អាជ្ញាធរខេត្តសៀមរាប ព្រមានចាត់វិធានការផ្លូវច្បាប់ ប្រសិនបើពលរដ្ឋមិនព្រមចាកចេញពីចម្ការរបស់លោក ខឹម វាសនា ខណៈតំណាងរបស់លោក ខឹម វាសនា បានចុះកិច្ចសន្យាព្រមព្រៀងជាមួយសមត្ថកិច្ចថា នឹងជំរុញឱ្យសមាជិកខ្លួនចាកចេញឱ្យអស់ត្រឹមថ្ងៃទី៥ ខែកញ្ញានេះ។
ការព្រមាននេះ ធ្វើឡើងបន្ទាប់ពី ប្រធានគណបក្សសម្ព័ន្ធដើម្បីប្រជាធិបតេយ្យ លោក ខឹម វាសនា បានប្រកាសកៀរគរអ្នកគាំទ្រលោកមកប្រមូលផ្តុំគ្នានៅចម្ការរបស់លោកក្នុងស្រុកបន្ទាយស្រី ក្នុងខេត្តសៀមរាប ដោយថា ពិភពលោកទាំងមូលនឹងលិចលង់ដោយទឹកជំនន់ ក្នុងនោះមានតែទីតាំងចម្ការលោកមួយទេ ដែលអាចរួចផុតពីគ្រោះមហន្តរាយនេះ។
ការកៀរគរនេះ បានធ្វើឱ្យពលរដ្ឋដែលអាជ្ញាធរប៉ាន់ប្រមាណថា មានជាង១ម៉ឺន៥ពាន់នាក់ ដែលនៅក្នុងស្រុក និងត្រលប់ពីក្រៅប្រទេស បានធ្វើដំណើរទៅ និងសាងសង់រោងជាច្រើនស្នាក់នៅទីតាំងនោះ។
ស្នងការនគរបាលខេត្តសៀមរាប លោក តេង ច័ន្ទណាត មានប្រសាសន៍ប្រាប់ វីអូឌី នៅថ្ងៃចន្ទនេះថា សមាជិកបក្សអ៊ិលឌីភី (LDP) ដែលមកប្រមូលផ្តុំតាមការកៀរគររបស់លោក ខឹម វាសនា ប្រមាណ ៥ ០០០នាក់បានចាកចេញពីចម្ការរបស់មេបក្សសម្ព័ន្ធនេះហើយ គិតត្រឹមថ្ងៃទី២ ដល់ទី៤ ខែកញ្ញា។
លោកពុំទាន់ដឹងពីតួលេខច្បាស់លាស់ថា ពលរដ្ឋដែលមកចម្ការលោក ខឹម វាសនា មានសរុបប៉ុន្មាននោះទេ ខណៈការវាយតម្លៃគឺប្រមាណ ១៥ ០០០នាក់។ ក្រៅពីនោះ លោកថា សមាជិកគណបក្សសម្ព័ន្ធដើម្បីប្រជាធិតេយ្យប្រាប់អាជ្ញាធរថា ពួកគេប្រមាណ ១ ០០០នាក់ទៀតប៉ុណ្ណោះ កំពុងស្ថិតនៅក្នុងចម្ការលោក ខឹម វាសនា នៅឡើយ។
បែបនេះក្តី ស្នងការនគរបាលខេត្តសៀមរាបរូបនេះថា តំណាងលោក ខឹម វាសនា បានចុះកិច្ចសន្យាថា នឹងជំរុញឱ្យសមាជិករបស់ខ្លួនដែលនៅសេសសល់ចាកចេញឱ្យអស់ត្រឹមថ្ងៃទី៥ ខែកញ្ញានេះ។
លោក តេង ច័ន្ទណាត បន្តថា នេះជាករណីដាច់ខាតដែលពលរដ្ឋទាំងនោះត្រូវតែរំសាយការប្រមូលផ្តុំ ហើយចាកចេញតាមកាលកំណត់។ យ៉ាងណា លោកថា អាជ្ញាធរនឹងពិនិត្យពិចារណាអន្តរាគមន៍តាមស្ថានភាពជាក់ស្តែង បើពួកគេនៅតែមិនព្រមចាកចេញ។
