យោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី២៦ ខែសីហា ឆ្នាំ២០២២នេះ បានឱ្យដឹងថា នាយករដ្ឋមន្ត្រីថៃដែលត្រូវបានតុលាការព្យួរពីតំណែងឈ្មោះ លោក ប្រាយុទ្ធ ចាន់អូចា (Prayuth Chan-ocha) បាននិយាយនៅលើប្រព័ន្ធផ្សព្វផ្សាយសង្គមថា លោកនឹងបន្តតួនាទីជារដ្ឋមន្ត្រីការពារជាតិ។
ការអះអាងបែបនេះធ្វើឡើងនៅក្នុងសុន្ទរកថាជាលើកដំបូងរបស់លោកទៅកាន់សាធារណជន ចាប់តាំងពីតុលាការបានបញ្ចប់តួនាទីរបស់លោកជានាយករដ្ឋមន្ត្រី ខណៈតុលាការពិនិត្យមើលរយៈពេលផុតកំណត់នៃអាណត្តិរបស់លោក។
ឧបនាយករដ្ឋមន្ត្រីថៃ លោក ប្រាវីត វង់ស៊ូវ៉ាន់ (Prawit Wongsuwan) កំពុងកាន់តំណែងជានាយករដ្ឋមន្ត្រីស្ដីទី នៃប្រទេសដែលមានសេដ្ឋកិច្ចរីកចម្រើនបំផុតលំដាប់ទី២ នៅតំបន់អាស៊ីអាគ្នេយ៍មួយនេះ។
លោក ប្រាយុទ្ធ ចាន់អូចា បាននិយាយនៅលើគណនី Twitter ផ្លូវការរបស់លោក កាលពីល្ងាចថ្ងៃព្រហស្បតិ៍ថា៖ «ខ្ញុំនឹងបន្តបំពេញភារកិច្ច និងការទទួលខុសត្រូវរបស់ខ្ញុំ ក្នុងនាមជារដ្ឋមន្ត្រីការពារជាតិ សម្រាប់ប្រទេសថៃ និងប្រជាជនថៃជារៀងរាល់ថ្ងៃ»។
កាលពីថ្ងៃពុធ តុលាការធម្មនុញ្ញថៃបានសម្រេចបើកសវនាការលើញត្តិដែលដាក់ដោយគណបក្សប្រឆាំង ដោយលើកហេតុផលថា រយៈពេលដែលលោក ប្រាយុទ្ធ ចាន់អូចា មានតួនាទីជាប្រមុខរបបយោធា បន្ទាប់ពីលោកបានឡើងកាន់អំណាចក្នុងរដ្ឋប្រហារឆ្នាំ២០១៤ គួរតែរាប់បញ្ចូលក្នុងរយៈពេលនៃការកំណត់អាណត្តិរបស់លោក។
គួរបញ្ជាក់ថា រដ្ឋធម្មនុញ្ញថៃកំណត់អាណត្តិនាយករដ្ឋមន្ត្រី ៨ឆ្នាំ។
នៅមិនទាន់មានភាពច្បាស់លាស់នៅឡើយ ថាតើពេលណាតុលាការនឹងចេញសេចក្តីសម្រេចលើការពិនិត្យមើលរយៈពេលនៃអាណត្តិរបស់លោកនេះនៅឡើយទេ។
ភាពចម្រូងចម្រាសលើការកំណត់អាណត្តិរបស់លោក ប្រាយុទ្ធ ចាន់អូចា គឺជាចំណុចចុងក្រោយបំផុតក្នុងភាពចលាចលនយោបាយរយៈពេលជិតពីរទសវត្សរ៍ ដែលរួមមានរដ្ឋប្រហារចំនួនពីរលើក និងការតវ៉ាដោយហិង្សា ដែលផ្តើមចេញពីការប្រឆាំងទៅនឹងការចូលរួមរបស់យោធានៅក្នុងនយោបាយ។
អ្នកនាំពាក្យរដ្ឋាភិបាល លោក អាន់នុចា ប៊ូរ៉ាប៉ាឆៃស្រ៊ី (Anucha Burapachaisri) បាននិយាយកាលពីថ្ងៃសុក្រថា គណៈរដ្ឋមន្ត្រីនៅតែបន្តដំណើរការជាធម្មតា៕
