រដ្ឋមន្ត្រីក្រសួងមហាផ្ទៃ លោក ស ខេង ឆ្លើយតបនឹងអ្នករាយការណ៍ពិសេសអង្គការសហប្រជាជាតិ ពាក់ព័ន្ធទៅនឹងការប្រឆាំងនឹងអំពើជួញដូរមនុស្ស ពលកម្មដោយបង្ខំ និងការកេងប្រវ័ញ្ចលើពលកម្មនោះ ថា កម្ពុជាក៏ជាប្រទេសដែលរងគ្រោះដោយសារអំពើទាំងនេះ ដោយពួកឧក្រិដ្ឋជនយកកម្ពុជា ជាកន្លែងដើម្បីធ្វើការឆបោកប្រព្រឹត្តអំពើជួញដូររត់ពន្ធមនុស្សនេះ។
លោក ស ខេង កាលពីថ្ងៃទី២៤ ខែសីហា បានអនុញ្ញាតឱ្យលោក វីទិត ម៉ុនតាប៊ន (Vitit Muntarbhorn) អ្នករាយការណ៍ពិសេសសិទ្ធិមនុស្សអង្គការសហប្រជាជាតិប្រចាំកម្ពុជា ចូលជួបដោយផ្ទាល់ ក្នុងកិច្ចពិភាក្សាផ្លាស់ប្តូរយោបល់ផ្សេងៗលើបញ្ហាដែលលោក វីទិត ម៉ុនតាប៊ន មានបំណងចង់លើកឡើង។
លោក ស ខេង ឆ្លើយតបនឹងការលើកឡើងពាក់ព័ន្ធទៅនឹងការប្រឆាំងនឹងអំពើជួញដូរមនុស្ស ពលកម្មដោយបង្ខំ និងការកេងប្រវ័ញ្ចលើពលកម្មនោះថា កម្ពុជាក៏ជាប្រទេសដែលរងគ្រោះដោយសារអំពើទាំងនេះដែរ ដោយហេតុថា ពួកឧក្រិដ្ឋជនបានឆ្លៀតកេងចំណេញទៅលើចំណុចខ្សោយមួយចំនួន ហើយយកកម្ពុជាជាកន្លែងដើម្បីធ្វើការឆបោកប្រព្រឹត្តអំពើជួញដូររត់ពន្ធមនុស្សនេះ។
រដ្ឋមន្ត្រីក្រសួងមហាផ្ទៃ បានប្រាប់លោក វីទីត មុនតាប៊ន ពីការប្តេជ្ញាចិត្តរបស់រដ្ឋាភិបាលកម្ពុជា និងក្រសួងមហាផ្ទៃ ក្នុងចំណាត់ការជាបន្តបន្ទាប់ទៀត និងបានបង្រា្កបក៏ដូចជា សង្គ្រោះជនរងគ្រោះបានជាច្រើននាក់កន្លងមក ហើយក៏បានបន្តកិច្ចការនេះជាប្រចាំផងដែរ។
លោកបានឱ្យដឹងទៀតថា ឆាប់ៗនេះលោកនឹងបន្តដឹកនាំ ដើម្បីដាក់ចេញផែនការតស៊ូ បង្ក្រាប និងប្រយុទ្ធប្រឆាំងបទល្មើសនេះ ព្រមទាំងកៀរគរការរួមចំណែក ផ្តល់កិច្ចសហការជាមួយបណ្តាភាគីពាក់ព័ន្ធ ដើម្បីឈានទៅដល់ការបង្ក្រាបមេខ្លោងជនល្មើសយកមកផ្តន្ទាទោសតាមច្បាប់។