លោក តេង ច័ន្ទណាត ថា៖ «ជាវិធាន អាហ្នឹងយើងត្រូវតែដាច់ខាតហើយ! ប៉ុន្តែយើងនៅតែមានការនិយាយគ្នាបន្តទៀត បើសិនអ្នកខ្លះ ជួនកាលគាត់មិនអាចរើពេលហ្នឹង គាត់អាចរើស្អែក អាហ្នឹងក៏យើងមើលទៅតាមជាក់ស្តែង។ ប៉ុន្តែដាច់ខាត យើងធ្វើឱ្យម្ចាស់ទីតាំងហ្នឹង គាត់ជំរុញ […] វាដល់ពេលវេលាដែលម្ចាស់ទីតាំង សាមីខ្លួន ព្រោះគាត់បានចុះកិច្ចសន្យាជាមួយអាជ្ញាធរហើយ។ [បើករណីអ្នកមួយចំនួនមិនព្រមចាកចេញពីចម្ការលោក ខឹម វាសនា?] អាហ្នឹងគឺសំខាន់គឺត្រូវឱ្យម្ចាស់ទីតាំងហ្នឹង លោកជួយអន្តរាគមន៍ ហើយខាងសមត្ថកិច្ចត្រូវអន្តរាគមន៍ អាហ្នឹងយើងមើលទៅតាមជាក់ស្តែង»។
លោក តេង ច័ន្ទណាត ថា តាំងពីចុះប្រតិបត្តិការនៅទីតាំងរបស់លោក ខឹម វាសនា មក សមត្ថកិច្ចបានឃាត់ខ្លួនសមាជិករបស់លោក ខឹម វាសនា ជាស្ត្រីចំនួន ៦នាក់ កាលពីថ្ងៃទី៣ខែកញ្ញា ករណីគេចពីរបាំងសមត្ថកិច្ច និងប្រឆាំងមន្ត្រីរាជការសាធារណៈ ហើយសំណុំរឿងនេះតុលាការកំពុងបន្តនីតិវិធី។
ស្នងការខេត្តរូបនេះថា លោក ខឹម វាសនា កំពុងស្ថិតនៅចម្ការរបស់លោកស្ថិតក្នុងខេត្តសៀមរាបដដែល ខណៈកងកម្លាំងសមត្ថកិច្ចប្រហែល ៥០០នាក់ ទៅ ៨០០នាក់ កំពុងប្រចាំការនៅទីនោះ។
វីអូឌី បានព្យាយាមរកការបំភ្លឺពី អ្នកនាំពាក្យគណបក្សសម្ព័ន្ធដើម្បីលទ្ធិប្រជាធិបតេយ្យ លោក កូវ គា ប៉ុន្តែមិនមានការឆ្លើយតបទេនៅថ្ងៃចន្ទនេះ។
យ៉ាងណា ក្នុងលិខិតកិច្ចសន្យាចុះថ្ងៃទី ៣១ ខែសីហា ឆ្នាំ២០២២ ដែលមានស្នាមមេដៃផងនោះ តំណាង លោក ខឹម វាសនា ចំនួន៦រូប បានទទួលស្គាល់កំហុសដែលបានកៀរគរប្រមូលផ្តុំប្រជាពលរដ្ឋ ដោយពុំមានច្បាប់អនុញ្ញាត។
ក្នុងនោះពួកគេបានសន្យាចំនួន ៦ចំណុចទៅកាន់អាជ្ញាធរ ដោយអះអាងពីការបញ្ចប់ការជួបជុំប្រមូលផ្តុំ ព្រមទាំងប្រកាសរំសាយកម្លាំង ចាកចេញពីចម្ការ លោក ខឹម វាសនា ឱ្យអស់ត្រឹមម៉ោង៥កន្លះ ល្ងាចថ្ងៃទី៥ ខែកញ្ញា ឆ្នាំ២០២២។
កិច្ចសន្យាសរសេរថា៖ «ក្នុងករណីជនណាម្នាក់រឹងរុះ មិនព្រមអនុវត្តតាមការសំណូមពរឱ្យចាកចេញតាមកាលបរិច្ឆេទដូចបានកំណត់ខាងលើនេះ សូមឱ្យអាជ្ញាធរមានសមត្ថកិច្ចជួយអន្តរាគមន៍ ឬមានចំណាត់ការផ្លូវច្បាប់ឱ្យពួកគាត់ចាកចេញ។ ទន្ទឹមនេះ ចាប់ពីថ្ងៃប្រកាសឱ្យចាកចេញ យើងខ្ញុំសុំមិនទទួលខុសត្រូវលើការដាំស្លរ ឬផ្គត់ផ្គង់អាហារឱ្យប្រជាពលរដ្ឋតទៅទៀតនាះទេ»។
ស្ថាបនិកអង្គការអភិវឌ្ឍន៍ផ្នត់គំនិត លោក សេក សុជាតិ ចាត់ទុកឥទ្ធិពលអូសទាញរបស់លោក ខឹម វាសនា ថា ជារឿងដ៏អាក្រក់ដែលអាចរុញច្រានកម្ពុជាឱ្យរងទុក្ខពីអំពើអសីលធម៌ ការបំពានសិទ្ធិ គ្រួសារបែកបាក់ ហើយបុគ្គលជាច្រើនទៀតបោះបង់តួនាទី និងកាតព្វកិច្ចរបស់ខ្លួន មិនថាក្នុងជីវភាពខ្លួនឯង គ្រួសារ និងសង្គមជាតិ។
