ការឈប់សម្រាករបស់កម្មករ-និយោជិតនាឱកាសភ្ជុំបិណ្ឌនេះ ពុំមានការលើកថ្ងៃឡើយ បើទោះចំថ្ងៃចុងសប្ដាហ៍ សៅរ៍-អាទិត្យ ក្ដី ខណៈរោងចក្រ សហគ្រាសណាដែលមិនអាចឱ្យបុគ្គលិកឈប់ព្រមគ្នាក្នុងពេលតែមួយបាន អាចបែងចែកឱ្យកម្មករនិយោជិតបានឈប់សម្រាកទៅតាមថ្ងៃបុណ្យនីមួយៗដោយផ្លាស់វេនគ្នា និងមានសិទ្ធិទទួលប្រាក់បំណាច់បន្ថែម។
នេះបើតាមសេចក្ដីជូនដំណឹងស្ដីពី «ការអនុវត្តការឈប់សម្រាកក្នុងពិធីបុណ្យភ្ជុំបិណ្ឌ ឆ្នាំ២០២២» របស់ក្រសួងការងារ និងបណ្ដុះបណ្ដាលវិជ្ជាជីវៈចុះថ្ងៃទី៧ ខែកញ្ញា។
សេចក្តីជូនដំណឹងបានប្រាប់ឱ្យម្ចាស់រោងចក្រ សហគ្រាស អនុញ្ញាតឱ្យកម្មករនិយោជិតទាំងអស់របស់ខ្លួនឈប់សម្រាកដោយមានប្រាក់ឈ្នួលនាឱកាសពិធីបុណ្យភ្ជុំបិណ្ឌ ក្នុងរយៈពេលបីថ្ងៃ ចាប់ពីថ្ងៃទី២៤-២៥-២៦ ដែលត្រូវនឹងថ្ងៃសៅរ៍ អាទិត្យ និងថ្ងៃចន្ទ ក្នុងខែកញ្ញា ឆ្នាំ២០២២។
សេចក្តីជូនដំណឹងបញ្ជាក់ថា៖ «សូមលោក លោកស្រី ជាម្ចាស់ ឬនាយករោងចក្រ សហគ្រាស អនុញ្ញាតឱ្យកម្មករនិយោជិតទាំងអស់របស់ខ្លួនឈប់សម្រាកដោយមានប្រាក់ឈ្នួល នាឱកាសពិធីបុណ្យភ្ជុំបិណ្ឌខាងមុខនេះ ក្នុងរយៈពេលបីថ្ងៃ គឺថ្ងៃទី២៤ – ២៥ និងថ្ងៃទី២៦ ខែកញ្ញា ឆ្នាំ២០២២»។
ដោយឡែក ក្រសួងការងារថា ចំពោះរោងចក្រសហគ្រាសណាដែលអាជីវកម្មមានលក្ខណៈសកល ត្រូវប្រព្រឹត្តទៅជាប្រចាំ និងមិនអាចបញ្ឈប់សកម្មភាពបាន មិនអាចឱ្យបុគ្គលិកឈប់ព្រមគ្នាក្នុងពេលតែមួយបាន នោះស្ថាប័នត្រូវរៀបចំបែងចែកឱ្យកម្មករនិយោជិតបានឈប់សម្រាកទៅតាមថ្ងៃបុណ្យនីមួយៗដោយផ្លាស់វេនគ្នា។
ក្រសួងការងារបន្តថា កម្មករនិយោជិតដែលធ្វើការនៅថ្ងៃឈប់បុណ្យភ្ជុំបិណ្ឌនេះ មានសិទ្ធិទទួលនូវប្រាក់បំណាច់បន្ថែម ដែលមានចំនួនស្មើនឹងប្រាក់ឈ្នួលថ្ងៃធ្វើការធម្មតា។ ម្ចាស់រោងចក្រ សហគ្រាស ត្រូវរៀបចំបញ្ជីឈ្មោះកម្មករនិយោជិតដែលត្រូវផ្លាស់ប្ដូរគ្នាឈប់សម្រាកតាមកាលបរិច្ឆេទនីមួយៗ និងរក្សាទុកជាប្រចាំ សម្រាប់ការត្រួតពិនិត្យរបស់អធិការការងារ។
សេចក្តីជូនដំណឹងសរសេរថា៖ «ក្នុងករណីមានការព្រមព្រៀងគ្នារវាងកម្មករនិយោជិតសាម៉ីនិងនិយោជក ឬមានចែងក្នុងបទបញ្ជាផ្ទៃក្នុងរបស់រោងចក្រ សហគ្រាស ឬអនុសញ្ញារួម ការឈប់សម្រាករបស់កម្មករនិយោជិតអាចអនុវត្តនៅពេលណាមួយផ្សេងទៀត ដែលខុសពីថ្ងៃឈប់សម្រាកបុណ្យ»។
ក្រសួងការងារសំណូមពរឱ្យរោងចក្រ សហគ្រាស និងកម្មករនិយោជិតទាំងអស់ចូលរួមអនុវត្តតាមសេចក្តីជូនដំណឹងនេះប្រកបដោយប្រសិទ្ធភាព៕
