សម្រាប់សវនាការលើកទី៥៣ នៅថ្ងៃពុធនេះ មិនសូវជាមានភាពតានតឹងដូចលើកមុនៗនោះទេ ហើយគ្រប់ភាគីក្នុងបន្ទប់ជំនុំជម្រះក៏មិនសូវប្រកែកគ្នាខ្លាំងដូចសព្វមួយដងដែរ ខណៈប្រធានក្រុមប្រឹក្សាជំនុំជម្រះសម្រេចទទួលយកភស្តុតាងថ្មីដែលតំណាងអយ្យការស្នើសុំបញ្ចូលបន្ថែមទៀតកាលពីសប្ដាហ៍មុន ក្នុងការដាក់បន្ទុកប្រឆាំងជនជាប់ចោទ។
ជម្រាបអង្គជំនុំជម្រះ នៅព្រឹកថ្ងៃពុធ ទី២៤ ខែសីហានេះ លោក កូយ សៅ ដែលជាប្រធានក្រុមប្រឹក្សាជំនុំជម្រះ បានប្រកាសថា ភស្តុតាងថ្មីដែលតំណាងអយ្យការស្នើបញ្ចូលបន្ថែមទៀតកាលពីសប្ដាហ៍មុន ពាក់ព័ន្ធសំឡេងខ្សែអាត់លោក ហូរ វ៉ាន់ នេះ តុលាការទទួលយក ព្រោះវានៅមានប្រយោជន៍ដែលអាចយកមកប្រើប្រាស់ក្នុងការពិភាក្សាសួរដេញដោលបាន។
ស្របពេលដែលប្រធានក្រុមប្រឹក្សាជំនុំជម្រះ ឯកភាពថា ភស្តុតាងថ្មីដែលជាសំឡេងខ្សែអាត់នេះមានប្រយោជន៍ដល់កិច្ចពិភាក្សា លោកចៅក្រមក៏បានជម្រាបអង្គជំនុំជម្រះថា សវនាការនេះក៏នឹងជិតដល់ទីបញ្ចប់ហើយដែរ។
សម្រាប់សវនាការលើកនេះ គេសង្កេតឃើញថា ទាំងតំណាងអយ្យការ និងមេធាវីការពារសិទ្ធិឱ្យដើមបណ្ដឹងរដ្ឋប្បវេណី បានព្យាយាមសួរដេញដោលលោក កឹម សុខា ភ្ជាប់ទៅនឹងសកម្មភាពនៃការធ្វើបាតុកម្មរបស់លោក វន់ ពៅ និងបាតុកម្មនៅផ្លូវវេងស្រេង។
ចម្លើយភាគច្រើននៅថ្ងៃនេះរបស់ជនជាប់ចោទ កឹម សុខា ព្យាយាមមិនឆ្លើយ ដោយគ្រាន់តែអះអាងខ្លីៗថាបានឆ្លើយរួចហើយ ហើយពេលខ្ លះលោកអះអាងថា សំណួរទាំងនេះក៏សួររួចអស់ហើយដែរ ដូច្នេះលោកមិនដឹងត្រូវជម្រាបយ៉ាងម៉េចទៀតទេ។ ក៏ប៉ុន្តែតំណាងអយ្យការ លោក ឆាយ ហុង និងលោក ប្លង់ សុផល យល់ឃើញថា អ្វីដែលជនជាប់ចោទអះអាងនោះ វាដូចមិនសមហេតុផល។
នៅក្នុងបន្ទប់ជំនុំជម្រះនៅថ្ងៃនេះ តំណាងអយ្យការបានស្នើសុំតុលាការចាក់ឃ្លីបវីដេអូ ចំនួន២ឃ្លីប ដែលលើកឡើងពីសកម្មភាពនៃការធ្វើបាតុកម្មនៅផ្លូវវេងស្រេង ដែលមានរយៈពេលជាង១០នាទី ហើយមួយឃ្លីបទៀតគឺជាសកម្មភាពរបស់យុវជនទៅចែកនំបុ័ងឱ្យអ្នកធ្វើបាតុកម្មនៅផ្លូវវេងស្រេង ហើយពួកគេអះអាងថាជាតំណាងឱ្យលោក ហូរ វ៉ាន់។