នៅក្នុងជំនួបនេះ អ្នករាយការណ៍ពិសេសអង្គការសហប្រជាជាតិប្រចាំកម្ពុជា បានលើកឡើង ៥ចំណុចធំៗគឺ ពាក់ព័ន្ធទៅនឹងសិទ្ធិពលរដ្ឋ និងសិទ្ធិនយោបាយ បញ្ហាទីពីរ គឺពាក់ព័ន្ធទៅនឹងប្រព័ន្ធនៃការរៀបចំគ្រប់គ្រងពន្ធនាគារ និងយុត្តិធម៌ព្រហ្មទណ្ឌ បញ្ហាទីបី គឺការស្ដារនីតិសម្បទាអ្នកញៀនគ្រឿងញៀន បញ្ហាទីបួន គឺអំពីការជួញដូរមនុស្ស ការជួញដូរពលកម្មដោយបង្ខំ និងការកេងប្រវ័ញ្ចលើពលកម្ម និងបញ្ហាទីប្រាំ គឺអំពីកិច្ចសហប្រតិបត្តិការ និងជំនួយអាទិភាពផ្សេងៗ របស់អង្គការសហប្រជាជាតិ ពាក់ព័ន្ធនឹងការងារសិទ្ធិមនុស្ស។
លោក សេក សុជាតិ នាយកប្រតិបត្តិអង្គការអភិវឌ្ឍន៍ផ្នត់គំនិត បានឱ្យដឹងថា ការឆ្លើយតបរបស់រដ្ឋមន្រ្តីក្រសួងមហាផ្ទៃ ចំពោះការជួញដូរមនុស្សនេះគឺ ការពិតដែលមិនអាចបដិសេធបាន ដោយថា កម្ពុជាសព្វថ្ងៃមានភាពច្របូកច្របល់ទាំងផ្នែកសេដ្ឋកិច្ចនយោបាយនិងក្នុងសង្គមដែលហាក់ដូចជា គ្របដណ្តប់លើអំពើពុករលួយ ចាក់ឫសជ្រៅលើមន្តី្ររាជការមួយចំនួន ជាហេតុមួយដែលអាចបង្កឱ្យមានអំពើជួញដូរមនុស្ស រួមទាំង គ្រឿងញៀន និងបទល្មើសអន្តរជាតិផងដែរ។
លោកបានបន្តឱ្យដឹងថា ក្រៅពីអំពើពុករលួយ ក៏មានការបង្កើតបក្ខពួកនិយម និងក្រុមទុច្ចរិតមួយចំនួន សហការជាមួយមន្រ្តីរាជការដែលគាំទ្រផ្តល់ទីតាំងឱ្យពួកឧក្រិដ្ឋជនប្រព្រឹត្តអំពើកេងប្រវ័ញ្ចពលកម្ម និងការជួញដូរមនុស្សដើម្បីទទួលលាភសក្ការៈមកវិញ។
លោក សេក សុជាតិ ថ្លែងថា៖ «ក្រៅពីអំពើពុករលួយនេះ យើងឃើញមានបញ្ហាជាច្រើនពាក់ព័ន្ធជាមួយនឹងការបង្កើតឱ្យមានបក្ខពួកនិយម ហើយមានក្រុមទុច្ចរិតមួយចំនួន ដែលបានជួយគាំទ្រទៅដល់ក្រុមអ្នកដែលរកទទួលទាន ឬក៏អ្នកធ្វើការនៅក្នុងវិស័យរដ្ឋ នឹងឱ្យគប់គិតជាមួយជាប្រព័ន្ធដើម្បីបានទទួលនូវលាភសក្ការៈ ហើយលាភសក្ការៈទាំងអស់ហ្នឹងហើយ ដែលជាបញ្ហានាំឱ្យពិបាកនៅក្នុងការដោះស្រាយបញ្ហានៅក្នុងសង្គម ក៏ដូចជា នយោបាយនៅចំពោះមុខយើង ដូចនៅពេលបច្ចុប្បន្ននេះណាស់»។