លោក សេក សុជាតិ ថា រដ្ឋាភិបាលមានតួនាទីចាត់វិធានការឱ្យបានតឹងរឹងចំពោះករណីនេះ តាមរយៈការហៅ លោក ខឹម វាសនា មកជួបពិភាក្សាជាមួយអាជ្ញាធរ ដើម្បីសិក្សាពីឬសគល់នៃបញ្ហា និងដោះស្រាយតាមផ្លូវច្បាប់ដើម្បីបញ្ឈប់ឥទ្ធិពលមនោគមន៍វិជ្ជានេះ។
លោកថា បើរដ្ឋាភិបាលបណ្តែតបណ្តោយឱ្យលោក ខឹម វាសនា បន្តធ្វើតាមអំពើចិត្ត នោះនឹងបង្កផលប៉ះពាល់ដល់អនាគតពលរដ្ឋ និងសង្គមជាតិទាំងមូល។
លោក សេក សុជាតិ ថា៖ «ឥទ្ធិពលនេះវានឹងជះកាន់តែធំទៅ ហើយនឹងធ្វើឱ្យមនុស្សបាត់បង់ជំនឿទៅលើផ្លូវច្បាប់ លែងជឿទៅលើរដ្ឋាភិបាល។ ដូច្នេះហើយវានឹងបង្កើតឱ្យមាននូវវិនាសកម្មច្រើនផ្សេងៗទៀត អាចថា នឹងមានកើតចេញជាអំពើឃោរឃៅ យង់ឃ្នងណាមួយតាមរយៈការប្រើប្រាស់មនោគមវិជ្ជាដើម្បីសន្តំផ្នត់គំនិតរបស់មនុស្សហ្នឹងឱ្យភ្លេច ឱ្យយល់ថាអ្វីដែលខ្លួនធ្វើ គឺជាសិទ្ធិ ជាអំណាចដែលបានមកពីព្រហ្ម មកពីអីចឹងទៅ ដែលធ្វើឱ្យបញ្ហាហ្នឹងវាអាចនឹងកើតធំឡើង»។
តាមវីដេអូជាច្រើន ដែលបានបង្ហោះនៅលើបណ្តាញសង្គមហ្វេសប៊ុកបង្ហាញពីទិដ្ឋភាពគ្រួសារជាច្រើនមកពីតាមបណ្តាខេត្តមួយចំនួន បានតាមរកសាច់ញាតិរបស់ពួកគេដែលកំពុងស្ថិតនៅក្នុងចម្ការរបស់លោក ខឹម វាសនា។
គ្រួសារខ្លះ បែកព្រាត់ប្រាស់ប្រពន្ធកូន ឪពុកម្តាយ ហើយខ្លះទៀតបាត់ដំណឹងកូនរាប់ខែ រាប់ថ្ងៃ ហើយនៅពេលបានជួបប្រពន្ធ ប្តី និងកូនៗពួកគេ អ្នកគាំទ្រលោក ខឹម វាសនា ទាំងនោះមិនព្រមចាកចេញពីចម្ការឡើយ ព្រមទាំងប្រឆាំងនឹងគ្រួសារពួកគេដែលកំពុងតាមរកថែមទៀតផង។
នៅថ្ងៃទី៥ ខែកញ្ញានេះ សារព័ត៌មានស្និទរដ្ឋាភិបាល Fresh News បានចុះផ្សាយថា យុវជនម្នាក់បានចងកសម្លាប់ខ្លួន បន្ទាប់ពីត្រឡប់មកពីចម្ការលោក ខឹម វាសនា នៅខេត្តសៀមរាបវិញ ហើយត្រូវបានឪពុកម្ដាយណែនាំ និងស្ដីបន្ទោស ព្រោះមិនចង់ឱ្យកូនត្រឡប់ទៅវិញ។
ករណីទាំងនេះ លោក សេក សុជាតិ បារម្ភថា បើលោក ខឹម វាសនា មានគំនិតទុច្ចរិតណាមួយកាន់តែជ្រៅថែមទៀតនោះ នឹងធ្វើឱ្យសង្គមកាន់តែច្របូកច្របល់ ពលរដ្ឋជាច្រើនដែលមិនបានដឹងនឹងកាន់តែងប់ងល់ លិចលង់ក្នុងមនោគមន៍វិជ្ជានេះ ហើយរងសម្ពាធដល់ធ្វើអត្តឃាត ព្រមទាំងអាចបង្កើតជាគំរូអាក្រក់ទៅអនាគត៕