ក្រៅពីនេះ តុលាការបានចាក់សំឡេងខ្សែអាត់លោក ហូរ វ៉ាន់ ជាថ្មីទៀត ដែលមានរយៈពេលជាង១នាទី។ លោក កឹម សុខា ដែលស្ថិតនៅក្នុងរង្វង់ក្រចកសេះ នៅតែអះអាងថា ការដែលយកសំឡេងលោក ហូរ វ៉ាន់ ធ្វើជាភស្តុតាងដាក់បន្ទុកប្រឆាំងរូបលោកនេះ វាគឺជារឿងអយុត្តិធម៌ ព្រោះសំឡេងនៅក្នុងខ្សែអាត់នេះទើបតែរកឃើញនៅក្នុងឆ្នាំ២០២២។ មួយវិញទៀត សំឡេងនេះមិនដឹងលោក ហូរ វ៉ាន់ បានសន្ទនាជាមួយអ្នកណាឱ្យប្រាកដ។
តាមរយៈសំឡេងជាខ្សែអាត់នេះ គេឮចេញតែពីភាគីម្ខាង គឺសំឡេងរបស់អតីតតំណាងរាស្រ្ត លោក ហូរ វ៉ាន់ ដោយគ្មានឮសំឡេងឆ្លើយសន្ទនាពីដៃគូម្ខាងទៀតនោះទេ បើទោះជាសំឡេងខ្សែអាត់នេះមានរយៈពេលជាង១នាទីយ៉ាងណាក្ដី។
ចំណែកលោក អាង ឧត្ដម សហមេធាវីការពារសិទ្ធិឱ្យជនជាប់ចោទ លោក កឹម សុខា ផ្តល់បទសម្ភាសតាមទូរសព្ទ ក្រោយបញ្ចប់សវនាការថា អ្វីដែលតំណាងអយ្យការបន្តដាក់ភស្តុតាងថ្មីទៀតនេះ ឆ្លុះបញ្ចាំងឱ្យឃើញពីភាពចុះអន់ថយ ឬភស្តុតាងមុនៗគ្មានតម្លៃ សម្រាប់កិច្ចពិភាក្សាសួរដេញដោលទៀតនោះទេ។ មិនតែប៉ុណ្ណោះ ការដែលតុលាការព្យាយាមទាញគណបក្សសង្រ្គោះជាតិដែលត្រូវបានតុលាការរំលាយ ភ្ជាប់ទៅនឹងសកម្មភាពជនជាប់ចោទ វាកាន់តែខុសពីការពិត ព្រោះអ្វីដែលកូនក្តីរបស់ខ្លួនធ្វើ វាមិនជាប់ទាក់ទិនទាល់តែសោះជាមួយគណបក្សនយោបាយ។
លោកបន្តថា៖ «វាអត់ត្រឹមត្រូវ។ ភស្តុតាងចេះតែដាក់មកច្រងេងច្រងាងពេញហ្នឹង យកធ្វើជាការមិនកើត។ រឿងហ្នឹង គេចង់បង្ហាញពីអំពើប្រទូសរ៉ាយដែលបង្កឡើងនិងចាត់ចែងដោយគណបក្សសង្រ្គោះជាតិ ឬចាត់ចែងឡើងដោយថ្នាក់ដឹកនាំគណបក្សអីអ៊ីចឹងទៅណា។ តាមពិតរឿងនេះ វាមិនទាក់ទងនឹងគណបក្ស គឺទាក់ទងបុគ្គលគាត់ផ្សេងគ្នា»។
សំណុំរឿងលោក កឹម សុខា ដែលកំពុងមានក្ដីក្ដាំនៅតុលាការពេលនេះ ត្រូវគេចាត់ទុកថាជាសំណុំរឿងដែលបន្តអូសបន្លាយក្នុងការជំនុំជម្រះយូរជាងគេ សម្រាប់បរិបថនយោបាយនៅកម្ពុជា។ សវនាការនេះមានរយៈពេលប្រមាណ២ឆ្នាំមកហើយ គិតចាប់ពីបើកការជំនុំជម្រះ តាំងពីដើមខែមករា ឆ្នាំ២០២០មក។