លោកបានបញ្ជាក់ថា កម្ពុជាត្រូវបានអង្គការអន្តរជាតិធំៗដាក់ចំណាត់ថ្នាក់មិនល្អនោះទេ ដូច្នេះមុខមាត់កម្ពុជា គួរតែមានការផ្លាស់ប្តូរ និងត្រូវរឹតបន្តឹងដល់ការអនុវត្តច្បាប់ជាពិសេសត្រូវតែចាត់វិធានការឱ្យតឹងរ៉ឹងបំផុតដល់មន្រ្តីដែលពាក់ព័ន្ធ ដោយមិនមានការយោគយល់ ដើម្បីទប់ស្កាត់មិនឱ្យបញ្ហានោះក្លាយជាគ្រោះសម្រាប់កម្ពុជា។
ទាក់ទងនឹងរឿងនេះដែរ រដ្ឋបាលខេត្តព្រះសីហនុ នៅថ្ងៃទី២៥ ខែសីហា បានចេញសេចក្ដីប្រកាសព័ត៌មានជូនដំណឹងដល់សាធារជនឱ្យបានដឹងថា លោក គួច ចំរើន អភិបាលខេត្តព្រះសីហនុ មានវិធានការលើករណីការទិញលក់ពលកម្ម ការជួញដូរ និងការបង្ខាំងមនុស្សដោយខុសច្បាប់ នៅក្នុងភូមិសាស្ត្រខេត្តព្រះសីហនុ។
ក្នុងសេចក្តីប្រកាសព័ត៌មាន បានឱ្យដឹងថា រាល់ទីតាំងអាជីវកម្មដែលជនល្មើសប្រើប្រាស់សម្រាប់ការទិញ-លក់កម្លាំងពលកម្ម ការជួញដូរ និងបង្ខាំងមនុស្សដោយខុសច្បាប់ ត្រូវបិទអាជីវកម្មជាដាច់ខាត និងនាំយកជនល្មើស រួមទាំងម្ចាស់ទីតាំងដែលចូលរួមសមគំនិត មកផ្តន្ទាទោសតាមច្បាប់ឱ្យបានធ្ងន់ធ្ងរ និងគ្មានការលើកលែង។
សេចក្តីប្រកាសព័ត៌មានដដែលនេះ បានឱ្យដឹងទៀតថា ប្រតិបត្តិការស្រាវជ្រាវ និងបង្ក្រាបបទល្មើសទាំងនេះ ស្ថិតក្រោមការសម្របសម្រួលរបស់តំណាងអយ្យការ ហើយអាជ្ញាធរពាក់ព័ន្ធក្នុងការស្រាវជ្រាវ និងបង្ក្រាបការទិញ-លក់កម្លាំងពលកម្ម ការជួញដូរ និងបង្ខាំងមនុស្សដោយខុសច្បាប់ក្នុងភូមិសាស្រ្តខេត្តព្រះសីហនុ ត្រូវអនុវត្តឱ្យបានហ្មត់ចត់ជាទីបំផុត ស្រាវជ្រាវដល់ឫសគល់និងមេខ្លោង ដើម្បីនាំបទល្មើសទៅផ្តន្ទាទោសតាមច្បាប់ឱ្យបាន។
គួរបញ្ជាក់ដែរថា ករណីអំពើជួញដូរមនុស្ស ពលកម្មដោយបង្ខំ និងការកេងប្រវ័ញ្ចលើពលកម្មនោះ កើតឡើងច្រើននៅក្នុងខេត្តព្រះសីហនុ សង្គមស៊ីវិល និងប្រជាពលរដ្ឋមួយចំនួន បានអំពាវនាវទៅអាជ្ញាធរពាក់ព័ន្ធ ទប់ស្កាត់បទល្មើសបង្ខាំងមនុស្សខុសច្បាប់ ចាប់ជំរិត អំពើហិង្សា គ្រឿងញៀន និងបទល្មើសផ្សេងៗទៀតឱ្យមានប្រសិទ្ធភាព និងតម្លាភាព ដើម្បីការពារសុខសន្តិភាពជូនប្រជាពលរដ្ឋ និងភ្ញៀវទេសចរណ៍ដែលមកលេងកម្សាន្តខេត្តជាប់មាត់សមុទ្រមួយនេះ៕
