សមត្ថកិច្ចជំនាញនៃមន្ទីរប្រឆាំងគ្រឿងញៀន បានបង្ក្រាបករណីជួញដូរគ្រឿងញៀនឆ្លងដែនពីរករណីដាច់ដោយឡែកពីគ្នា នៅចុងខែសីហា ដោយចាប់ខ្លួនជនជាតិថៃ ៤នាក់ និងជនជាតិចិនម្នាក់ ព្រមទាំងរឹបអូសគ្រឿងញៀនសរុបជាង ១០០គីឡូក្រាម។
ទំព័រហ្វេសប៊ុកមន្ទីរប្រឆាំងគ្រឿងញៀនឱ្យដឹងនៅថ្ងៃសៅរ៍នេះថា កាលពីថ្ងៃទី៣១ ខែសីហា ឆ្នាំ២០២២ កម្លាំងជំនាញ(ក៥)នៃមន្ទីរប្រឆាំងបទល្មើសគ្រឿងញៀន ដឹកនាំដោយមន្ត្រីជំនាញ និងខាងស្ថាប័នតុលាការ បានបើកកិច្ចប្រតិបត្តិការបង្ក្រាប ក្រុមឩក្រិដ្ធជន ជនជាតិថៃ ដឹកជញ្ជូន ជួញដូរគ្រឿងញៀននៅចំណុច ផ្លូវកែវចិន្តា ស្ថិតក្នុងភូមិ៣ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ។
ប្រភពដដែលបន្តថា ក្នុងករណីនេះ ជនសង្ស័យបានបើករថយន្តបំបុក និងប្រើអាវុធបាញ់មកលើសមត្ថកិច្ចចំនួន ៨គ្រាប់ ហើយសមត្ថកិច្ចប្រើសិទ្ធិការពារខ្លួនបាញ់តបតវិញ បណ្តាលឱ្យជនសង្ស័យ ១នាក់ ស្លាប់ និង ១នាក់ទៀតរងរបួស ។ ក្នុងប្រតិបត្តិការនេះ សមត្ថកិច្ចចាប់ខ្លួនជនជាតិថៃ៤នាក់ ដោយក្នុងនោះស្លាប់ម្នាក់ និងរបួសម្នាក់ផងដែរ អមដោយគ្រឿងញៀនសរុប ៤១គីឡូក្រាម ៩៣២ក្រាម ដោយក្នុងនោះ កេតាមីន(KETAMINE)ទម្ងន់ ១២ គីឡូក្រាម ១៨០ ក្រាម និងអ៊ិចស្តាស៊ី(MDMA)ទម្ងន់ ២៩ គីឡូក្រាម ៧៥២ ក្រាម ព្រមទាំងរថយន្ត ២គ្រឿង និងអាវុធខ្លី ២ដើម។
មន្ទីរប្រឆាំងបទល្មើសគ្រឿងញៀន បច្ចុប្បន្ន ជនសង្ស័យ និងវត្ថុតាង សមត្ថកិច្ចជំនាញបានកសាងសំណុំរឿង បញ្ជូនទៅសាលាដំបូងរាជធានីភ្នំពេញ បន្តតាមនីតិវិធី។
ដោយឡែក សមត្ថកិច្ចជំនាញនៃមន្ទីរប្រឆាំងគ្រឿងញៀន បង្ក្រាបករណីដឹកជញ្ជូន ជួញដូរគ្រឿងញៀនឆ្លងដែន ចាប់ខ្លួនជនជាតិចិន ១នាក់ និងរឹបអូសគ្រឿងញៀនជាង ១០០ គីឡូក្រាម។
ការបង្ក្រាបនេះ ធ្វើឡើងកាលពីថ្ងៃទី៣០ ខែសីហា ឆ្នាំ២០២២ កម្លាំងជំនាញ(ក៩) នៃមន្ទីរប្រឆាំងបទល្មើសគ្រឿងញៀន បានស៊ើបអង្កេតបង្រ្កាប នៅចំណុច ផ្លូវដើមឈើចាំស្នេហ៍ ស្ថិតក្នុងភូមិគគី ឃុំបិតត្រាង ស្រុកព្រៃនប់ ខេត្តព្រះសីហនុ។
ជាលទ្ធផលនៃការបង្ក្រាបនេះ បានឃាត់ខ្លួនជនសង្ស័យជាជនជាតិចិន ម្នាក់ ឈ្មោះ TU SUERONG ភេទប្រុស អាយុ ៣៦ឆ្នាំ ជនជាតិ ចិន និងវត្ថុតាងរួមមានកេតាមីន(KETAMINE) ១០០ដុំ ស្មើទម្ងន់ ១០០ គ.ក្រ និង៨០ក្រាម។
បច្ចុប្បន្ន ជនសង្ស័យ និងវត្ថុតាង សមត្ថកិច្ចជំនាញបានបញ្ជូនទៅស្នងការដ្ឋាននគរបាលខេត្តព្រះវិហារ ដើម្បីកសាងសំណុំរឿង បន្តទៅសាលាដំបូងខេត្តព្រះវិហារតាមនីតិវិធី។
ដោយឡែក ជនសង្ស័យជាជនជាតិចិនម្នាក់ ត្រូវបានសាលាដំបូងខេត្តព្រះវិហារ ចេញដីកាសម្រេចឃុំខ្លួនជាបណ្តោះអាសន្ននៅក្នុងពន្ធនាគារ ពីបទជួញដូរគ្រឿងញៀនឆ្លងដែនជាង១០០គីឡូក្រាមផងដែរ៕