អ្នកនាំពាក្យសមាគមការពារសិទ្ធិមនុស្ស អាដហុក លោក ស៊ឹង សែនករុណា យល់ឃើញថា បើទោះជាតុលាការព្យាយាមដាក់ភស្តុតាងថ្មីៗបន្ថែមទៀតក៏ដោយ ក៏មិនប្រាកដថាអាចនឹងរកទីបញ្ចប់នៃសវនាការនេះបានដែរ ព្រោះគេដឹងជាទូទៅហើយថា ករណីលោក កឹម សុខា នេះ គឺជារឿងនយោបាយ។ លោកបន្តថា ប្រសិនបើការកំណត់យកយុត្តាធិការដូចអ្វីដែលតំណាងអយ្យការលើកឡើងថា រឿងភស្តុតាងនេះអាចដាក់បានគ្រប់ពេល ប្រសិនបើមាន។ ដូច្នេះ ការជំនុំជម្រះនេះ វានឹងរកទីបញ្ចប់គ្មានទេ។ លើសពីនេះទៅទៀត អ្វីដែលកាន់តែអាក្រក់ជាងនេះ គឺការដែលចេះតែបន្តអូសបន្លាយពេលវេលានៃសវនាការនេះ វានឹងធ្វើឱ្យប៉ះពាល់ធ្ងន់ធ្ងរដល់សិទ្ធិទទួលបានការជំនុំជម្រះដោយឆាប់រហ័សរបស់ជនជាប់ចោទ ដែលសិទ្ធិនេះត្រូវធានាដោយច្បាប់។
លោកបន្តថា៖ «បើលើកឡើងពីភស្តុតាងថ្មីៗក្រោយអំឡុងពេលនៃការធ្វើដីកាសន្និដ្ឋានដំណោះស្រាយរបស់ចៅក្រមស៊ើបអីទៅទៀត អ៊ីចឹងយើងឃើញថា រឿងនេះគេដាក់ក្នុងកំណត់ឆ្នាំដែលកន្លងមក ហើយបើយកដល់ឆ្នាំ២០២០ វាជារឿងមួយដែលចម្លែក ហើយបើចេះតែបន្ថែមរហូតអ៊ីចឹង វាធ្វើឱ្យប៉ះពាល់ គេហៅថាផលប្រយោជន៍ជនជាប់សង្ស័យហើយ»។
បើទោះជាបែបណា នៅក្នុងកិច្ចប្រជុំគណៈរដ្ឋមន្រ្តី កាលពីឆ្នាំ២០២០ លោកនាយករដ្ឋមន្រ្តី ហ៊ុន សែន ធ្លាប់បានបញ្ជាក់ថា សំណុំរឿងលោក កឹម សុខា នេះអាចនឹងពន្យារពេលដល់ឆ្នាំ២០២៤ ទើបអាចមានដំណោះស្រាយ។ ហាក់ផ្ទុយពីនេះ លោក Ad Ward J.Markey សមាជិកព្រឹទ្ធសភារបស់រដ្ឋអាមេរិក ដែលទើបបញ្ចប់ការបំពេញទស្សនកិច្ចនៅកម្ពុជា កាលពីថ្ងៃទី១៧ ខែសីហា បានចេញសេចក្តីថ្លែងការណ៍រួម មួយថ្ងៃបន្ទាប់ពីចាកចេញពីកម្ពុជា ដោយជំរុញឱ្យរដ្ឋាភិបាលដែលដឹកនាំដោយគណបក្សប្រជាជនកម្ពុជា ត្រូវតែដោះលែងលោក កឹម សុខា ឱ្យមានសេរីភាពវិញ ដោយគ្មានលក្ខខណ្ឌ៕