រដ្ឋមន្រ្តីក្រសួងមហាផ្ទៃ លោក ស ខេង បានជំរុញជាថ្មីឱ្យគណៈកម្មាធិការជាតិសុវត្ថិភាពចរាចរណ៍ផ្លូវគោក និងស្ថាប័នពាក់ព័ន្ធ ពង្រឹងការអនុវត្តច្បាប់ និងពិនិត្យឡើងវិញនូវចំណុចអវិជ្ជមានទាំងឡាយ ដើម្បីដោះស្រាយបញ្ហាប្រឈម ខណអត្រាគ្រោះថ្នាក់ចរាចរណ៍ផ្លូវគោកក្នុងរយៈពេល៦ខែដើមឆ្នាំនេះ បានកើនឡើង បើធៀបនឹងរយៈពេលដូចគ្នាកាលពីឆ្នាំមុន។
ការណែនាំនេះបានធ្វើឡើងនៅក្នុងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោក ប្រចាំឆមាសទី១ និងទិសដៅការងារ ឆមាសទី២ នៅក្រសួងសាធារណការ និងដឹកជញ្ជូន នាព្រឹកថ្ងៃទី១៨ ខែសីហា ឆ្នាំ២០២២នេះ។
ក្នុងកិច្ចប្រជុំនោះ លោក ស ខេង បានលើកឡើងថា គ្រោះថ្នាក់ចរាចរណ៍ក្នុងរយៈពេល៦ខែដើមឆ្នាំ២០២២នេះ តម្រូវឱ្យមានការត្រួតពិនិត្យឡើងវិញរាល់ចំណុចអវិជ្ជមាន ដើម្បីពិនិត្យដោះស្រាយបញ្ហាប្រឈម ដូចជា មូលហេតុនៃគ្រោះថ្នាក់ដោយសារការបើកបរលើសល្បឿនកំណត់ និងការមិនពាក់មួកសុវត្ថិភាព ជាដើម។
លោកបន្តថា៖ «យើងប្រមូលផ្ដុំបញ្ហាដើម្បីឈានទៅដោះស្រាយឱ្យចំបញ្ហានោះ។ យើងផ្សព្វផ្សាយនិងអប់រំប្រជាពលរដ្ឋទូទៅ វាជាការចាំបាច់ហើយ ប៉ុន្តែយោបល់ខ្ញុំ គឺថាអ្នកពាក់ព័ន្ធផ្ទាល់តែម្តង ត្រូវតែត្រួតពិនិត្យ អប់រំ និងអនុវត្តវិន័យ និងច្បាប់តឹងរ៉ឹង»។
ករណីនេះ លោកបានជំរុញឱ្យគណៈកម្មាធិការជាតិសុវត្ថិភាពចរាចរណ៍ផ្លូវគោក បង្កើនការអប់រំអំពីច្បាប់ និងបទដ្ឋានសុវត្ថិភាពចរាចរណ៍ផ្លូវគោកឱ្យបានច្បាស់ ទូលំទូលាយ និងផ្តោតឱ្យចំគោលដៅ ព្រមទាំងពង្រឹងគុណភាពសាលាបង្រៀនបើកបរយានយន្ត ដោយពិនិត្យលើការលើកកម្ពស់សមត្ថភាពគ្រូ កំណែទម្រង់កម្មវិធីសិក្សា និងគុណភាពនៃការប្រលងយកបណ្ណបើកបរ ជាដើម។
លោកក៏បានណែនាំឱ្យបន្តគាំទ្រការបំពាក់កាមេរ៉ាអចល័តតាមដងផ្លូវជាតិ និងរិះរកវិធីកាត់បន្ថយការកកស្ទះចរាចរណ៍ ព្រមទាំងទប់ស្កាត់ការដឹកជញ្ជូនលើសកម្រិតកំណត់ផងដែរ។
រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការគណៈកម្មាធិការជាតិសុវត្ថិភាពចរាចរណ៍ផ្លូវគោក លោកស្រី មិន មាណាវី បានឱ្យដឹងថា ក្នុងរយៈពេល៦ខែ ឆ្នាំ២០២២នេះ គ្រោះថ្នាក់ចរាចរណ៍ដែលបានកើតឡើងនៅទូទាំងប្រទេសសរុប១ ៦០៩លើក ក្នុងនោះកើតឡើងពេលយប់មាន៥៧ភាគរយ និងក្នុងចំណោមជនរងគ្រោះសរុប មានស្លាប់៩៤២នាក់ ស្មើនឹង៣០ភាគរយនៃជនរងគ្រោះ និងអ្នករងរបួសសរុបមានជាង ២ ២០០នាក់។
ចំណែកមូលហេតុនៃគ្រោះថ្នាក់ចរាចរណ៍វិញ លោកស្រីថា រួមមាន ល្មើសល្បឿន៣៨ភាគរយ បើកបរមិនគោរពសិទ្ធិអាទិភាព២៤ភាគរយ មិនប្រកាន់ស្ដាំ១១ភាគរយ ជែង១១ភាគរយ បត់ក្នុងស្ថានភាពគ្រោះថ្នាក់១១ភាគរយ ស្រវឹង៣ភាគរយ កត្តាយានយន្ត២ភាគរយ និងងងុយគេង១ភាគរយ។
លោកស្រីបន្ថែមថា គ្រោះថ្នាក់ដែលបានកើតឡើងភាគច្រើន គឺនៅរាជធានីភ្នំពេញ ខេត្តកណ្ដាល និងខេត្តព្រះសីហនុ។
បើតាមលោកស្រី មិន មាណាវី ក្នុងឆមាសទី១ ឆ្នាំ២០២២ បើធៀបនឹងឆមាសទី១ ឆ្នាំ២០២១ គ្រោះថ្នាក់ចរាចរណ៍បានកើនឡើង ៣៤៨លើក ស្មើ២៨ភាគរយ អ្នកស្លាប់កើន ២៣៣នាក់ ស្មើ៣៣ភាគរយ និងរបួសកើន ៤៤៣នាក់ ស្មើ២៥ភាគរយ៕