្រើប្រាស់ឱ្យស្របតាមវិជ្ជាជីវៈ និងមានការគិតគូរពីហានិភ័យដល់ប្រជាពលរដ្ឋដែលនៅជិតៗទីកន្លែងនោះ»។
លោក គល់ យី ស្នងការរងទទួលផែនការងារប្រឆាំងគ្រឿងញៀន ដែលត្រូវបានចាត់តាំងជាមេបញ្ជាការក្នុងការអនុវត្តការងារនេះ មានប្រសាសន៍យ៉ាងខ្លីថា ក្រុមប្រតិបត្តិការនឹងចេញបង្ក្រាបលើក្រុមមានសកម្មភាពឃាត់ប្រជាពលរដ្ឋដោយមិនមានមូលហេតុច្បាស់លាស់។
លោកថា៖ «ចាប់តែក្រុមណាធ្វើសកម្មភាពឃាត់ខ្លួនប្រជាពលរដ្ឋអីខុសច្បាប់ខុសអីហ្នឹង! មិនមានអីច្បាស់លាស់អីហ្នឹងណាស់! […. ] ក្រុមប្រតិបត្តិការមានឯកសណ្ឋាន ហើយការងារដូចមាននៅក្នុងសេចក្ដីសម្រេច»។
ប្រជាពលរដ្ឋម្នាក់រស់នៅរាជធានីភ្នំពេញ សុំនិយាយក្នុងលក្ខខណ្ឌមិនបញ្ចេញឈ្មោះ បានបង្ហាញការគាំទ្រចំពោះការបង្កើតក្រុមការងារនេះ ខណៈកន្លងមក លោកធ្លាប់បានឃើញករណីដេញចាប់ប្រជាពលរដ្ឋដោយផ្ទាល់ពីសំណាក់សមត្ថកិច្ចដែលមានឯកសណ្ឋានផង និងស្លៀកពាក់ស៊ីវិលផង បានជិះម៉ូតូដេញតាមចាប់ពលរដ្ឋ ឬបានហៅប្រជាពលរដ្ឋដែលកំពុងធ្វើដំណើរតាមដងផ្លូវឱ្យឈប់ ទាំងដែលពលរដ្ឋមិនដឹងថាខ្លួនបានប្រព្រឹត្តអ្វីខុស។
លោកបន្តថា ករណីខ្លះក៏មានជនខិលខូចមួយចំនួនបានបន្លំខ្លួននិងស្លៀកពាក់ជាសមត្ថកិច្ច ដើរចុះចាប់ប្រជាពលរដ្ឋតាមដងផ្លូវនៅពេលយប់ និងបានសម្លុតទាមទារលុយជាថ្នូរនឹងការដោះលែងវិញជាដើម។
តែយ៉ាងណា បុរសវ័យ៤២ឆ្នាំរូបនេះបានស្នើឱ្យក្រុមការងារប្រតិបត្តិដែលទើបបង្កើតថ្មីនេះ អនុវត្តការងារឱ្យបានសកម្ម មានតម្លាភាព និងចៀសវាងការប្រកាន់បក្ខពួក ដើម្បីរក្សាសន្តិសុខនិងសុវត្ថិភាពជូនប្រជាពលរដ្ឋ។
លោកថា៖ «ចំពោះខ្ញុំគិតថាបង្កើតក្រុមហ្នឹងគឺល្អ ប៉ុន្តែត្រូវឱ្យមានតម្លាភាពផងពាក់ព័ន្ធនឹងការបង្កើតហ្នឹង។ ជួនកាលការដោះស្រាយ ដោះស្រាយគឺប្រកាន់បក្ខ របៀបបក្ខពួកនិយមក្នុងការដោះស្រាយ។ អ៊ីចឹងកំហុសហ្នឹង គឺធ្លាក់លើប្រជាពលរដ្ឋដដែល […] ខ្ញុំធ្លាប់ជួបករណីមួយ មើលព័ត៌មាននៅពោធិ៍ចិនតុង មានស្លៀកពាក់ប៉ូលិស តែគាត់ជនខិលខូចទេ ដែលបន្លំខ្លួនជាប៉ូលិសចាប់ឃាត់ខ្លួនគេអ៊ីចឹង»៕
