រុស្ស៊ីនឹងទិញគ្រាប់ផ្លោង និងគ្រាប់រ៉ុក្កែតរាប់លានគ្រាប់ពីកូរ៉េខាងជើង។ នេះបើយោងតាមរបាយការណ៍ស៊ើបអង្កេតរបស់សហរដ្ឋអាមេរិក នាពេលថ្មីៗនេះ ដែលត្រូវបានទីភ្នាក់ងារសារព័ត៌មាន Al Jazeera យកមកចុះផ្សាយនៅថ្ងៃទី៦ ខែកញ្ញា ឆ្នាំ២០២២នេះ។
សារព័ត៌មាន The New York Times ដែលបានរាយការណ៍ពីការទិញនេះ បាននិយាយថា របាយការណ៍បានផ្ដល់ព័ត៌មានតិចតួចអំពីអាវុធដែលនឹងត្រូវទិញ ឬពេលវេលា ឬទំហំនៃការដឹកជញ្ជូន។
ប្រភពដដែលបន្តថា ក្រៅពីគ្រាប់រ៉ុក្កែតរយៈចម្ងាយខ្លី និងគ្រាប់ផ្លោង រុស្ស៊ីអាចនឹងទិញសព្វាវុធបន្ថែមទៀតពីកូរ៉េខាងជើងនាពេលអនាគត។
ចំណាត់ការរបស់រុស្ស៊ីក្នុងការទិញសព្វាវុធពីកូរ៉េខាងជើង ដែលជារដ្ឋឯកោ និងទទួលរងទណ្ឌកម្មពីអន្តរជាតិចំពោះកម្មវិធីអាវុធនុយក្លេអ៊ែររបស់ខ្លួន បង្ហាញថា «យោធារុស្ស៊ីកំពុងខ្វះខាតសព្វាវុធនៅក្នុងប្រទេសអ៊ុយក្រែន ដោយសារតែរងទណ្ឌកម្មពីអន្តរជាតិ»។ នេះបើយោងតាមការរាយការណ៍របស់ទីភ្នាក់ងារសារព័ត៌មាន Associated Press ដោយស្រង់សម្តីមន្ត្រីអាមេរិកម្នាក់ដែលសុំមិនបញ្ចេញឈ្មោះ។
រុស្ស៊ីបានពង្រឹងទំនាក់ទំនងជាមួយប្រទេសនានា រួមទាំងកូរ៉េខាងជើង និងអ៊ីរ៉ង់ ចាប់តាំងពីឈ្លានពានអ៊ុយក្រែនកាលពីខែកុម្ភៈ។ ការឈ្លានពាននេះ បាននាំឱ្យមានការថ្កោលទោស និងការដាក់ទណ្ឌកម្មពីអន្តរជាតិ ដែលបង្កឱ្យមានកង្វះខាតផ្នែកសព្វាវុធរបស់ខ្លួន។
សហរដ្ឋអាមេរិកធ្លាប់បាននិយាយថា ទីក្រុងមូស្គូបាននិងកំពុងទិញយន្តហោះគ្មានមនុស្សបើកពីប្រទេសអ៊ីរ៉ង់។
គួរបញ្ជាក់ថា ប្រទេសអ៊ីរ៉ង់ មិនបានចូលរួមក្នុងការថ្កោលទោសប្រទេសរុស្ស៊ីឡើយ ក្នុងករណីឈ្លានពានអ៊ុយក្រែន ផ្ទុយទៅវិញបានបន្ទោសការពង្រីកខ្លួនរបស់ណាតូ (NATO) នៅអឺរ៉ុបខាងកើត ថាជាមូលហេតុនៃជម្លោះរវាងរុស្ស៊ី និងអ៊ុយក្រែន។
កាលពីខែកក្កដា អ៊ុយក្រែនបានកាត់ផ្តាច់ទំនាក់ទំនងជាមួយកូរ៉េខាងជើង បន្ទាប់ពីទីក្រុងព្យុងយ៉ាងបានចូលរួមជាមួយរុស្ស៊ី និងស៊ីរី ក្នុងការទទួលស្គាល់សាធារណរដ្ឋចំនួន២ ដែលប្រកាសឯករាជ្យដោយខ្លួនឯងនៅភាគខាងកើតអ៊ុយក្រែន៕